Men In Black حاسة إني عايزة أعمل مسح شامل لذاكرتي زي اللي كان في فيلم
.يعني محتاجة اغير ذاكرتي.. استبدلها بواحدة جديدة
....واحدة انقي
.....واحدة اطهر
واحدة مبتديش اوامر لمخي عمال على بطال..
بكره ..حب .. خوف أو غيرة
....ذاكرة متكونش مبنية على احكام مسبقة
.واحدة متكونش خبيثة كده مابتلعبش معايا الاعيب لئيمة.. ولا بتدورني في حلوزنة مشاعر مبتخلصش
...عايزة ذاكره تكون من غير زعل امبارح ولا خوف بكرة ولا غضب كمان شوية
ذاكرة لحظية...مبتكرهش
....مابتحسدش
...مبتنافقش
ذاكرة ضد الحنيين.
ذاكره تكون فاكره بس إني بحب اللون التركواز... وتنسى إنه مش مناسب للون بشرتي
.....وماتقومش بثورة عليه من وقت للتاني لمجرد إني بحاول افتح شباك نسيان جوه قلبي
هو أنا عايزة ذاكرة جديدة
ولا قلب جديد....
ولا شخص جديد
مش عارفة......
....شبابك وبيبان ..توهة عنوان
.......أنا ملاخر عفريت لابس بدلة إنسان
0 التعليقات:
إرسال تعليق