ساعات احب حاجات مايحبهاش غيري (2)ج

10 simple reasons why "العقد" aka "كتب الكتاب" is my favorite wedding event !!

كتب الكتاب بالنسبالي مناسبه مش زي مناسبه ...

                                من بين كل  احتفالات الزواج ..أنا بحب كتب الكتاب .. 

                 

                             أنا مبفهمش الخطوبه ومبحبش الأفراح أو مش مفضله عندي يعني   

                                  

                                  لكن أنا ممكن تقول علي فتاة كتب الكتاب 

 بحس كل حاجه بكر .. ونقيه اوي حتي المشاعر بتبقي صادقه واصيله 

 بحس انه كلاكيت أول مرة لكل تفصيله  من التفاصيل 

   

                                      كتب الكتاب بالنسبالي كمان حكايه ..حكايه لغتها مشاعر ونظرات عميقه 

                                                وكل واحد يترجمها زي ماحابب وينسج قصته زي مايشوف 

                                                                   أنا بستمتع فعلا بكتب الكتاب 

     ******

 1-  بحس انه احتفال محفوف بالملايكه ومباركة الله... لاجتماع اتنين من عباده برباطه                                                           رباط مجدول من خيطين ..

موده ورحمه
 

2-بحب اللبس الانيق من غير ابتذال وفساتين الكوكتيل وشرايط الستان وعامة شكل الأطفال 

الولاد ببدلهم الصغيرة والبنات                               بفساتينهم المنفوشه بالوان الباستيل
 

3- بحب فيه البساطه وإن كل ماكان ابسط كل ماكان ارقي ..

حتة شيكولاته عشان يبدأوا حياتهم بحاجه حلوه وكوبايه عصير ..ودمتم 

بس ده ميمنعش  إني هقدم في كتابي تمر ولبن .. وبكده ابقي ضمنت حق الملكية الفكرية 

4-بحب نظرة الخطيب لخطيبته وهو بيقعدها عالكرسي  بيبصلها نظره مش عارفه اوصفها بس كأنه بيقولها "تفضلي اميرتي ..

ماهي الا لحظات لتتوجين ملكه بـعرش حياتي "..    

وايوه بتخيله بيقولها كده  بالفصحي 

5-الاب بالنسبالي هو نجم الحفل بشكل أو باخر ..

بحس اوي بتوتره  وتردده  ومشاعره المتضاربه  خصوصا أما الشيخ يحاول يحط ايده في ايد العريس
وهو باصص لايده دي  وكأنها شيء غريب ..

كيان غريب وشرير وسيء للغايه جاء من اللا وجود ليخطف صغيرتي ...

ابنتي التي تركتها منذ يومين تضفر جدائل عروستها ..قد حضر ذلك الهذا الآن ليخبرني انها كبرت وستتزوج 

طب لعلمك بقي لسه صغيره هه ..بس. 

بعدها يبص في عين العريس بعمق يلاقيها مليانه خوف ولهفة وقلق 

يبدأ بينهم محادثة سريعة صامته 

*انت شايف نفسك يعني تستاهلها ..أنا طول عمري حاططها في عيني !!!*

..وانا عمري مافكرت اخدها من عينك يا عمي..كل اللي طلبته بعد اذنك طبعا فرصة اني

 احطها في قلبي 

بعدها يقرر الاب اخيرا بعد لحظات صمت ثقيله ..ان يتوكل على الله مكتفيا بوعد الرجاله هذا ...

وعد  حتي نهاية العمر

 

6- بحب دموع  العروسه  وهي شايفه  باباها  بين  نارين..

.
 

نار فراقه ليها ..ونار  فرحتها بيه 

دموعها اللي بتوعده وكأنها بتقوله ..هتفضل طول عمرك بطلي المفضل 

7- بحس كمان احساس ام العروسه اللي عامله نفسها ولا على بالها 

بتضحك بصوت عالي مع ان جوه عيونها دموع بتترقق فبتلهي 

نفسها في ...

-خدت شيكولاته يا وائل؟؟!!

 -

حضرت العربيه يا سمير ؟؟

-شرين روحي اعدلي طرحة أختك ..

-يا جماعه بالله عليكم كام مره هاقول نفس الكلام .. وبعدين هو فين 

ماما حد شاف جدتكم؟؟!

 

وأول مايعقد القران تجري على جوزها وتمسك ايده أوي وتشد من عزمه 

وكأنها بتقوله أنا لسه  جمبك زي

ماطول عمري هكون 

وتنزل دموعها 

مع أول زغروته لاول مره من أول اليوم 

وتبقى آخر واحده تبارك للعرايس  وساعات بتنسي تتصور

 ...

بس بتحفر في قلبها أحلى صورة

 

فيلم كامل من أول وأوأة سمعتها لحد أول زغروته.. 

صورة العمر كله

 

8-كله كوم ولما الشيخ بيطلب من  الناس تدعي للعريس والعروسه  كوم تاني ...

ساعتها بجد بحس إننا اتنقلنا بث مباشر من الجنه... 

كميه نقاء ودعوات من القلب

 بحس كان صوت الملايكه وهي بتؤمن مسموع .. 

كل القلوب على قلب واحد 

بارك الله لكما وبارك عليكما وجمع بينكما في الخير 

....

بحب أول مايشيلو اديهم فيجري  اقرب واحد في  صحاب العريس ياخد المنديل

 

بحب كمان  اعد اتفرج على جنان صاحب العريس ورخامتهم  عليه 

وبحب كلبشه صحاب العروسه فيها وكأنها هتهرب منهم

 

9-بحبها لما تسيب كل دول وتروح تجيب انتيمتها .

..

صاحبتها اياها اللي كانت لما كانو لسه بضفاير وبيعملوا حفلة  شاي بفناجين لعبه يفضلوا  يحلمو باليوم ده وعمايلهم فيه وفستان فرحهم

 

صاحبتها اللي غالبا واخده جمب وبتبتسم ابتسامه بدموع محبوسة ..ابتسامه هما الاتنين بس عارفينها 

تروحلها وتقولها  بطلي عبط قاعده على قلبك ومربعة..

 

يضحوا

هما الاتنين بشكل هيستيري  وتتحرر الدموع اللي بقالها كام يوم تايهه في زحمة التحضيرات اللي رفضت تسيبها فيها ولو  لحظة

 

10-وبحب في الاخر العريس لما بييجي يقول كلمته التقليديه اللي مابتتغيرش في كل كتب الكتابات 

 

"مش كفايه بقى سايبها معاكم كام سنه دلوقتي؟! من حقي اخطفها منكم .."

ويعلن ملكيته بلمسه ايد رقيقه لايديها ... بالراحة طبعا

 عشان ماطنطتش من الخضه ..

اصلها  مش متعوده يعني 

آخر حاجه مش محسوبه في العد لاني بحسها هي كتب الكتاب كله 

بحاول امسك نفسي طول الوقت

 لكن مبقدرش اتحكم في  دموعي في أول مرة 

يمسك ايديها الاتنين  ويطبع بوسة على راسها

 

وكأنه بيشكرها من قلبه..  مش بس عشان عفافها وإنها صبرت عشان تبقي ليه هو لوحده وبس 

ولا  عشان جمالها من جوه وبره اللي مخليها في عنيه أحلى واحده في الدنيا

 

                            بس كمان عشان عقلها ورزانتها وحسن تصرفها في ادارة الامور 

بحسه بيقولها عشان كل ده واكتر عيني 

ماشافتش من كل البنات  دول غيرك ...

                                                  ولا عمرها مهما دورت هتلاقي زيك 

         اينعم هما عقل ورزانه عيالي حبتين بتضيع أول مابتشوفيني ماسك حاجه حلوه في ايدي

                 

وايوه ماتبصليش كده ..متخافيش يا ستي جبتلك الشيكولاته اللي بتحبيها 

     

       ساعتها تتشعبط في رقبته وتقوله بكل الصدق والنقاء اللي عرفته في دنيتها 

          

                                                               
                          

                                            ** بحبك **

                               وأول مايأذن الاذان على دقات قلب واحده ملكهم هما التنين

                    

يبتسملها ويناديها أول مره باسمه ..اسمه اللي بقى جزء من اسمها وحياتها

 

تروح تصلي أول مره باعتبارها حرم فلان الفلاني..ويفضل هو  ملاحقها- وهي بصاله- بنظراته

                                                        لحد ماتختفي جوه قاعة السيدات  

    

                                                   
                                                    ...الله اكبر الله اكبر ..لا اله إلى الله ...

                                                                        و...وبس
                                                              توته توته تبتدي الحدوته ...