على فكرة الحب مش في القلب ومحدش يضحك عليك ويفهمك كده ..
وبعديين بقى مين عين نفسه نقيب الاطباء بجلالة قدره وقال إن مكانه القلب (بص جمب الصمام الاورطي على ايدك الشمال وإنت داخل بس سمي و ادخل برجلك اليمين )ه
عارف.. زمان كنت بصدق
يعني اما كنا نروح ناكل بره واسالك عن الراجل اللي مكشر في وش مراته و سايبها عمالة تبصله بتدور عالشخص اللي حبته وهو نازل حتتتك بتتتك على الأكل.. ولما أتكلم بصلها بمنتهى اللامبالاة اللي فالدنيا وقالها... انتي مابتكليش ليه
كان ردك عليَّ دايما إن بلاش انخدع بالمظهر وإن ممكن يكون جوَّاه ليها حب أكتر بكتير من مجرد نظرات
كنت فاهمة إن ده اسمي درجات الحب
الحب اللي يبتدي من القلب ويروح للقلب ولا من شاف ولا من دري
ولا فاكر لما جيت اشتكيلك من صاحبتي اللي مبتسألش عليَّ ولا حتى بترد علي تليفوناتي
ساعتها قلتلي يمكن مشغولة بسمهما كان الحب في القلب
بس لأ...اسفة
ومع إنك كنت كتابي الوحيد فيما يتعلق بـامور الحب ...
مع احترامي لكل صفحة من صفحاتك بس مضطرة أقفله ولو لفترة واتفرغ لطرح نظرياتي الخاصة
ايوه ..الحب مش كلام والا ماكنش حد غلب لو كان كده كان كل واحد حفظله غنوتين من اغاني اليومين دول وراح سمعهم
بس كمان ماهوش أفعال وبس!!!!!!!
-ضحكت قوي لما قريت في مجلةالجملة دي " بعض الرجال يفضلون التعبير عن حبهم عن طريق اصلاح الاغراض المنزلية"ه-
يا فرحتي ..
يعني أما يصلح الحنفية يبقى بيحبني..
ولو ركب اللمبة يبقى... يااااااااه بيموت فيَّ وأقعد ادعي ليل ويا نهار ان حاجة في البيت تخرب عشان أعرف اد ايه بيحبني!!!!!!!!
أكيد مش كده ...الحب عامل زي الحلا في حياتنا..
حتة التورتة....
لازم يكون في مكونات سليمه ومتنقية كويس -مش أي كلام- ومقدار مظبوط وطريقة عمل صح كمان
وأهم حاجة التزويق وبالنسبالي كمان طريقة التقديم...
يعني اتفضل معانا شوية في المطبخ
تخيل لو عايز تعمل تورتة وجبت مكونات منتهية الصلاحية ..بلاش
مكوناتك من أغلى محل حلواني بس مقاديرك مش مظبوطة
ظبط المقادير؟؟!!!!
طيب هتعمل ايه لو حطيت البيض قبل السمنة(لغير متخصصي المطبخ -زي حالاتي- وضع البيض قبل السمنة بيخلي العجينة غير متجانسة ).....طيب عملت كل حاجات صح قوي ودخلتها الفرن..
ونسيتها ............................
مش بالذمة ده يبقى اسمه عك؟؟؟؟؟؟!!!!
سيبك بقى من طبق اليوم ده وطبق الكلام ده على موضوعنا
لو اعتبرنا إن المكونات- اللي هما الأشخاص نفسهم بقائمة الحاجات اللي بتقربهم من بعض,مجموعة الطباع,التوافق بجميع اشكاله وحتى الظروف اللي حواليهم-زي الفل
وفرضنا إن المقادير هي سلسلة الحاجات اللي بيقدمها كل واحد عشان ينجح العلاقة ممكن تكون بتحب قوي بس بالطريقة الغلط -زي البنت اللي بتحب قطتها قوي فبتاكلها كل يوم شيكولاتة..
يا أخي افهم القطط مبتحبش الشيكولاتةةةةةة!!!!!
اظبط مقاديرك الموضوع سهل ممكن تكون غيورمثلا -و ده مكون مطلوب في الطبخة- لكن المقدار مهم ولو مش قادر تظبط المقدارعالاقل خليك ذكي في العمايل يعني متحطش البيض قبل السمنة اختار وقت وطريقة مناسبة
جدتي دايما كانت تقول الشاطرة تغزل برجل حمار
-احم- بغض النظر عن الحمار وإنه ملوش أي علاقة
خلينا في موضوعنا....اهم حاجة بعد ماتخلص مترميهاش في الفرن وتنساها وتستغرب قوي لما تلاقيها ملهاش طعم ...اوعى تفتكر إن المشاعر دي مكتب ولا درج زي ماهتسيبها هترجع تلاقيها ..مهما تتجاهلها مش هتأثر فيها
المشاعر ساعات بتتحرق تمام زي التورته ..ممكن كمان تطلع نية لو استعجلت عليها.
نيجي بقى للخطوة المهملة ..واللي كل الناس مبتهتمش بيها ...
التزويق
يا أخي.. تعبت نفسك وكلفت تعالى علي نفسك شوية..
لا تتخيل الحاجات الصغيرة دي ساعات الواحد بيستناها إزاي..
ممكن كلمة شكرا ..تسلم اديك وحشتني .بقالنا كتير متكلمناش أو حتى إنتي كويسة؟؟
بتخلي الواحد يطير بجد من الفرحة..
(عن نفسي لازم أطلع حالا من المطبخ عشان هتحول للست جمالات لو اعدت كمان 5 دقائق)
دلوقتي التورتة قدامك ...ومفيش تورته حلوة وتورتة وحشة..في بس حلواني شاطروست بيت شاطرةواياك بعد كل ده ترجع تاني تغيظني و تقوللي الحب في القلب....
"الحب لو مطلعش من القلب ومشي في الدم ووصل للخلايا العصبية عشان يوصل إشارات للمخ وساعتها يطلع المخ فرمانات بـاوامر عاقلة أو مجنونة أو مش منطقية أو حتى تلاقي نفسك من غير أي سبب رايح بتكلم نمرة بقالك كتير متصلتش بيها وأول ماتسمع صوت حد تقول له
وحشتني قوي..بحبك
لو الحب مش كده .. ميبقاش حب
2 التعليقات:
يا إيناس عارفه في ناس بتعمل إيه في حياتها
بتفضل تستحمل التورته و هي مش مظبوطة و تقول معلش بكره حتحلو، و تفضل تاكلها سنة ورا سنة لأنها بتحب التورته، بس مش عارفه إن في تورتات أحلى من كدا بكتير مستنياها
لحد ما بيفوت العمر و بتكتشف إن ياريتها كانت أكلت التورته المظبوطة من الأول
التورته لو ماكانتش مظبوطة مئة بالمئة متبقاش تورته، ممكن تعجب حد غيرك و يقدر ياكلها طول حياته، بس إنتي ممكن تاكليها مرة و إتنين و عشرة، بس مستحيل تستحمليها طول حياتك
اسمحيلي أرض على مقطع مقطع يا رانيا :)
عندك حق لو فضلتي تستني التورته تتظبط عمرها ماهتتظبط من لوحدها
وبعدين كانت فين من الأول وهي بتنقي
بعيدا عن التورته
أنا شايفه إن لو هنشبه العلاقات الإنسانيه فهي اشبه بطريقة صنع التورته
أما التورته دي هي ناتج العلاقه
يعني حلوه عشان هما ماشيين صح
أو وحشه يبقى لازم يشوفو فين الغلط
أنمامفيش تورته بتيجي جاهزه
ردا على تاني مقطع :)
أنا شايفه إن عمر ماهتبقى في تورته "ناتج العلاقه "هتبقى مظبوطه في المطلق 100 في الميه
لازم تبقى فيها حتى لاذعه حتى مره حتى بتلسع
بس هنا آجي اتفق معاكي إن كل
حبه وليها كيال زي مابيقولوا
يعني الشخص بيختلفوا والعيب اللي اقدر يستحملوا حد غيره ممكن ميقدرش عليه
وغير كده في حاجه اسمها حب هي اللي بتقوم عمليه التبادل
يعني أنا اقدر استحمل عيب في حد حتى لو كان غير اعتيادي بالنسبالي أو طبع صعب عشان بحبه
وفي المقابل هو بيديني حاجات تانيه محدش غيره هيقدر يدهالي
وبس=)
سعيده جدا بتعليقك يا رانيا وزيارتك الخفيفه دي:)
نورتيني
إرسال تعليق