يوميات خاليه من الكوليسترول

خليك معايا لحظه واحده أيوه كده أنا معاك
أيوه يا سيدي كنا بنقول أيه ..اه
كنت بقولك ان انا بابقي فرحانه اوي لما باعد أنم عليك  ^_^ باعد اجيب في سيرتك كتير مع ربنا ..بحكيله عنك !
بحكيله أنك لو مش زي ما أنا شايفه يخليك احلي ما أنا شايفه
ولو أنا مش زي ما أنت حابب يخليني أحلى ما أنت حابب

بحكيله عن الحسابات والحاجات والمحتاجات
واني هنا وأنك هناك و ذ كله عشان احنا في مجتمع مغلوط عايش بالعكس
النيش والصيني والتكييف أهم عنده من السكن والموده والرحمه
وطقم الكوبايات والجيلي مكن يبوظ جوازه أو يخليك تسافر السعوديه عشان تكمل الطقم :S
عامه مش ده موضوعنا أكيد ماقعدتش أكلم ربنا عن النيش وطقم الجيلي أيه الهزار ده:D
 بصراحه فضلت أحكيله عنك واني نفسي تبقي فاهم عنه مش حافظ وهتبقي "كيوت" أوي بصراحه لو حافظ كلامه يعني بقي
ما تبصليش كده انا كمان هاحفظ ان شاء الله :$
ماتخافش أنا حكتله كل حاجه .. يعني حكتله كمان  اني مش حلوه واني عايزالك واحده احسن مني
واني في نفس الوقت عيزاك بقي بقي فيخليني أحسن مني ويخليك تشوفني أحلى وأحلى :)
مبسوط كده ؟؟::$
حكتله أنك لو مت قبلي عايزك تموت شهيد زي مأنا كمان عايزه اموت شهيده أيوه تموت زيي مش مراتك الله :ْ ؟؟!
وانه يوحش في عينك كل الحور العين كلهم كلهم كلهم ويخليني احلي منهم ويخليني مراتك في الجنه هه بس
ولو انا مت قبلك مايحسيسينيش بالوقت لحد ماتيجي بس في نفس الوقت ما يجيبكش غير لما تبقي مستعد
وتبقي جبت عيال كده وربتهم تربيه حلوه وطلعوا حلوين اوي لبابهم ومامتهم
ايوه ما أنا حطلك مواصفات عروسه ماتخرجش عنها ان شاء الله :D
مادام مش هتاخدني يبقي تاخد واحده عاقله وراسيه كده :D
-لأ كده بدئنا  نغلط بقي- قصدي إن أنا كمان عاقله وراسيه -...بص ساعات يعني مش هنكدب في الشهر الكريم ده:D بصراحه

بص برده عمال تخرجني انت من الموضوع
أرجع واقولك أنا بحب أكلم ربنا عنك كتير عشان باتكسف أتكلم عليك مع الناس دول عارف أنت شويه الحياء اللي سابهوملي المرحوم قبل مايودعنا و بعدين مش هيفهموا ..
بس ربنا بيبقى  فاهم كل حاجه

فاهم إني بحبك  و اني عايزه اشوفك عشان بتفكرني بيه ..
عشان  هاتبقي شاب نشأ في طاعه الله
وعشان قضاءالحوائج اللي بتقضيها للناس
وعشان برك بـابوك وامك
وحنيتك على اخواتك البنات مش عندك اخوات بنات برده ؟؟
..ايوه عندك  انا عارفه عشان تبقي حنين كده وعارف شويه عن الجنان والمرستان في البيت :D
المهم إني فهمته إني مش عايزه أي حد كده والسلام وإني مش هاتجوز غيرك انت
وأنك إن شاء الله إن شاء الله إن شاء الله مش هتخذلني وهتطلع زي ما أنا شايفه واحلي
ده أنا حتي معرفتش امسك لساني وحكيت لربنا حبيبي عن أول مره هاشوف مامتك فيها وبعد أما نبقي صحاب
بيتهيألي لو مرة سألتني بتحبي في ابني ايه أو بتحبي ابني ليه مش هاعرف أرد
بس لو هارد بيتهيئلي وشي هيجيب الوان وعيني هترغرغ بدموع وابتسم ابتسامتي اللي اكيد انت عارفها الواسعه قوي دي وافتح عيني اوي عشان دموعي ما تنزلش
واقولها "أنا بحب ابنك و بس ..:D
تقول علي بجحه تقول علي مجنونه بقي براحتها الحاجه عامة اساسا بس أكيد هاتفهم أو ربنا اعلم
وبعدين ايه ده ما  أكيد هكون مراتك ساعتها ما أنا أكيد مش ابقي أنا وهي صحاب اوي بالشكل ده غير بعد ماتدبس في ونبقي كتبنا الكتاب ولا حاجه
بس بقي عشان ورايا حاجات كتير أعملها وأكيد انت كمان مش فاضي للكلام ده مش وراك صلاة تهجد حضرتك ولا هنبتدي هزار بقي ونقفش على بعض وكده من اولها
طيب بص يا سيدي عشان وقتك ووقتي بغض النظر عن الشيزوفرينيا اللي عندي- أنا معترفه بيها بس متقولهاليش في وشي كده الله- انت عارفني الحساسيه واخده حدودها ومعديه معايا ..
وانت كمان أكيد مش كامل و عليك عمايل تجنن برده بس لازم نهدي علي بعض و نستحملنا شويه مش هانعد نمسك لبعض عالواحده..
ولا ايه :)؟؟!
أكيد احنا هانبقي فاهمين بعض كويس وحافظين وعارفين حركاتنا وعارف حركاتي النص كم _خليك انت الكبير يعنى ناقصات عقل هتعمل ايه بقي :D

بعيدا عن أني مجنونه وبتكلم بسرعه ومش بافهم الحاجات من أول مرة و-... كفايه كده أنت أكيد عارف الباقي :D


المهم اني والله طيبه وبنت حلال اسألني أنا عني أنا اساسا مش هيجي مني صدقني نزلوا فيرجن واحده والمصنع قفل بعدها


لأ بجد :)


أنا وعدت ربنا اني عايزه أكونلك سند زي ما أنت حتكون لي
وعايزه أكونلك زوجه تفخر فيها بجد قدام نفسك أبل الناس
وعدت ربنا اني أكونلك سكن واني على قد ما أقدر مزعلكش وأعرف إنت بتحب أيه و اعمله ..و ان زعلتك ما اطولش الزعل
وأني أفضل زي ما أنا ومتغيرش أفضل بطموحاتي و- حياتي أللي باحبها وإللي انتي حاتحبني عشنها _عشان صدقني لو اتغيرت مش حتحبني زي ما أنت فاكر و عشان التفاصيل الصغيره دي ببساطه هي انا ..حتي لو لنسخه أنت شايفها حلوه ..
زي ما وعدته اني هاتغير للي يرضيه و يرضيك ويرضيني :) من الاخر افضل احاول ابقي احسن
وراهنت نفسي اني هخيلك تدعيلي دعوه معك في كل صلاة أن ربنا يريح قلبي زي ما آن مريحه قلبك
أيوه ما أنا هبقي مريحه قلبك بقي وكده "بربشه"^_^


أخيرا كالعاده دعتلك ودعتلي ودعتلنا وقررت أقفش عليك عشان حاسه انك مابتدعيليش بضمير
بتدعي بضمير ؟؟ ادعي بضمير لو سمحت بقي بقي :(


ربنا يرضيك و- يرزقك ويهديك ويهدلك نفسك وينور بصيرتك بقي وتشوف نصك المسكر- إلي هو أنا-^_^
اه اه ويباركلك يعني في وقتك في رمضان ويبلغك ليلة القدر
آمين :)
اه اه أخر حاجه -مفيش فايده في -ماتنساش أما تيجي تجيبلي تورته شيكولاته  عشان أنا  اساسا مابحبش الكريمه دي :$$:D


زوجتك-المجنونه -احم المستقبليه .. ^_^

احمد اخويا كان معايا السنه اللي فاتت

احمد اخويا بيحب الكنافه وأنا ماليش تقل عليها اوي
احمد اخويا كنت بشوفه ساعتين بالكتير
كنا بنتكلم كتير
كان بيعد يفرجني على احلي حاجه شافها في يومه و أكتر فيديو بيضحك
احمد اخويا كان بيخليني احكيله حكايات "أنا اصلا بحب أحكي حكايات أكتر "
احمد كان بيخليني العب معاه نيد فور سبيد ودوم كنت بدوس على المسدس وهو يتحرك كنا تيم
أو في السباقات هو كان بيلعب برده وأنا باعد أعمل دور المعلق "أنا عارفه انه كان بيحايلني  بس ده كان كفايه
أي حد هيشوف احمد اخويا هيقول عليه مش احسن أخ في الدنيا وأنا بس اللي بحب ارسم الناس زي ما أنا عايزه اشوفهم
هو نفسه بيقول كده!
هما وهو ميعرفوش أنا بفكر إزاي ..وانت كمان
احمد اخويا شبهك اوي
احمد اخويا هيسافر .. هيهاجر
مي صاحبتي بتضحك وتقولي انه من امتي كان هنا!
و أنا مش فارق معايا
أنا فارق معايا ؟؟
لأ مش فارق معايا ..
ماما فارق معاها بتمثل بس فارق
النهارده بالذات وجعت قلبي
احمد اخويا مش دايما بيسأل علي وأنا أكتر بسأل عليه ..مش مهم
احمد اخويا أنا مش من أولوياته عشان أنا كبرت  بس أنا عارفه إني مميزه جدا عنده
احمد اخويا أول واحد علمني أصلي وعلمني يعني ايه جامع وعلمني يعني ايه بر بـماما
احمد اخويا أول واحد علمني يعني ايه مسئوليه ونجاح
احمد اخويا قاللي ان أحسن حاجه فيَّ اني دايما عايزه ابقي أحسن واني دايما بسأل !!أنا مش بانسي اليوم ده
احمد اخويا شاطر اوي
أنا قلتلك انه شبه احمد اخويا ؟قلتلك صح
احمد اخويا حلمت بيه أول كابوس في حياتي كان عنه !
الايام دي كمان بحلم بيه كتير ..مابحلمش الا بيه
احمد اخويا شفته أول امبارح كنا وسط ناس كتير  وكعادتي لاي حد بحبه اوي ويبقي واحشني بداري ده  بشكل متعمد معرفش ليه
بس أول ما بقينا لوحدنا اترميت في حضنه وقلتله "عامل ايه يا احمد " ايوه وقلتله احمد كده
أنا مش عارفه ليه احمد اخويا ..ليه هو بالذات !!
احمد اخويا واحشني اوي
يمني لما كانت بتضحك معايا كانت بتقول إنهـبتحس إني خايفه عليه يهرب وعشان كده بعد اسمه لازم اقل اخويا
ساعتها لول مرة ابطل غلبه واسكت لاني اكتشفت إني باعمل ده من غير ماأحس وانه مش طبيعي وإني مش بعرف ابطل
لحد دلوقتي معرفش ليه
ولا عايزه أعرف ..
احمد اخويا اللي بيحب الكنافه علي أنا ماليش تقل عليها وبيسقي العيش الفينو في اللبن وبيلعب معايا و بيخليني أنام معاه عشان عارف إني بنام لوحدي و بيقوللي إني شبه تررم وكل حاجه بحبها
احمد ده واحشني

بطه

احيانا قصة شعر جديده تلخص القصة كلها
القصه تبدأ بالاخفاق في مرحله استحوذت على نطاق حياتك.. مرحله بطول خصلات شعرها الكستنائيه الفاتحه
اتركها لتعيش مراحل حزنهـا السبع  المعتاده
الصدمه ..النكران ..الغضب ..النحيب ..الحنين ..الإنسحاب..واخيرا الإستسلام
ثم تأتي بعد ذلك القرارات المتضاربه   !!

-"الاطراف زي كل مره ؟؟!!"
 تسأل بطه وهي تهم بالامساك بـالمقص بشكل احترافي لتقص الاطراف بطريقه آليه
بطه هي الكوافيره الخاصة بصديقتي منذ مايقرب السنه والنصف انقلب الامر ليصبح اشبه بعلاقه صداقه من تلك التي يطلق عليها  بالكاجوال "صداقه دون ارتباطات ولا التزامات ولا نقاط توافق ولا أشياء مشتركه ,
فبطه الفتاه الاميه  الساذجه التي يمارس اخيها ضدها العنف باوقات فراغه او عندما يفرغ من انفاق النقود التي يسلبها اياها كل أول شهرلا تمت بصله لصديقتي استاذه الاقتصاد بالجامعه المحترمه  لا شكلا ولا مضمونا

-"كاريه قصير."
قاطعتها صديقتي في حسم

ذهول من قبل بطه  واجهه تصميم من قبل صديقتي  .. ثم استسلمت الاولي لقرار صديقتي الفجائي والغريب
لتصبح بعدها  فرجه المحل مابين حاسد وحاقد وخائب  امل ومتسائل
تضحك صديقتي بشده  عندما تسمع همهمات تلك العجوز وتنبؤاتها لها  بـانها لن  تورد على جنه قط بفعلتها تلك فخصلات الحرير التي تضحي بها هي تلك بمنتهى البساطه تحلم بنصفها الكثيرة ويصرفن المال ك ينعمون بمثله فمن تكون تلك المتبترة على نعمه الله  التي ستزول من وجهها باذن الله قريبا بسبب افعالها المتهورة تلك .

بينما تتسائل عينا  الطفلة الصغيرة  ذات  الذيل حصان القصير جدا  اعلي راسها عن امكانيه اقتراض شعر تلك السيده  على سبيل السلف بينما تزجرها امها في حزم تمزق به حلم الطفله في طرفه عين.

أما أنا ...فلا افعل شيء سوى ان اقوم بـتناول مجله بهدوء وادس عيناي بها في محاوله للهرب من نظرة هؤلاء النسوة .. اتصرف و كاني لا اعلم شيء ..كاني لا اعلم شيء على الاطلاق.....

تبدأ بطه في ثرثرتها المعتاده والتي تعتبرها جزء من صميم مهنتها والتي تتقاضي عليه اجرها  ويجب عليها تحليل لقمه عيشها
"مش عارفه يا ست نرمين بس شعرك ده والله خساره   أنتي اكيد محسوده ,وبعدين دانتي كلها شويه والتانيه وتتجوزيوتبقي عايزه تعملي فورمه في فرحك... مش برده قريب يا ست  نرمين ...مش كنتي  قلتيلي إني قريب هافرح فيكي وهزرنا وكده وبتاع
ولا  بردك معرفتيش توصلي له؟؟

ضحكت صديقتي  ضحكه رنانه لم اسمع رنتها من قبل  وأنا احاول ان اكتم  هذه البطه بنظراتي من وراء المجله التي ألصقها بوجهي
قبل ان تجيبها
 "لا يا بطة متخافيش  أنا عرفت اوصله"

بطه بخبث :طب وايه اقول مبروك؟؟

صديقتي في لا مبالاه وهي ترسم على ثغرها ابتسامه ساخرة :لأ يا بطة متقوليش حاجه عشان مفيش حاجه

بطه: ليه كفا الله الشر بس ..هو ناوي يقعد هناك أكتر من كده يعني ؟؟!طب مايرجع يكتب عليكي وتسافروا سوى ماياما ستات بيعملوا كدهه ,أنا بنت عمتي عملت كده جه جوزها  اتجوزوا وكتب عليهها وسافروا السعوديه سوى مش هو في السعوديه بردك ؟

صديقتي :لأ يا بطه مش في السعوديه ولأ مش ناوي يقعد هناك كتير ولا حاجه

بطة: أُمّال ايه بس مش أنتي قلتي انه مسافر وانه تو ماهيرجع هتكتبوا؟؟ ..هايجي البيت يعني ويقابل البيه  اخوكي وتكتبوا الكتاب وكده ؟؟
معقوله يعني غير رايه وبعدين هو كان يلاقي زي حضرتك فين اساسا , ده حضرتشك حسب ونسب وتتحطي عالجرح يطيب
ده لولا حضرتك ماكنتش عرفت أكتب اسمي بعد ما عرفتيني على فصول الاميه دي ,طب بالك أنتي أنا بابقي سامعه الزباين لما بتيجي عندي كل مره بيعدوا يشكروا فيكي وفي جمالك وروحك الحلوه  ويسألوني عليكي وأنا للي بقولهم ان حضرتك متكلمين عليكي و لولاش بس هو السواد اللي حضرتشك لابساة ده والعبايه اللي مكبراكي  من بره كده ومخلياكي اكبر من سنك  لكن حضرتك أول أما بتدخلي عندي -والله مابقول كده عشان قدامك يعني أنا ربنا يعلم من قدامك  زي من وراكي يا ست نرمين وربنا يعلم ..والله أنتي بالذات من دون كل الزباين اللي باشوفهم زي الفل من جوه وبره وتعرفي ربنا وألف من يتمناكي ده كفايه حنيتك ..ده أنا حتي نفسي اشوفه بس عشان أعرف مين ابن المحظوظه اللي أنتي بتستنيه ووشك بينور كل مره لما بتيجي سيرته ولا بتحكي عنه, مش ممكن يكون غير رايه والله خديها مني كلمه هو اكيد شويه زعل وهيروح لحالهم قال غير رأيه قال هو هزار ولا هزار

 نظرت لصديقتي فوجدت دمعتين ترقرقوا بعيناها تداريهما كعادتها بابتسامه هنا قررت ان اترك المجله -وقمتلها ماهو مبدهاش بقى-
"ايه يا بطة هو أنتي كل مره تيجي تاكلي ودننا كده لو بتشوفي شغلك اد مابترغي بيتهيألي كان يبقي اسمك بطة الصغير ولا كان زمانك فتحتي محل بتاعك بس عملالانا فيها خصوصيات وبتاع  أما نطلب نمرتك "مابديش نمرتي لحد وأي كلام ماتخليكي في حالك بقي وشوفي شغلك"

بطة:كده يا ست ليلي طب بردك مش هارد عليكي بس عشان أنتي صاحبه السكره دي

تبتسم صديقتي ابتسامه معاتبه "صحيح مالكيش حق يا ليلي سيبك منها يا بطه خليكي على راحتك
عامة لأ ربنا مايجيب زعل ..احنا مازعلناش وهو لسه بيحبني متقلقيش..

بطة :أمال حصل ايه بس؟؟

نظرة صديقتي بعينا بطه وابتسمت ابتسامه واسعه   :"اتجوز"

بطة وهي تخبط على صدرها في ذهول :"نعم   ؟؟؟؟؟"
قالتها بطه قبل ان تصمت تماما مثل من أكل لتوه جرعه مكثفه من سد الحنك وليست هي وحدها من سد حنكها بالحقيقه ..

تنظر لنفسها بالمرآة تغمض عينيها لدقيقه كامله تودع بها تفاصيل القصه كامله فهي تعلم ان عملية محو الحنين ستنتهي بمجرد سقوط آخر خصلة شعر متعلقة برأسها..
 كانت تعلم ان حياة جديده وشكوك وأفكار  جديده تنتظرها بعد قصة الشعر تلك
كانت تعلم ان تلك آخر مقتنياته لديها
كانت تعلم ان ذلك اخر مايربطها بعالمه
كانت تعلم ان تلك المرة ستكون القصة التي تختارها هي لانها تريدها لا لانه  يفضلها !
 فتحت عنها بعد ان استجمعت قواها لتجد امرأه اخري غير التي اغمضت عنها شعر كستنائي قصير امرأة لابد وان تكون واثقه جدا من نفسها ,روحها خفيفه إلى ابعد الحدود ومتمرده بشكل أو آخر ..كانت دائما تعلم ان السر ليس في القصة ولا بالشعر هو مجرد ذلك الإحساس  الذي تنشده وتبحث عنه بقوة واصرار ومستعده ان تفعل أي شيء حتي لو كان الثمن بعد الجنون والخروج عن المألوف ..
كل ماارادته ان تري نفسها بشكل مختلف ان تصبح امرأة اخري يصعب عليها التعرف عليها ..تريد ان تتعرف على ذاتها من جديد  ربما

ثم اردفت :"بقولك ايه يا بطه أنا عايزاكي تكملي تعليمك  ومتوقفيش عشان زي ما اتفقنا لما تبقي صاحبه محل كبير بتاعك لوحدك تعرفي تمضي العقد, ومالكيش دعوه بأخوكي متسمعيش كلامه ولو ضربك تاني روحي عند خالك متخليش حد مين ماكان يغصبك على حاجه غلط أنتي مش ضعيفه زي ماأنتي فاكره!!
واتكلمي ..متكتميش جواكي كتير ..
وأما تفتكريني افتكريني بالخير وادعيلي دايما وادي نمرة تليفوني أما تحتاجيني اوي كلميني ماشي ؟!

بطة :حاضر يا ست نرمين بس ليه بتتكلمي وكان دي آخر مرة هنشوف حضرتك فيها

صديقتي بابتسامه هادئة "عشان أنا غالبا  مش هحتاج تاني كوافير يا بطه وغالبا هاعتني بنفسي بشعري لمده مش قصيرة :)

بطة :ست  نرمين؟؟!

صديقتي :نعم يا بطه

بطة : أنا عايزه اقولك حاجتين..

صديقتي :اتفضلي يا بطه عايزه فلوس متتكسفيش..؟!

بطة مقاطعه بسرعه قبل ان تدس صديقتي يدها في حقيبتها لتخرج المال -
"لأ يا ست مستورة الحمدلله.. أنا عايزه حضرتشك تاخدي بالك من نفسك أنتي طيبه وتستاهلي كل خير وهو اللي خسران والنعمه الشريفه و هيشوف أيام سودا اسود من اللي اتجوزها دي

صديقتي بغضب : لاحول ولا قوة إلى بالله يا بطة ليه كده بس ؟؟ أولا مش قولنا منحلفش غير بالله ؟؟
ثانيا بقي ايه اللي أنتي بتقوله ده يا بطة ده نصيب !
و بعدين متدعيش عليه ..ثم اكملت بعصبيه "ولا عليها كمان -الله -لا حول ولا قوة إلا بالله-  ماتدعيش على حد خالص  يا ستي
 ربنا يكتبلهم الخير فين ماكان  ..ولو هاتدعي ادعيلي أنا ..
أنا مسامحه جدا الحمدلله ..ادعيلي بس  انسي.
نظرة لبطه وادركت انها انفعلت زياده عن اللزوم على تلك المسكينه  فابتسمت وواصلت الكلام "و حاضر يا بطة متخافيش علي .. هـا عايزه تقولي  ايه كمان؟

بطه : حقك علي يا ست متزعليش ونبي  قصدي -لا الله إلى الله-  أنا اسفه ..المهم اني عايزاكي تسامحيني عشان كدبت عليكي ..
أنا أصْلي ماسميش بطة يا ست ..

 ضحكت  صديقتي بشده ثم اردفت :..متقلقيش علي يا بطه  ومتخافيش أنا ماينفعش ازعل منك ..سكتت لحظه وضحكت ضحكه خفيفه
..أصل أنا كمان ماسميش نرمين :)
  قالتها وكأنها ترمي التحيه بكل بساطه ثم سلمت عليها بحرارة وتركتها وتركتني وأنا لا استطيع ان اقاوم سيل الخواطر التي عصفت بذهني

لم استطع ان افهم ابدا  طبيعه العلاقه التي تربط بينهما ولماذا كانت ترتاح نرمين بذلك الشكل لتلك البطة بالذات ولماذا كانت متعلقه بها لذلك الحد و الهم لماذا قررت الآن بالذات لقطع تلك العلاقه ...كما لم افهم ايضا سر اختيارصديقتي  لاسم مستعار وعدم التصريح باسمها
ولا اللغز وراء البـوح  بـاجزاء معينه من القصة اجزاء من اختيارهـا.  
لماذا اصرت- رغم رفضي- الخوض في أشياء شخصيه مع كوافيرتها التي يفصل بينهما اميال من المسافات العلميه والاجتماعيه ؟!والثقافيه
لماذا بطة بالذات التي روت لها أشياء لم تروها حتي لي اعز صديقاتها والقرب الي قلبها؟؟
ولماذا لم تصارحها بانه مازال يحبها وانه سيظل كذلك وانه اناني وانه نقطه ضعفها وانه سيظله كذلك وانها تضحك على نفسها عندما تقنع حالها بان تلك الخصلات ستخفف من وطأه الحنين اليه وستمكنها من التخلص من قيوده؟؟
كما  لم تخبرها بـانها نقطه ضعفه هو الاخر  بالرغم من انانيته التي لا يدركها ولا تدركها هي ..
لماذا لم تصارحها انها مازالت تتلون بالحمره إذا ماذكره أحد بشر ولو حتي بدافع تطييب خاطرها ....
؟؟لماذا لم تصارحها انها الوحيده التي كانت تحكي لها عنه
ولماذا لم تصارحني أنا بالسبب ..!!
ظللت اردد بذهني لما اختارت بطة نرمين ؟!
...حتي وجدت صوتا داخلي  يردد بلا توقف  ولا سبب واضح  بخلفيه راسي
 ...تكونش  بطه هي هي نرمين ؟!
بالنهايه بطة ونرمين وجهان عمله صكت من معدن الخوف ..التردد والفقد
؟؟!تركتها وتركتني  وأنا لا اعلم هل اواسي بطة اللي مش بطه ولا الحق نرمين اللي  مش نرمين 

قطايف (4)

معادلة النهارده
يونس عصي  ربه >>ربنا برحمته  ابتلاه
يونس دعا ربه >> ربنا برحمته ودعاه نجاه

ااحنا بشر وبننسي ونعصي وساعات ممكن نزهق كمان ودي حكمه من ربنا لو ماكناش بنغلط كان ربنا بدلنا وجاب بدالنا ناس بتغلط  وتستغفر فيغفر ..
لو ماكناش بنغلط مكنش نبقى بشر ...نبقي ملايكه
 صحيح بنغلط وصحيح دي جبله فينا بس ده مش معناه نسوق فيها ..ابدا بالعكس
..دي الحاجه اللي بتفرقنا من الملايكه وعن الشياطين

بالعكس وكأنها  دعوه للسعي أكتر وترويض النفس أكتر وأكتر -وأنا قاصده ترويض  مش تعويد عشان كل واحد ادري بحاله ادري بنقط
 ضعفه ,اماكن وقوعه ونقط قوته والحاجات اللي بتعليه
فزي مالازم تعرف نفسك وتروضها عالصح ..
لازم ماتكابرش  !!
ايوه يونس لما غلط أول حاجه عملها كانت ايه ؟؟
"لا اله الا انت ..سبحانك اني كنت من الظالمين "
لا برر بقي ولا قال أصلي تعبت أصل الدنيا والزمن والناس أصل الحاصل والوضع والمجتمع كله ضدي يا رب والكلام الفاضي اللي :Dبنضحك بيه على نفسنا ده
 "لا اله الا انت ..سبحانك اني كنت من الظالمين "وجمبها نقطه

نيجي للشق التاني  في المعادله ربك عدل مش بيبتليك كده والسلام ابتلاء ربنا لسيدنا يونس كان محبه ..زي ما ام تشوف ابنها بيغلط فيعز عليها ساعتها قرصة ودن بـتعرفه غلطه ..ساعتها الإبتلاء بيبقي رحمه ولله المثل الاعلي سبحانه وتعالي
يمكن يكون ابتلاك عشان يكرّمك  ..يمكن اصلا تكون المعصيه الكبيرة دي  سبب في توبه خالصة مفيهاش رجوع العمر كله

ففي الاخر لا تحزن ..ادعي "لا اله الا انت سبحانك ..إني كنت من الظالمين 
آخر شق ومن غير كلام كتير عشان نقوم نشوف اللي ورانا :D
الدعوه >> نجاه
وخصوصا لو كات دعوة مضطر ....

لا اله إلا انت سبحانك  اني كنت من الظالمين 

رمضانيات (3)قطايف

يوسف اقرب الناس اليه ظلموه>>>> يوسف رب الناس اراده نبي وملك وعزيز 

كده ببساطه..
المعادلة الربانيه مختلفه عن حساباتنا كبشر


الفكرة إن مش بيحس بفضل ربنا غير اللي بيتأمل ويشكر
يعني عشان احنا شايفين حياة سيدنا يوسف كلها على بعضها شايفينها كلها فضل و نعم وبنعدي على الابتلاءات مرور الكرام من ان فيها ما لا يطيقه بشر من أول  يتمه  مرورا بظلم وخيانه اخواته له وهو طفل وتربيته عند أغراب وظلمه تاني مرة على يد امرأة العزيز وسجنه سبـع سنين !

في الوقت اللي بنعيش فيه حياتنا مش قصة بتحكيلنا فقليل اوي مننا اللي بيتأمل في حياته و يربط احداثها ويتفرج على التخطيط وحكمه ربنا فيها وفي كل الحالات .. يشكر
سيدنا يوسف في عز شدته كان بيزداد شكره لنعم ربنا ..احنا بقي بنعمل ايه لما الدنيا تشد شويه ؟؟

عامه معادله سيدنا يوسف مش بس اعظم حاجه فيها تحمله للظلم أو اجتنابه لحرمة ربنا
اللي لفت نظري انه مع كل ده شكر وسعي ..

حياة سيدنا يوسف فكرتني بحديث سيدنا محمد صل الله عليه وسلم
احفظ الله يحفظك ، احفظ الله تجده تجاهك ، إذا سألت فاسأل الله ، وإذا استعنت فاستعن بالله ، واعلم أن الأمة لو اجتمعت على أن ينفعوك بشيء ، لم ينفعوك إلا بشيء قد كتبه الله لك ، وإن اجتمعوا على أن يضروك بشيء لم يضروك إلا بشيء قد كتبه الله عليك ، ( رفعت الأقلام وجفت الصحف )

المهم  سيدنا يوسف عليه السلام كان له دعاء حلو اوي
 " (رب قد ءاتيتنى من الملك وعلمتنى من تأويل الأحاديث فاطر السماوات والأرض أنت ولي في الدنيا والآخرة توفني مسلما وألحقني بالصالحين).
والحقني بالصالحين ..آمين =)

;) رمضانيات (2) قطايف

سؤال لأصحاب الفيس بوكات  وما اكترهم :D
هو ايه الفرق بين ال wall وال inbox؟؟!
طيب من غير لت وعجن كتير ال wall هو اللي الناس بتشوفك  من خلاله فبتعرف عنك أكتر (هواياتك /هويتك /شويه عن مرجعيتك ارائك/ انتماءتك...الي اخره )

ال inbox: هو أنت زي ماانت .
انت بهزارك بين صحابك القريبين باخلاقك بالحاجات اللي انت بس اللي عارف وشايف عنها وبتختار من يشوف ايه ومين مايشوفش !
لو خدت التعريف ده ورحت لاي حد قاري في التنميه البشريه هيقولك يابني يا حبيبي ده الفرق بين ال character وال personality
 

قبل ماالموضوع يقلب ملل..
الفكرة كلها إنك لازم يكون عندك مسطره تقيس بيها  الفرق بين اللي قدام الناس واللي جواك  قبل ما يوسع وما تعرفش تلمه  ..
ويا بخت اللي جواه زي اللي برآه
هم دول العالم اللي بيتقال عليهم متصالحين مع نفسهم  أو متسقين مع ذاتهم
بعيدا عن الكلام الكبير :D

كلنا بطبيعتنا كبشر بنصلح في اللي بره وده مش عيب  بس كمان مع كل مسمار بتثبت بيه حاجه حلوه براك دقدق واحد زيه جوه منك
وأما حد يشكر فيك عشان اللي شايفينه من بره
خليك واعي إن ده من ستر ربنا عليك عشان لو دققت هتلاقي الانبوكس بتاعك مليان بلاوي
فلما حد يشوفك جامد اوي اوي ..ردد جوه نفسك

اللهم اجعلني خيراً مما يظنون ، ولا تؤاخذني بما يقولون ،
واغفر لي ما لا يعلمون .. اللهم إني أعلم بنفسي منهم ، وأنت اعلم بنفسي مني ،
وقد اثنوا بما أظهرته لهم ، فلا تفضحني بما سترته عنهم ،
وكما أكرمتني في دنياي بعدم الفضيحة ،فاسترني في أخراي بجميل سترك يا منان .. 

رمضانيات(1) "فرحه "

الفرحه استثمارحتي لو مش في المود وعملت اقل حاجه تبسط الناس حواليك هتعود عليك بشكل أو تاني  عن قريب أو عن بعيد  مش مهم
!!بس ..لازما حتما هتفرح وده المهم

أبدأ بحاجة صغيرة وخد ليها نوايا
هدايا لصحابك*
مكالمة تليفون لحد مستنيها منك*
إن شاء الله حضن كبييييييير لاطفال العيله بعد ماتشيلهم وتلف بيهم مرة في الهوا حتي لو صايم وتعبان  بس خليك عارف إن ضحكتهم  اللي هترن في ودنك هتفرحك

الفرحه صدقه فرح واحد  غلبان بس كل يوم ومش مهم هو مين  فرحه من غير ماتستني مقابل
-عدي على ست  من الي بيبيعوا المناديل في الشارع واشتري منها كل اللي معاها وهاتلها  3 تمرات وعلبه عصير وقولها  افطري على دول وافتكريني بالدعاء يا امي
وخد المناديل دول ووزعهم على اللي تعرفهم من جيرانك وصحابك وهذر معاهم أو سبلهم جواها ستيكي نوت باللي نفسك فيه
"ذكر ,دعاء,نكته ,فكره بميعاد ..الخ
خليك مبدع ;)
*أو حتي اضحك في وش حد شكله طهقان من حياته عارف الابتسامه اللي بتتكلم لوحدها دي بتقول "هونها تهون "
دي لوحدها  فرحه ومتجربه =)

الفرحه عدوي لو فرحت اللي حواليك واثرت في حياتهم ولو واحد في الميه أو اقل  هتفرح بس  شغل مخك وأبدأ الدورة صح
....الدايرة اللي حواليك وبعدين الأوسع فالاوسع وهكذا

الفرحه  قريبه مش بس الأماني اللي لسه ماتحققتش هي اللي هتفرحنا مش بس الحاجات اللي مش عندنا أو اللي لسه منعرفوش هي اللي واقفه عليها فرحتنا  ... في الحقيقه ده حاجز الفرحه ذاته لو قررنا نسميه

الفرحه في حاجات صغيرة  اوي وحوالينا
!ممكن تلاقيه في فانوس جالك هديه وأنت مش واخد بالك
في ضحكه  العيال الصغيرة  وهما بيقولوا نفس الكلام اللي كنت بتقولوا وانت ادهم  ويفكروك بايام زمان
! ممكن تحسها في لمه على الأكل  بتحصل كل فين وفين لناس الدنيا بطبعها واخدهم من بعض
ممكن تلاقيها في جلابيب بيضا وإنت رايح تصلي التراويح
أو في شباب ماسكين تمر وميه وواقفين في عز الحر وقت الادان عالطريق عشان يفطروا الصايمين

ممكن تلاقيها في حاجات كتير اوي ...
بس الأكيد أنك هتلاقيها في ركعتين في ليل لوحدك أنت وربك وأنت بتقولوا على كل اللي شاغلك وكل اللي حصل واللي جري وانت بتعترفله انه مكنش قصدك وإنه عندك اغلي واكبر  بس انت اللي ضعيف وتطلب منه الحول والقوة  وتقوله إنك مالكش غيره وتسأله قربه وحبه وترجح مهما حصل يقربك ومايبعدكش تاني ابدا ويساعدك تطلع من حيز الكلام للفعل بقي  ..مايضيعكش
واشكره إنك عنده لسه غالي رغم كل اللي كان
 ماهو عشان تعد تقول الكلمتين دول دلوقتي تبقي غالي .. اشكره عشان غيرك ملحقش يقعد قعدتك دي ولا يشكره

افرح وفرح الناس ..رمضان بركه وربنا كريم اوي اوي اوي
مادام لسه حي يبقي عيش ..عيش بجد وخلي لحياتك طعم

 ;)وصحيح على رأي اللي قال  ..ماهو ايه بيطول عمر الواحد غير الفرحه  

بالعكس

عكس كل مرة المرة دي مبسوطه
عكس كل مرة المرة دي مش هاقول لحد عشان مش عايزه حد يغلطني أو يرجعني عن قراري
عكس كل مرة أنا منتعشه ..رجعت لدروسي واقفه جمبي جامد
عكس كل مرة مش متغاظه ولا متضايقه ولا حتي مستنيه سؤال
عكس كل مرة مش مستنيه معايده 

عكس كل مرة أنا معترفه بغلطي بس الجديد إني مش زعلانه مني
عكس كل مرة أنا كل اللي في دماغي رمضان
عكس كل مرة أنا بحب نفسي أكتر أنا عايزلي الجنه
عايزه لناس تانيين بس عايزلي الجنه برده
عكس كل مرة معنديش مشكله في انصاف الحلول إذا كان البديل إني هضحك على نفسي
 عكس كل مرة كنت وحشاني   شويه
عكس كل مرة مش عايزه أكتب حاجه مفهومه ولا بوصل رساله معينه بالعكس
عكس كل مرة أنا بكتب كلامي للتوثيق  مش تفريغ كبت
عكس كل مرة أنا متفائله
عكس كل مرة أنا عارفه اني بنيادمه كويسه ..اني بحب ربنا بجد وإني مش عايزه ازعل حد بس كمان مش عايزه ازعلني
 عكس كل مرة أنا مؤمنه بجد وجد إن من يتق الله يجعل له مخرجا حتي لو مكنش المخرج اللي هو باصص عليه
عكس كل مرة لما بكتب الكلمتين اللي فوق دول مش حاسه انهم تمثيل أو تصنع قوي ..ايوه أنا مش كئيبه ولا مأساويه
عكس كل مرة عايزه اكتبهم واخبيهم وغالبا هنا المكان الوحيد اللي محدش هيشوفهم
عكس كل مرة ..بفكر في الموت أكتر من الحياه ومع ذلك أنا حابه الدنيا الحمدلله
عكس كل مرة بحاول ازعل منك عشان التوقيت مش عارفه  وحاسه إني بجد عايزه اشكرك بالذات عالتوقيت
عكس كل مرة أنا فعلا بحبك بكل افعالك المش مفهومه أو اللي أنا لوحدي فاهماها
وحتي لو بتمشي في اوقات مينفعش تمشي فيها
ومهما عملت ومهما قلت أنا عارفه إنك بني ادم طيب
ومهما قلت أنا عارفه اني بنيادمه طيبه أو مقدرش على الاقل اكون شريرة معاك وعارفه اني بشكل أو تاني ومهما حصل اني بانتمي ليك
مع إني مش شبهك
عكس كل مرة أنا عايزه اطمنك علي أنا كويسه جدا
عكس كل مرة أنا كويسه ودي حاجه مش مفهومه ..الحمدلله
؟؟هو أنا هموت يا ابو علي :(

فلاش

بما اني بني ادمه من الناس اللي مش عارفه بيسموهم ايه بالعربي بس بيقولوا عليهم visual
فأنا أول ماشوفت الصورة دي جت في دماغي مشاهد مش أفكار
#المشهد الاول
أنا لسه صاحيه من النوم  في يوم شمس اوي وسط اولاد كتير اوي في اوضح كل حاجه فيها ابيض بابتسم ابتسامه حلوه قوي وانا شايفه اصغر اولادنا نايم نفس نومتي .. وهو ييجي يصبح علي ونعد نغلس عالعيال عشان نلحق اليوم من اوله

#المشهد التاني
أنا سايقه عجله "أكيد ساعتها هابقي اتعلمت العجل " وباعمل سباق في  طريق كله شجر آه وتكون العجله بتاعتي وفيها سبت بشتري فيه ورد وفيها جرس وشرايط بينك وأنا لابسه ألوان ريترو من بتاعت السبعينات دي اخضر اصفر أو بابي كولرز

#المشهد التالت
أنا وانا قاعده في المكتبه الصغيرة بتاعتي"الركنه " و قاعده في ركن الحكايات ومتحمسه قوي وأنا باحكي الحكايه وبمثلها ولابسه لبس تنكري لساحره بيضاء وانا شايفه عيون الولاد متنحه من اللي انا بعمله ومتعلقه بي وأحس إنهم بجد مبسوطين ..
و هما مروحين عكس أول أما جم و سابوا مامتهم  يعيطوا بس عشان  هيمشو من عندي...حتي لو معنديش اولاد ساعتها هكون مبسوطه

#المشهد الرابع
كتب كتابي وناس كتييييييير مربعين عالارض واحنا كمان وأنا عيني مليانه دموع وعمالين يدعولنا بصوت عالي اوي "بارك الله لكما وبارك عليكما وجمع بينكما في خير "

#المشهد الخامس
في أول محاضرة هاديها في جامعة اجنبيه عن المرأة في الإسلام
أنا بحجابي زي ماهو ..

# أول توقيع لأول كتاب لي
وانا مرعوبه اوي..مش فاهمه خالص ..وفرحانه اوي اوي"أنا عارفه انكو هتقتلوني بس ده مش هيبقي دلوقتي غالبا
 بس استمروا في تشجيعكم لي :)


ملحوظه أنا لقيت التدوينه في دفاتر قديمه وهاسيبها زي ماهي بدون أي حذف أو اضافه ..:)

نفسي مرة اقرر اتهبل انكش شعري اطلع فوق السرير افتح ميوزيك هاي بيت واتنطط من غير ماالست الحاجه والدتي تدخل علي وتقولي كلمتها الشهيرة عوض علي عوض الصابرين يا رب
عامة الموضوع بقي روتيني ومعروف
بس  الفكرة إني  بالجأ للحاله دي غالبا لما بيكون جوايا مشاعر مش فاهماها ولا عارفاها
-ساعتها بس بقرر إني ارقص بصوت عالي-جوه اوضتي وو اقفل على نفسي بالمفتاح كمان متودوناش في داهيه
المهم
اني بحاول دلوقتي استرجعني "..بس المشكله اني بانهج ..بانهج  بجد ومن اقل مجهود "
بنهج لدرجة إني رجعت تاني اطلع اللي مش جوايا على ورق عشان مش قادره  ارقص رقصه بصوت عالي

خيوط (2) أفكار لم تخطر من قبل

بعد الازمات ,الحوادث ,بعد كل شيء
بتتكون عندنا حزمه من التجارب
 معرفش أنا لوحدي ولا كل الناس أنا مش بحس إني باكتسب خبرة من الأزمات أو الاوقات الصعبه بشكل عام
بس يا أما باخد بالي من التفاصيل المنسيه ..أو بشوف الصورة بشكل اوسع
دايما حاجه من الاتنين لكن لأ مبكتبسبش خبرات زي الناس التانيه لأ..

حكايه

خليني احكيلك عن قصة ظريفه1

كان يا ماكان كان في بنت..
البنت دي كل يوم كانت تخرج وتبص للسما.. دايما دايما كانت مستنيه الطيارة
دايما دايما بتتمني تجيلها طيارة بكل اللي بتحبهم أو على الاقل تاخدها عندهم
البنت دي كانت لسه صغيرة صغيرة قوي يمكن لسه مكانتش تعرف الحضانه
البنت زهقت تستني كل يوم الطيارة وتفضل تراقبها و لابتجيش
لحد مافي يوم قررت أن ده آخر يوم هتستني فيه طيارة
هي هاتبني طيارتها بنفسها وساعتها ماهتبقاش محتاجه من حد حاجه
كانت لوحدها ..كانت خايفه ..كانت محتاجه حد جمبها ..كانت محتاجه حد يساعدها
البنت الصغيرة كانت شاطرة في الرسم والحساب جابت الوانها ورسمت..
رسمت صديق
رسمته بعيون حزينه وضحكه هاديه وحنية الدنيا
صاحب البنت كان شاطر اوي ..كان عنده كل الحلول ..كان بيضحكها اوي اوي  وكان بيعرف كمان يبكيها بس مكنش بيعرف يزعلها
وعدها انه هيساعدها فحست إنها عايزه تفضل معاه بقيه عمرها وعدته لما تكبر لازم لازم هتتجوزه
عيونه حزينه مابتبينش فرحته من حزنه لكن هي عارفه انه فرح
هو عارف كل حاجه..عارف أكتر من كل اللي اتعلمته في حدود دنيتها الصغيره
وفي يوم سألته ..
-هو انت عارف حاجه مش عايز تقولهلي
=ماينفعش
-ماينفعش ايه؟ مينفعش نسافر, ولا مينفعش  نبقي صحاب ولا ماينفعش تساعدني؟؟
الولد ماردش عليها بس قالها انه ماينفعش
البنت فضلت حاسه إن في حاجه غلط بس مافهمتش هو ايه اللي مضايقه ايه اللي ممكن تكون عملته والاهم ايه اللي ممكن تعمله
فضلت كل يوم تجرب حاجه يوم تجرب تبقي هاديه جدا ويوم مطيعه جدا ويوم عصبيه جدا
كل يوم تفضل بشخصيه فضلت كده 30 يوم وكل يوم بشخصيه
لحد ماجت في يوم زهقت..
قالتلو أنا عايزه أعرف أنا ليه مانفعش ..اشمعني أنا مانفعش
ليه مش عايز تختارني ليه كلامك كله رموز  وليه مش عايزني معاك؟؟

الولد استغرب اوي باصلها ومافهمش ولا كلمه من كلامها ..بس حس إنها زعلانه بصلها بحنيه ومن غير كلام وسع لها مكان جمبه وقسم قالب الشيكولاته اتنين واداها الحته اللي بالبندق زي مابتحب
غمضت عنيها اوي اتنهدت تنهيده كبيرة  وبعدين فضلت ضحكت بصوت عالي اكلت حته شيكولاته وسندت على كتفه  

 قعدت جمبوا وفضلوا الاتنين يبحلقوا في السما جت طيارة وطيارة وطيارة وسوال واحد مش راضي يفرق دماغها
"هو ايه اللي ما ينفعش ..هو ليه ماينفعش ؟؟"

بكره لما الحلوة تبكر والقامه تتطول شبرين لما تمسك قلم ودفتر وتتدرس علم وعربى ودين ولما تكبر اكثر واكثر ويتتم ربى بالخير ولما نشوف الام الحلوة تحكى حكاية عن قلبين .

مشكلة !

مُشـــكلتها...

انَّـــــها تَظُن انها ســـبَّب مشاكل الكون كُلَّــهُ..

 يعني لو اتنين من صحابها اتخانقوا تبقي مشكلتها إنها ماصلحتش بينهم

ولو اتخانقت هي شخصيا يبقي أكيد ليها ذنب أصل أي مشكله بتحتاج طرفين خلاف 

لو قلت كلام في لحظه غضب مش مشكله اللي ادامها انه يستحملها بس مشكلتها إنها تتحكم في نفسها وتجيب بعد الاخر دايما آخر

  

ولو البلد ولعت ..مشكلتها إنها مش قايمه بدورها المجتمعي على اتم وجه

 و إنها ساعات بتزهق وبتقول إنها عايزه تمشي أو مش لاعبه .. لأ لأ مشكلتها اكبر

 مشكلتها انها سابت نفسها تحس بعدم الإنتماء من الاول 

لو حد مفهمهاش يبقي مشكلتها إنها معرفتش توصله أو تشرحله سواء كانت أفكار أراء معلومه أو حتي نفسها...ده إذا ماقنعتش نفسها إن ده كله ناتج إن هي اصلا مش فاهمه نفسها 

  ولو حد محبهاش ..مشكلتها إنها مش كويسه كفايه ولازم تحاول أكتر ..مش مع الشخص ..مع نفسها 

ازاي تطلبي من حد يحبك  وأنتي مش حباكي 

...مشكلتها إنها ـدايما بتشوف الحاجات اكبر من حجمها ..المبالغه الكوميديه 

يعني لو  حصل اشتباك  وحد اصر على رايه يبقي الموضوع انتهي

ولو البلد ولعت والبلطجه انتشرت واسعار الحاجه غليت عن التسعيرة الرسميه يبقي ده كله انفجار مجتمعي ناتج عن تجاهل الطبقات الفقيرة لسنين

وإن ده ذنبنا فماينفعش نتافف منه..ده الكلام اللي بتقوله بس من جواها دايما بتفضل حاجه تقولها شكلها باظت 

مشكلتها إنها مابتعرفش تتعامل مع المشاكل فبتهرب منها أو بتفضل تبرطم بكلام مش مفهوم غالبا بيربك الناس من حواليها  فتبتدي .....تحس بالذنب

تسكت ؟؟؟

...مابتسكتش  

.. انها بتحلل الامور بتفلسفها وبتفكر في النظرة الكلمه الحركه المشهد في دماغها بيتكرر ألف مرة

  مشكلتها الحقيقيه  انها محتارة في السكريبت أو في دورها ..بتتمرجح بين المخرج والممثل ودايما الناقد

...مشكلتها  

 إنها مشكلة مش عارفه هي تحلها

naked و nude

كان أول مرة  في الكليه أعرف الفرق بين ال naked وال nude

كان لازم نرسم كتير عشان نتعلم التشريح ومنه نتعلم حاجات كتير زي الارجنومكس والتحريك بعيدا عن فن الرسم نفسه 

كانوا بيتهموني بالجهل والتخلف والرجعيه لما باكسف ارسم nude واني بافضلفي دراستي للتشريح  ارسم naked
بعيدا عن الحرمانيه بس هي حاجه بالفطرة كده..فطرتي ماتحملتش

ال naked وال nude هتلاقيه بره الرسم  بيشكل حاجات كتير في حياتنا
الصراحه والوقاحه
العفويه والبذاءه
الواقعه والفضيحه

النود شيء مقرف ومثير للغثيان بالنسبه لي عالاقل خصوصا لو كان  الناكيد  بيوصل نفس الغرض
 ده رأيي ببساطه مهما وصفوني باني عندي مشاكل نفسيه

الرسم مش بس اللي بيبقي على ورق

فلو مضطر ترسم في دنيتك وأكيد هضطرك ظروفك في يوم من الايام تمسك فرشتك وتبتدي تدور في لوحتك الشخصيه عن مناطق الظل والنور  ...

ممكن تكشف الحقيقه وليك كل الحق والحرية من حقك تبقي صاحب فكر وقضيه ..بس اختار الطريقه مش لازم تبقي مثير للاشمئزاز مش لازم تجرح ناس حواليك

..مش لازم تبقي نود