جرّب تاني

ايه مظبطش النهارده ؟؟

ولا امبارح ؟

وأول كمان مكنش ولا بد

بقولك ايه روح أعمل مج قهوة كبير قوي وغرق فيه كل افكارك

هتلاقي فكرة واحده -غالبا هتكون ليها اولويه -قبت عالوش

خدها وركز فيها واسرح جواها

اطلع بحل

هات ورقة وقلم وأكتب هتعمل ايه من أول ماتخلص آخر بوء قهوة لحد ماتوصل للحل

خد نفس عميق اوي قبل ماتقوم من قعدتك دي

قول لنفسك بينك وبينك

أنا بالذات عندي أحلام ومهام اكبر من اني اضيعها

أنا بالذات مينفعش اكون غير واد جامد

بص لنفسك في المرايه بكل تناكه وقولك ..ايون أنا واد جامد

ااغسل الماج بتاعك ..وانسي معاه كل الافكار التانيه اللي عملالك استجماتيزم فكري

ركز بس أنك هتنجح في المهمه اللي حطتها لنفسك ..مهما كانت مستحيله

ادخل صلي وطول في آخر سجده وقول لربنا من قلبك أنك عارف إنك ولا حاجه لو هو مش معاك

اتمني منه يكون معاك

أتمنى منه لو بيها خير تظبط ولو بس المره دي ..
ولا اقولك خليك طماع
وبعد ماتقوم خليك واثق إنها مش أكتر من معادله
لو بتفكر فالنتايج ..
مش محتاجه منك غير أنك تظبط المعطيات
وادعيلي;):)

صباح جديد..

لا تتخيل اد ايه بنبسط لما تجيلي مكالمه تليفون غير متوقعه من حد بقالي كتير مسمعتش صوته

بتنتهي بيَّ دايما بحاله حماسه مفرطه...حماسه لي حاجه فكره جديده ..تدوينه ..جايز رسمه

مش عارفه أنا ليه بهتم بالعلاقة في حياتي بالشكل ده أنا من الناس اللي بيطلق عليهم

people oriented

بتأثر بالناس وبيأثروا في ..حاجات بسيطه بتنعشني جدا وبتنور يومي

زي ماحاجات صغيره قوي بتخوفني وبتجرحني

النهارده صحيت على صوت واحده صاحبتي من زمان مسمعتش صوتها

بغض النظر عن إنا فضلنا نتكلم ساعتين في موضوع شبه منتهي بس أنا استمتعت بس بسماع صوتها

وبيني وبينكم ساعات كنت بجادلها بس عشان اطول في الكلام

حسيت في صوتها بنبرة خوف كنت نسيته من مده

مش عشان أنا بقيت قويه ومبيهمنيش

بس عشان من مده جالي فقدان في الذاكره

مش فاكره حتى ده كان قرار إني أنسى ولا ده كان مجرد رد فعل طبيعي

طبيعي ان الجسم بعد فتره من الألم يبدأ يفرز مخدرات

في فرق كبير بين فقدان الذاكره والزهايمر وحاله التخدير

وفي كل الحالات دي أنا كل اللي هاممني إني مرتاحه

راحه جديره إنها تخليني ابقى أنا

أنا زي ماأنا حابه اكون

وتفضل الحاجات الصغيره والتفاصيل تفرحني

ايوه أنا عارفه إن يمكن تكون علاقتي بالناس غريبه جدا ..

طبيعي إن يكون كل الإنسان عنده دايرة أصحاب ومعارف وو الخ

وحاطط اولويات لناس عن ناس

بس الغريب أما يكون عندك دايرة واحده حاطط فيها كل الناس

كل واحد قريب بشكل معين ومفيش شكل مسيطر أو له اولويه عن التاني

كل واحد انت محتاجله بشكل معين

عامتا أنا عن نفسي بستمتع إني عندي حياة

حياة كل ركن فيها ليه بجد ريحه وطعم ولون مختلف

يمكن أنا محتاجه ده عشان أنا اصلا مليون شخصيه جوه بعض و أن ولا واحده فيهم تعرف التانيه

جايز...

اهم حاجه إني النهارده اتعلمت درس قديم قوي دايما بنساه

لوفي نجمه كنت حاطط عينك عليها امبارح شفتها ضلمت وبتقفل..متزعلش

استنى شويه غالبا هتلاقي مليون ورده مع شمس الصبح بتفتح

بس عشان تقولك أول ماتصحى من نومك

..صباح الخير

كسر حاجز

اصبحنا واصبح الملك لله...
أول ماصحيت النهارده صحيت واعدت مبحلقه لسقف الأوده يجي نص ساعه وانا على وشي ابتسامه مش عارفه افسر معناها
وفجأة هبيت من السرير وطلعت أشوف الشمس وهي لسه بتشاور عقلها تطلع ولا متطلعش
امبارح كان يوم صعب من اوله ولحد آخر ساعه فيه
يوم مليان مشاحنات ورسايل مقدرتش افك شفراتها وحجج ومبررات و.... الخ ,يوم مشحون زي مابيقولوا .
في أيام كده مابنصدق انها تخلص على خير عشان يبدا يوم جديد
يوم تقعد في اخره مبتعملش حاجه غير أنك بتناجي ربنا انه يطلعك من الدنيا دي على خير ويرحمك من ظلم أهلها لنفسهم قبل أي حد وتترجاه يكون راضي عنك ,تبدأ تشكي ليه كل اللي حصل النهارده وامبارح وأول .. تشكي من غير كلام وتدعي دعوه واحده
يا رب انت اعلم بيَّ من نفسي لو كان بي شر فاجرني منه وإن كان بي خير فـارحمني بيه ..
انت العليم الكريم والغفور والرحيم.

صباح الاحلام

صباح الخير ياااه ..بقالي كتير قوي محستش إني صاحية الصبح منتعشة كده ونفسي ومع إني مضغوطة جدا وورايا كمية حاجات لازم اقوم أعملها مش طبيعية بس فرحانة ....مج نسكافيه بالقرفة الخاص بالصباحات اللي من النوع ده;) والشباك اللي مدخل شمس دافية من ورا الستارة الشفافة ...

لأ لأ معقول كل دي هدايا عشاني الصبح مش فاضل غير إني أسمع اغنية اصحي يا دنيا بتاعت عفاف راضي-اد إيه بحب الست دي - والأغنية دي بالذات حساها متفصلة على النهارده اشغلها بقى و أبدأ يومي

تمام....كده مظبوط.......

صباح الخير يا دنيا..

ممممممم هحاول -بس موعدكيش يعني- ..بس هحاول أعمل هدنة معاكي عجبتني على فكرة هديتك الفجرية ;)...

أنا وصاحبتي أم عيون زرقا سايقين على طريق فاضي وسريع ومن الناحيتين خضرة وبنغني وبنضحك بصوت عالي و في وسط ما أنا مشغولة بالضحك الاقيها فجأة بتطلعلي سلسلة كريستال على شكل باليرينا.. اتنح فجأة وابصلها عشان اتاكد إني مابحلمش واحضنها حضن اد السما والبحر :D و اقولها كلمة واحدة بتقول كل حاجة ..

بحبك..

وحشتيني قوي قوي يا امو شوقي ..وحشتني يا واوا وأكتروأكتر....

وحشتيني قوي يا يمنى =)

>

>

>

اصحي يا دنياوقومي

يا دنياواسمعي ديك الصبح صديقك

خدي م الكزرونة الألامونية

لبن الصبح وغيري ريقك

اصحي ورشي علينا كولونياوخدينا معاكي ف طريقك......

http://www.4shared.com/file/63394932/68691f87/ishy_ya_donia.html?err=no-sess