تكبيرات العيد

اللهم بااارك
صوت التكبيرات سامعاه من الشارع ..

امنيات ليلة العيد

دايما عيد الأضحى عندي ومبهج ومشرق أكتر مش عارفه ليه؟
يمكن عشان ده العيد اللي تملي كنا بنسافر فيه عند جدو ونانا ولا عشان بييجي على شوقه زي مابيقولوا
أصل العيد الصغير بييجي بعد رمضان وانا أصلا مببقاش عايزه رمضان يخلص ..انما ده..
ده رايق كده وراسي و مش مستعجل ودايما بييجي في وقت صعب امتحانات ,ضغط شغل ..الخ
دايما بببقى حاسه بفرحته أكتر ..
دايما كنت متعوده إن فجر العيد ده هو وقت الأمنيات ..بعد الفجر في البلكونه اطلع مع نسمايه الفجريه وأقعد ادعي لحد ماأسمع التكبيرات والناس نازلين يصلوا وافرح قوي وانا شايفه جد واخد في ايده حفيده ورايحين يصلوا وهوه في طريقهم بيفهموا ليه كل الناس لابسين أبيض في أبيض وليه بقو بيسلموا على بعض بقلب وكأنهم يعرفوا بعض من سنين
السنه دي أكتر من كل سنه كان نفسي ادعي مع الحجاج على عرفه ..
أنا عارفه ان ربنا موجود في كل حته طبعا بس إحساسي إني ماشيه في مكه.. في نفس المكان اللي الرسول عليه الصلاة والسلام والصحابة والسلف الصالح ممكن جدا يكونوا مشيوا هنا أو قعدوا هناك ..ياااااه ربنا يكتبها لكل مريد:)
الأمنية التانية إن ربنا يخليلي أمي ويجعلني ابنه باره بيها و ليها ..ساعات بحس يا ماما إنك تستاهلي حد أحسن مني ..وساعات بأحس إن ربنا خلاني أنا بالذات بنتك ومش واحده اطيب وأحسن بس عشان تدخلي الجنه حدف.. كنوع من تكفير الذنوب :D
نفسي كمان اغمض عيني وافتح الاقي امبراطورية الياء المتمثله في اولاد أختي البوكلتن السغنتطين كبروا وبقوا طولي
يحيا بقى دكتور اسنان زي ماهوه عايز ويبقى عينيه بتشع ذكاء ويفضل ربنا مكمله بخجله اللي قلما بلاقيه في راجل...واهم حاجه يفضل بشهامته المعتاده وأما أنزل بيه نشتري حاجه يبصلي البصه اياها ويطلع مبلغ وقدره من جيبه (2 جنيه اللي ادتهوله تيته عشان يشبرأ نفسه بيهم )ويدفع هو.. اينعم مفيش حاجه للاسف يا يحيا دلوقتي باتنين جنيه بس أهو ..متتخيلش الموقف الرجولي اللي بعتبره فالزمن ده بطولي بيفرحني منك اد ايه بحس ساعتها إن حبيبي اللي مكملش 5 سنين راجل عليه القيمة:D مش زي اطفا....احم اقصد رجالة اليومين دول
أما الست يارا اللي ابتدت تتولد قصة حب من نوع مختلف معاها مؤخرا ..بيقولو عليكي نسخه مني في حركاتي وطريقة كلامي وحتى امصتي ..بتزعلي من الكلمه دي؟؟
أنا عارفه..و عارفه كمان إنك مش اماصه على فكرة إنتي بس حساسه وكرامتك بتنقح عليكي حبتين والناس بيفتكروا سكوتك أو محاولاتك لتهدئة الموقف واخد جنب ده أمص..معلش بكره تكبري وتعرفي إزاي تتصرفي في المواقف اللي زي دي.. إما بتجاهل الناس أو بانك تقنعي نفسك إنك الكبيره:D
نفسي ربنا يهون الدنيا علينا و يطلعنا منها على خير عشان احنا بقينا بجد وحشين قوي قوي مع بعض ومع نفسنا ..مبقاش حد طايق حد ومستنيله على غلطه ...
لكن ده مش موضوعنا دلوقتي المهم إن العيد جه وجايب معاه فرحه...استغلها إنك تفرح وتفرح اللي حواليك:)
أما بقى عن باقي الأمنيات ..فأنا هاحوشها لبكرة..:)
آخر حاجة .. بدعي ربنا يرضى علينا جميعا ويرحم امواتنا ويرزقنا جنات الفردوس ويلحقنا بالصالحيين ..آمين
وكل سنه وحضراتكم طيبين مع العيد والبلالين:D

مولد نجم

الاسم : مي علي (و ده مش اسم مركب ولا حاجة)ه

اسم الشهرة :ميو(مقصور فقط على مرتادي الحضانة والحضانات المجاورة)ه

محل الاقامة : نفس الحضانة على حافة الأحلام على ايدك اليمين وإنت داخل

....a believer :المهنة

مهن اخرى: ملهمتي الخاصة ..والطعم المسكر في حياتي

الحكاية :بدأت من سنة لما كانت بتقرالي شخبوطة من كتابها البمبي اياه

كان تعليقي الواحد ساعتها ........

"مي "علي سلامة" ؟؟!!!!!!!!!!ه..

دلوقتي و من غير رغي كتير..

.. هسيبكم مع حلم صغير اد الكف ترسمه لكم "مي علي"بألوانها الخاصة....

جدا...;)ه

يا مواطن يامصرى ركز...متخليش حد يلهيك لتتعكز
عالصبر و تقول ما أنا صابر..."صابر مخدش حقه... لحد ما عجز
متخليش حد يلهيك عن الواقع و يغمى عينيك...ويربطك فى ساقيته
و يقول انك انت اللى لوثت ميته!!! و يشغلك بماتش اتنين و تلاتة
و الحضرى راح سيون و رجع تاتاتاتا!! و عطية كسب فى الأكاديمية
و بص شوف الجزائريين ولاد الحرامية!!
لحد امتى هنفضل نقول اهرامات و اكتوبر كان انتصارات!
تاريخنا على عينى و على راسى بس مستقبلنا لسه مش باينله مراسى!
و مدام كل الشباب بيحب البلد... امال ليه حالنا لا عاجب بنت و لا ولد!
و صدقنى كلها يومين و تتغير الصورة و يلاقى حاجة جديدة و يقولك "شايف العصفورة؟؟!!"







يتبع ;).....ه


بيني وبينكم =) :- الصورة والمدونة من صفحات الطفلة المعجزة..."مي علي"ه

ديسمبر

..ديسمبر عند كل الناس
هو الدفاية والكرسي الهزاز وأباجورة نورها خافت ..مع مج كاكاو سخن وإنت بتقرا كتابك المفضل و ياسلام بقى لو بتسمع فيروز خصوصا "بكرة بييجي نيسان"ه

..ديسمبر عند كل الناس
يعني ساقعة و لبس تقيل وكوفيات حمرا وطبعا جري في شوارع المنيل تحت المطر وايس كريم في عز البرد

...ديسمبر عند حبة ناس
قعدة بنات في ليلة راس السنة ولمة على فيلم جديد وفيشار وبيجامات وتسريحات مجنونة وخناقة مخدات من اللي قلبك يحبها..

وعند ناس تانية

يعني التمشية علي كبري ستانلي الساعة 12 بليل وايدين متشبكه مع بعض ووشوش مش باين منها غير عيونه المليانة كلام دافي وخدود البنوتة الحمرا اللي عمرك ماهتعرف ده من برد الجو حواليها ولا من الدفا اللي بيزرعه في قلبها في كل مرة يقولها فيها .. بحبك
ممكن يكون ....

صورة أبيض واسود ووردة في كتاب عمرها مابتبدل حتى ولو بهتت ألوان الصورةوقدمت كمان وكمان ...إزاي تدبل وهي بترويها كل يوم بحكاية من حكاياتهم اللي بتحكيها تحت الشمسايةلأحفادها...

أو حتى ..
خصلات البنت البني اللي بيطيرها الهوا وهي قاعدة فالشباك مستنية بابا نويل اللي هتقوله اد ايه زعلانة منه عشان أمنية السنة اللي فاتت( اللي كلها عليها)-على حد قولها-وإنه لو مجاش السنة دي كمان هتبطل تستناه والمرة دي بجد وجد مش كلام وخلاص زي السنة اللي فاتت. .

ديسمبر ساعات
.. بيبقى مذاكرةوامتحانات نص السنةوضغط شغل وتقفيل حسابات السنة القديمة
وساعات تانية سهر وضحك حفلات وهدايا

ديسمبر عندي....
..ديسمبر عندي يعني زحمة وربكةودربكة جوايا وعزال
أيوه عزال
عزال سنة راحت بتطلعلي لسانها عالاحلام اللي ملحقتش تثبت وجودها ومفارق الطرق اللي خفت أمشي فيها.
وسنة جاية عاملة نفسها طيبة وحلوة جايبة معاها نوجة وسوداني سخن ومش بعيد أبوفروة وغزل البنات اللي بيغزل وانا ورا منه خيوط احداث جديدة وصحبة رايحة وصحبة جاية..
وغربة بتلفها من وقت للتاني لما تحس إنها مبقتش فاهمة كلامه ولا سكاته ولا وعوده ولا حتى عارفة تفسر النبرة الجديدة اللي بتلف صوته لما بينطق اسمها

ديسمبر عندي هو المجهول اللي بيستناه كل الناس هم اللي بيختاروا صفحاته ويرسموا ملامحه وخطواته
المجهول اللي بنفضل نحركه ونعاند معاه ويعند فينا و يسمعنا نفس الكلام ..بس بصيغ مختلفة ويعرفنا على نفس الوشوش في ظروف تانية
نفس عروسة الماريونيت اللي بنفرح بيها كل أول سنة ونفضل نحركها زي ما احنا عايزين وبعد 11 شهر بالتمام والكمال نرميها ونزهق منها ومن عمايلها معانا وحركاتها (النص كم) ونتمنى عروسة جديدة وتفضل الحقايق ثابته..
عشان ببساطة عرايس الماريونيت لا باديهم يضحكوا ولا يضحكونا
ملهاش ارادة ..
مفيهاش روح ...
مبتتحركش ...