هوامش حيه

وأكتبُ عنكِ بِلاداً ، ويحتَلّها الآخرون / وأرسُمُ فيكِ جَواداً ، ويَسرِقَهُ الآخَرون !

وأكتب وارسم
وأكتب وارسم
واكتب وارسم
وأكتب وارسم

وا تاري الكلام بيضلو كلام  وكل شئ بيخلص حتى الاحلام 
والايام بتبقى ايام  ....
والله معك يا هوانا ..

#فيروز ودرويش

شوية حاجات مش مهمه

 نفسي

اعرف ليه اتلغت حصة الدين
نفسي اعرف ليه صدقنا الجيش
  نفسي أعرف ليه معملناش ثورة من زمان
  نفسي أعرف ليه مش باسمع كلام امي ان  "صاحب بالين كداب "
 نفسي أعرف ليه باجل قرارات أنا عارفه اني هاخدها دلوقتي أو بعد حين
نفسي ابطل ابقي خوافة اوي كده خصوصا على نفسي وأكتر من نفسي 

نفسي

نرجع تاني نبعت كل يوم لبعض اطباق أكل مليانه ترجع مليانه زي جيران نانا
وبالمره نفتكر إنا جيران صحاب وحاجات كتير مينفعش يندرجوا تحت رمزين هلال وصليب وبس
نفسي ابطل اتفرج على فيلم شركة المرعبين المحدوده من غير مااعيط في الأخر ولا عند مشهد بو لما بتشوف المخوفاتي
نفسي أعرف كل واحد بيشوفني إزاي
نفسي يبقى عندي قوة خارقه ..أي قوة بس تكون ليها علاقه بالناس
نفسي اقول الكلام في وقتها بالذات  أما اكون مضايقه ..الكلام الصح في الوقت الصح 
أو عالاقل معدش افكر فيه مليون مره بالليل والاقي احلاها حلول وكلام
واقعد اقول  يا رتني
نفسي ابطل احب فيروز اوي كده
نفسي اخد مواقف حازمه..عشان الناس مش بتفهم أنك بتزعل ..إلا لما تكشر
عايزه اتعلم اكشر
نفسي اطير طيارة ورق وافضل باصلها وهي بتطير  من غير مااقع أو اخبط في حاجه
نفسي كان يبقي دمي خفيف أو صوتي حلو

نفسي اقول خبرنا امير الامراء بسرعه من غير متلخبط عشان كانوا بيغيظوني زمان ان الره عندي بايظه
نفسي افضل المواجهة علي الهرب
نفسي احب الكوسه عشان الرسول صلي الله عليه وسلم كان بيحبها
نفسي أما اسامح.. انسي .. أو انسي ومسامحش
احقق حلم الهارب والكاريه"كل صحابي القريبين عارفين الحلم ده "
نفسي ابطل اكون عارفه كل حاجه و ساكته..ولما حد يكدب علي ابتسم واقوله "انت كويس ".
نفسي أما حد يوجعني ازعق ..جامد وبصوت عالي..خصوصا أما يكون قاصد 
نفسي ابقي قدوة للمسلمات في يوم من الايام ..قدوة بجد مش نص قدوة

نفسي يبقي عندي اصرار عشان الحلم والاراده من غير اصرار بيبقي شيء قميء ومذري
نفسي أعرف ربنا أكتر.. ابقي فاهمه أكتر..و أمشي  الطرق للاخر
نفسي اطلع كنت صح ..
نفسي تطلع كنت صح..
نفسي يطلعوا غلط
نفسي لما ابقي ام سواء عايشه هنا أو في كندا ابني يقوللي انه فخور انه مصري
نفسي كلنا نعلن اسلامنا من جديد عن اقتناع ومش بس اسم في بطاقة وفي خلال 15 سنه يبقي" عمر بن عبد العزيز" رئيس مصر بيبحث الحلول المثلي لاستغلال فائض بيت المال
نفسي أعمل مكتبه فيها ركن للحكايات وأنا اللي احكيها
نفسي أما انشر أول كتاب حد غير متوقعه حضوره يدخل وأنا ابقي مش عارفه أعمل ايه.. اعيط ولا اضحك

نفسي ابقي منظمه في أفكاري
نفسي اتعلم الطبخ
نفسي افتح محل كاب كيك واجيب رضوي كل يوم تفطر عندي
نفسي أعمل معرض مميز ..
امضي أمضا حلوه
نفسي اروح الجنه
نفسي ابطل كلام

آخر خواطر 2011

#أشخاص 

!!لما حد يلومك علي كونك الشخص اللي انت عليه اعزمه
اعزمه يعيش حياتك 
بقدرتك انت علي الاحتمال 
بخلفيتك
و الاهم بنفس المشاعر
اديله ده كله هديه و سيبيه يتصرف
و اطلع اجدع منه و ماتلومهوش ...و استجدع زياده لو عندك طاقه وساعده لوجه الله !!
و سيب لربنا الحساب عشان لا هو من اختصاصك,ولا لسه جه وقته و لما ييجي صدقيني كلنا هنتساوي
وما حنبقاش فاضين نلوم أو نعاتب
ما هيفلحش فينا الا اللي هيقابله بقلب نضيف
و دول قليلين اوي!!
!وعامة اللي عايز يساعد مابيلومش ..بيساعد

كل سنه وانتم الطيب

‎#الاخير 

عارفه ان رضوي  صاحبتي هتقتلني بس ماعلينا :D

قعدت اتخيل لو مت؟؟ 

اوضتي هتتقفل 

وصندوق ذكرياتي 

الناس هتنسي شكلي 

وشويه بشويه شكل ضحكتي

ربطة ايشاربي 

الاكلات اللي بحبها

اللزمات اللي ماسكه في لساني 

بس هتفضل صفحتي عالفيس بوك مفتوحه 

تخيلت ان التايم لاين جه في وقته ايه يا ربي اللي حصل وممكن اكون عايزاه يتشاف وايه عايزه اخبيه وو و اسئله كتير حلها التايم لاين>>> شيفت -ديليت 

بس ده فكرني بصفحة تانيه مفتوحه من 22 سنه ومفيهاش تايم لاين اقدر اغير فيه !! 

كل حاجه فاتت لو أنا مش فاكرها فهي اتنست ..بس مااتمحتش !!

وكل حاجه فاكرها كويس.. وموجوده.. فهي هتفضل موجوده!!

ومش بس -بعد موتي -صحابي اللي عندي على البروفايل اللي هيشوفوها 

دي امه لا اله إلى الله "حرفيا "هيشوفو كل تفصيله في صفحتي دي 

صفحتي اللي عمرها 22 سنه واللي اكيد مش فاكره ليها تايم لاين محدد  

سيبك من الفرجه والجرسه والفضيحه 

دلوقتي أنا ممكن أكتب وامسح وحتي لو مت فصاحبتي معاها الباسورد هتقوم بالواجب وتظبتني ادعيه وبتاع.. 

طب ده في الصفحه اللي هنا !!

الصفحه اللي فوق لو مت محدش هيمسح ولا ها يعرف يظبتني- لو مش عامله اللي عليَّ- حتي بدعاء 

من غير لت وعجن لوكلوك كتير... 

المسحshift-del <<<باستغفار وتجديد توبه 

والتايم لاين بيتزحزح بالعمل أداء الميه النضيفه قوي

 رش على صفحتك ميه نضيفه جديده 

لو عدي 22 من عمرك  فمش فاضل في شبـابك زيهم 

يعني حسيت إني ماسكه العصاية من النص وذنبي على جنبي وجبيني 

ومش قادرة اطلع من دماغي دلوقتي 

قَدْ أَفْلَحَ مَنْ زَكَّاهَا وَقَدْ خَابَ مَنْ دَسَّاهَا

أقرأ كتابك كفى بنفسك اليوم عليك حسيباً ....

كل عام وانتم إلى الله اقرب وعلى طاعته ادوم 

بالله عليكم ادعولي معاكم برضي ربنا ورضي نفس وهدايه وثبات 

والجنه يعني :$:$

اللهم اني أشهدك اني قد غفرت مابيني وبين الناس جميعا فاغفر مابيني وبينك وتب علي أنك انت التواب 

اللهم اني أشهدك اني قد فوضت امري لك فانت حسبي ونعم الوكيل 

يا رب ملكني اليقين وحسن الظن والصبر حبك وحب ما قسمته لي من نصيب 

امين 

2012 افتح صفحه ومن أول السطر .

من آخر ستاتيوس في 2011 علي حسابي  الخاص بـالفيس بوك