الاثنين، 23 أبريل 2012



الحمدلله إن أنا "أنا "
فكر في كلامي كويس واعقله بص حواليك وجواك 
هتبص تلاقي نفسك تلقائي بتحمد ربنا إن انت أنت ومش أي حد تاني 
انت بكل عيوبك اللي عايز تغيرها وكل الصفات اللي بتشكلك اللي بتخليك فرحان منك وفخور بنفسك ومزقطط حبتين أو حتي اللي بتتغاظ منك فيها وبتبقي عايز تمسكك تعلمك الادب :D
بكل ظروفك اللي قدرت تتحملها عشان انت انت ومش حد تاني واللي الله اعلم لو كانت ظروف تانيه كنت عملت ايه أو كنت بقيت فين 
بكل حالاتك اللي بتعجبك واللي مش اد كده 
بصوتك الوحش وأنت بتاخد شاور بقهوتك اللي عمرك مابتعرف تظبطها 
بجنانك بعندك بحنيتك بطيبتك بذكائك وسرعة بديهتك اللي بعافيه شويتين 

عشان انت انت وعشان انت موجود هنا وعشان انت لسه في ايدك حركه وفي خلاياك نفس 
احمد ربنا انه خلقك أنت ..لانه خلقك نسخه مش متكرره 
نسخه اصليه بس مش ملكك هيجي يوم عليك وزي اللي قبلك هتسلمها 
حول تسلمها اصليه زايد عليها بصمتك وكرم أصل منك كمان بسمتك لكن ابدا مش تقليد 
لأن اللي خلقك ببساطه خلقك في أحسن تقويم .. وبس:)

بدون كلام!!


بشوف في ناس بتكتب ..لكني مابعلقش 
وناس كمان بتكدب وبرده ..مابعلقش 
وناس واخدينها قفش !
وناس مابتتفاهمش !!
وناس فاهمه القضيه 
وناس مالهمش ديه ..
وناس راحت ضحيه !
وناس دفعت ولادها لتمن حروب رقميه
كان عندي كلام كتير ..كلام فعلا كبير وباينه كان خطير

خدلك نفس عميق وابدأ وصلت زعيق !!

ولسه جايه أكتب وكلامي بيلاحقني
بس افتكرت انه ...
استشهد في الزحام
كان عنده كتير كلام
كان اخطر من كلامي كان ابلغ من زعيقي
وكان مسك الختام تذكرته للميدان
مش كومنت في قضيه في الاغلب مش قضيه
وهتاف بالطول والعرض على صفحات فيسبوكيه!!

تذكرته للتحرير قطعت طريق كلامي
كان آخر خط حروفي جملة "ميت شهيد "

حبست نفسي جوه ..و غلب صوتي السكات
علشان دم اللي مات
وعشان كل اللي فات
ولا كات ناقصاه ردودك ولا مستني الفصيح
حقه وصله في ساعتها فكر فيها بصحيح!!
أنا وانت لو مافقنا وبطلنا المزايده والعنف والسطحيه ومعاهم الشماته والعصبيه القبليه هنبقي في يوم ضحيه !!
إذا كنا يعني اصلا دلوقتي مش ضحيه ..
هسيب دماغي حرة وهقفل الصفحات
ومش هانسي اللي فات اصله اللي فات ده تعلب
وبيلف في ديوله لكن لساه مامات
وايوه ماهاتنازلش..ولا يوم هاقول معلش
لكن دلوقتي هاسكت واتفرج و ماعلقش ...