حكايه

خليني احكيلك عن قصة ظريفه1

كان يا ماكان كان في بنت..
البنت دي كل يوم كانت تخرج وتبص للسما.. دايما دايما كانت مستنيه الطيارة
دايما دايما بتتمني تجيلها طيارة بكل اللي بتحبهم أو على الاقل تاخدها عندهم
البنت دي كانت لسه صغيرة صغيرة قوي يمكن لسه مكانتش تعرف الحضانه
البنت زهقت تستني كل يوم الطيارة وتفضل تراقبها و لابتجيش
لحد مافي يوم قررت أن ده آخر يوم هتستني فيه طيارة
هي هاتبني طيارتها بنفسها وساعتها ماهتبقاش محتاجه من حد حاجه
كانت لوحدها ..كانت خايفه ..كانت محتاجه حد جمبها ..كانت محتاجه حد يساعدها
البنت الصغيرة كانت شاطرة في الرسم والحساب جابت الوانها ورسمت..
رسمت صديق
رسمته بعيون حزينه وضحكه هاديه وحنية الدنيا
صاحب البنت كان شاطر اوي ..كان عنده كل الحلول ..كان بيضحكها اوي اوي  وكان بيعرف كمان يبكيها بس مكنش بيعرف يزعلها
وعدها انه هيساعدها فحست إنها عايزه تفضل معاه بقيه عمرها وعدته لما تكبر لازم لازم هتتجوزه
عيونه حزينه مابتبينش فرحته من حزنه لكن هي عارفه انه فرح
هو عارف كل حاجه..عارف أكتر من كل اللي اتعلمته في حدود دنيتها الصغيره
وفي يوم سألته ..
-هو انت عارف حاجه مش عايز تقولهلي
=ماينفعش
-ماينفعش ايه؟ مينفعش نسافر, ولا مينفعش  نبقي صحاب ولا ماينفعش تساعدني؟؟
الولد ماردش عليها بس قالها انه ماينفعش
البنت فضلت حاسه إن في حاجه غلط بس مافهمتش هو ايه اللي مضايقه ايه اللي ممكن تكون عملته والاهم ايه اللي ممكن تعمله
فضلت كل يوم تجرب حاجه يوم تجرب تبقي هاديه جدا ويوم مطيعه جدا ويوم عصبيه جدا
كل يوم تفضل بشخصيه فضلت كده 30 يوم وكل يوم بشخصيه
لحد ماجت في يوم زهقت..
قالتلو أنا عايزه أعرف أنا ليه مانفعش ..اشمعني أنا مانفعش
ليه مش عايز تختارني ليه كلامك كله رموز  وليه مش عايزني معاك؟؟

الولد استغرب اوي باصلها ومافهمش ولا كلمه من كلامها ..بس حس إنها زعلانه بصلها بحنيه ومن غير كلام وسع لها مكان جمبه وقسم قالب الشيكولاته اتنين واداها الحته اللي بالبندق زي مابتحب
غمضت عنيها اوي اتنهدت تنهيده كبيرة  وبعدين فضلت ضحكت بصوت عالي اكلت حته شيكولاته وسندت على كتفه  

 قعدت جمبوا وفضلوا الاتنين يبحلقوا في السما جت طيارة وطيارة وطيارة وسوال واحد مش راضي يفرق دماغها
"هو ايه اللي ما ينفعش ..هو ليه ماينفعش ؟؟"

بكره لما الحلوة تبكر والقامه تتطول شبرين لما تمسك قلم ودفتر وتتدرس علم وعربى ودين ولما تكبر اكثر واكثر ويتتم ربى بالخير ولما نشوف الام الحلوة تحكى حكاية عن قلبين .