ايه حصل

ايه حصل ؟؟

  كل يوم اصحي واتنهد واقول خلاص نسيت  

!! هارجع ليومي العادي تاني والحمدلله أهِي عدت الازمه 

فنجان القهوة ..الإبتسامه.. الأغاني والروتين وضحكتين  مالهمش لازمه

واقول خلاص عادي .. هانسي زي اللي اتنسوا وهيتنسوا 

هتروح آهاتنا وسط السكات..

وزي العاده يتبح صوت الأمنيات يطلع محشرج.. إن طلع

  مع فجر غايم بلا ندا..بلا  رضا ..بلا ضحكة الغالي اللي مات 

 يرجع صداه ينده علينا يصحي فينا حلم  كان اصبح رفات 

لكن طاوعني ..كل ده تمثيل فشوش

كومبارس فاشل يبتسم تنسلخ من تحت وشه الدمعتين وماينزلوش 

حتي الوشوش الخايفه مش هي الوشوش 

الخوف زهق منهـا وهرب في عتم ليل الصبح مش طالع عليه وسابها للي مايختشوش  

واقول خلاص  عادي هانسي زي اللي اتنسوا وهيتنسوا 

و عادي يعني هننام ونصحي ننسي اللي فات يترص جمب الذكريات

لكن في آخر يومي بارجع ابكي بحرقة  يتوجع قلبي بضمير عاللي مات

اصله مات من غير مراجعة درس احصا وحصتين عربي وحساب 

اصله مش زي اللي كانو..

 مالحقش يعني يكونله فكر ابقي ضده

ولا كان له لغوه مش فاهمها وحقي أصده

ده الحلم كان بيتبني في بسمة عنيه..مين جاله قلب في يوم يهده 

جاي وبتسأل ايه حصل  ؟؟

هو غدر وجمبه نقطه.

وام ماسكه صورة للغالي وصوت سكون وضحكه سافرت  والسجون مابتتمليش 

لساك بتسأل ايه حصل 

  أصل الحكايه ما تتحكيش  ....اقولك ؟؟

مفيش ..

مصطفي  كان أول وجع شخصي بالنسبه لي أول وجع يدخل بيت أنا عارفاه 

أول وجع اشوفه في عيون بعزها 

مصطفي عند اللي ارحم مننا احسبه في الجنه ومش خايفه عليه 

أنا خايفه بس على قلب الام اللي لسه محروق وناره مش هتبرد صحيح 

بس يمكن تهدي بالقصاص

فعلا ولكم في القصاص حياة..

ولما غاب مفضلش غير الموت 

كل اللي طالباه تدعوا لمصطفي ويصبر اهله عشان احنا هننسي  وهنام ونصحي عادي 

بس هما ما هيناموش ..

اللهم ادخله جنتك واربط على قلب امه وهبها من عندك الصبر والسلوان