ماتصدقيش

ما تصدقيش انه حبك انت وبعد حبك قلبه مات .
ما تصدقيش ..
لو حكالك عالآهات ,اللي فات, والذكريات

لو شكالك مالزمن, مالوجع ,من ريحتك الساكنه فضلوعه.. 

لو بكالك في الليالي, لو كتبلك الأغاني, لو رسملك كل صورة وحطلك فوقيها طابع تنطبع فوقه المعاني
دي معاني كالحه, ماسخه ,مالحه ..ماتروكيش .

ماتصدقيش انه حجر !! وانه مش باين عليه  بس  ان  خطيتي قلبه هتلاقيه بينكوي بانين عنيكي
ماتصدقيش دمعت عنيه لما يقولك وقتها دي كات ظروف...
ده أنا كات  دموعي حبستها ولا انها تجري قصادك ..وأنتي واقفه, ساكته ,خايفه حتي عجزي ماهمكيش!!
بس فاكر صوت بكاكي كان بيصرخ صرخه بتقطع كياني ما أنتي عارفه.. متكدبيش !!

ماتصدقيش انه كان بيتوجع وهو بيسيبك زمان ...
ماتصدقيش انه يعني كان بطل لو قام وعاتبك عالفراق
لو قالك انه ده القدر وفهمك انه السعاده كانت معاكي
وانه كان حاسس هواكي كنتي حاجه مفرحا ومفرحاكي
 وانه ساعة يوم مافارقك كان خايف إنك أنتي تمشي  لقلبه -تاني -ماترجعيش

ماتصدقيش لو قالك كنتي صغيرة مافهمتيهوش
وانه كبير ..كبير اوي ....وإن الكبار مبيغلطوش

لو قال عليكي اتامصتي وقتها وهو كان مستني شوفتك ..وأنتي قاسيه ماحنتيش ..
ماتصدقيش ....

وماتزعليش
ماتزعليش على قلب كنتي له بدل ....
بدل الفراغ بدل اللي خان بدل اللي كان... بدل الندم!

ماتزعليش على قلب عمره ماكان شاريكي واسألي ..
مش برده اللي بيشتري بيبان عليه ؟!
مش يعني اللي يحب ده بتلمع عنيه؟!
مش هو اللي بيندبح وإن كان نزيفه مكتوم مكدوم جوه روحه ..بيبان على وشه الالم طب يخطفه  في نوبه الحنين أو حتي  بيحس بندم؟!
ولا اقولك اسكتي  و متسأليش

واوعاكي مرة تندمي..
ماتندميش  لو شفتيه صدفة في شوارعكو القديمه ,لو عترتي في كلمه سابها عالشجر أو في صورة  طيف ظلاله عالرصيف
ماتندميش في كل وقت تحني فيه.. وانه حتي إن كان مثالي.. بس خالي خان امانتك..
كداب ومش طيب اناني ...سرق ابتسامتك
هو طبعه الكدب وهيفضل بطبعه
وانتيمن جواكي عارفه لا ده جري ولا ده اللي كان  افتكريمني  كلمه و دوريها في كل مرة يحن قلبك..مش بلومك مش بعاتبك
 انا زيي زيك  بس هو اللي زيه   .." ماحبكيش "




الكلام اللي فوق ده  رد على قصيده"ماتزعليش " هشام الجخ أنا يمكن مش من اشد معجبيه بس القصيده ادبيا حلوه جدا بس برده مش مقتنعه بيها لقيتها في نوته قديمه وقررت انزلها دلوقتي  واهديها ليكي ..ليكي انت بالذات :))
http://www.youtube.com/watch?v=yPj-4ORufQw&feature=related