بتقول كلام ..
الشوارع القديمه بتتنهد وتتنكد وتتندم وتتحسر
عاللي كان ..واللي راحوا ومرجعوش زمان
وع قليل الاصل والخاين والجبان.. واللي للعشره ما صان
زي كل الكبار الذكريات بتشكل حاضر ومستقبل لهم ..
عالحيطان تتركن مليون حكايه ..اسمعلهم
هنا اتعشوا وهنا اتمشوا وهنا أما تعبوا سابوا كل حاجه تضرب وتقلب وهربوا لدنيا تانيه بعيده
سهله بسيطه ..دنيا فيها بيت صغير في شارع ..ضيق صحيح ؟؟
مش مهم ..المهم البيت والمشربيه والصحه والستر ..رضا.. احنا هننهب ؟؟هيقولولك بابتسامه
بس عمك رضا هلك.. زهق ..خلقه ضاق صبح عنيد و العناد طبع متأصل زيه زي طبع كل حاجه حلوه بقت بعيد
طبع الشوارع ياللي عماله تضيق ونفسها كل يوم عن اللي قبله يضيق والروماتيزم هادد حيلها والسحابه السودة مش راحمه عجْزّها ولا شفع لها صبر سنين بتعدي على عمرها
والسوس بينخر في الاصل والأساسات ..
ولو الاصل اتمحي ايه يبقي مالحكايات
أسمع كده ..
بتأن ؟؟
طلب مساعده ده ولا حلاوة روح .. تقدر تفرق ؟؟..تفهم؟
الشوارع عايزه حد يحس بيها حد يفهم لغوتها ..يراضيها
حد مالاخر يطبطب عليها
شوارعنا روحها حلوه ..
حلوه فعلا !! ..بس احنا روحنا فين ؟؟!
احنا شوارعنا القديمه احنا حكايتها ..احنا الروايه واحنا الاصل والغايه وعلامة الوصل
والمبتدأ والخبر عندنا وبيننا ومننا
ولو مش فاهمين لغتنا مين يقدر يترجملنا ؟؟
مين اللي اصلا كان فاهمنا مين يهمه امرنا
احنا الاحلام اللي اتمحت والقضية اللي اتنست احنا الهوايه والهويه ..
احنا اللي كنا واللي ثرنا واللي قمنا ولما قولنا ...وقفنا الدنيا بحالها وحلفنا تاني منقعدهاش
معقوله كل ده كان ببلاش ؟؟!
احنا اللي بادينا نننسي الشوارع وحكايتها أو نحس بيها ..نسمعلها ونرد عليها نندهلها نقولها
أنتي احنا واحنا الوطن والوطن مش كلمه في نشيد
أنتي احنا واحنا مش ناويين نتوه ..مش هنتغرب مش من أول الشريط هنعيد
أنتي احنا واحنا الوطن آه ..والوطن مش حيطان....
جايز أمان ..كلمه في ميدان ..وحده طريق !!
الوطن شارع نهايته بيت كبير ...متفرع صحيح
ميت ألف شارع وحاره و مدق و ميدان
بس اخره الكل شايفه من بعيد ..اخره واضح يمكن مش سهل ..مش قصير ..مش مسفلت
بس واضح ..وفنهايته البيت
أنا نفسي حكاية لسه بتتكتب ..حلم بنت صغيرة كل همها في يوم ..
تلقي طعم البيت من جديد ..
0 التعليقات:
إرسال تعليق