فيلم اسفة ارفض الطلاق  من الافلام القليله اللي كان مسموح لنا  بفترة مراهقتنا ان نشاهد حيث ان بفترة طفولتنا لم نشاهد الافلام الاجتماعيه من الاصل
الحقيقة إن كل الناس كانت بتشوف الفيلم وتتعاطف مع القضية وتتصعب على الزوجه
في الوقت اللي كنت بشوف  شخصية الزوجه هنا بمنتهي القوة اللي في الدنيا
قوة مش بتبقي موجوده عند كتير مننا
 كل مرة بيتعرض الفيلم بنعد أنا وستات وبنات  العيله كلها نتخانق كلهم شايفين إن هو مايستاهلش وإن بكرة ربنا يعوضها باحسن منه ومكانش المفروض تجري وراه  وإن الموضوع ده مش منطقي  لو واحد جه  قالك مش عايزك ابسط حاجه وأحسن حاجه هتعمليها أنك تفتحي له  الباب
في حين اني  كنت بشوف دايما إني لو مكان "مني" بطلة الفيلم هاعمل زيها حتي  لو اتحطيت
 في الموقف ده ميت مرة بس على شرط إني ابقي فعلا بنفس الظروف اللي هي كانت فيها
أنا عمري ماصعبت علي مني  مش عارفه ليه يمكن عشان أنا بابصلها من جانب مختلف
دي واحده واثقة من نفسها بشكل غريب واثقة إنها راعت ربنا في زوجها وبيتها واولادها وواثقة ان أي غلطه اكيد مكنتش مقصوده أو نتجه عن سوء" فهم ,واثقة في نظرتها واحساسها ..واثقة إن البني ادم اللي عاشت معاه عشر سنين وشاركها احلي لحظات حياتها مش بنيادم وحش مش عايز يأذيهاواثقة  انه مكدبش عليها وانه لما كان بيقولها  انه بيحبها كان فعلا بيحبها ولما قرر تبقي هي ام بنته كان واثق انهم هيكملوا بقي عمرهم سوا
ممكن يكون نسي حاجات ماياما بيضرب فلاش نور في عنينا بنزغلل ونتخبط شوية وبعدها بنرجع نمشي في طريقنا عادي
..  هي كانت واثقة فيه!! وفي نفسها وفي ربنا قبل أي حاجه
واثقة إن من حقها تعرف ايه اللي حصل !! وإن لو في قرار هيتاخد من حقها تكون مشاركة فيه
واثقة إنها طرف نزاع ومادام هيقع عليها الضرر يبقي على الكل من حقها تكون فاهمه من ابسط حقوقها في الحقيقة

أكتر الم كنت بحس بيه في المشاهد اللي الناس بيلوموها وساعات  بتوصل للقذف العلنيوحتي أهلها قرروا يقاطعوها لحد ماترجع لعقلها وتبطل تسيء لسمعة العيله
يتهموها بالجرأة والتلامه وانها راميه نفسها على راجل فضل يعيش بعيد عنها
وهي بتسكت.. مش عشان مفيش كلام ..بس عشان هم عمرهم ماهيفهموا  هي بتتكلم لغة مختلفه جدا

لحد ما هو نفسه بيجي بمنتهى الغرور يطلب  إنها تبطل اللي هي بتعمله ده وإنها تحافظ كرامتها وماء وجهها
وإن ده بيرضي غروره طبعا بس هوبيتكلم عليها وانه ميرضلهاش بالبهدله اللي هي بتبهدلها لنفسها دي
مع إن دي اللحظه اللي مفروض تقول عداه العيب الراجل بس ده أول مشهد بكرهه فيه وبحس فعلا  بانه مش بيخفف عنها بالعكس ده تعالي وغرور بين
ساعتها بتبصله وعنيها بتقوله " أنت بجد مش فاهم ؟؟يعني أنا ممكن فعلا اكون اتخدعت فيك للدرجه دي
هو أنا بس اللي فاهمه ولا أنا الوحيده اللي مضحوك عليها؟؟
هو انت بجد متألم مني ولا احساسك بالذنب عشان صعبانه عليك أبتدي ينقح عليك
الأهم هو  الشخص اللي حبيته وعرفته وعنيه اتملت مبقتش شايفه غيره في عمري يستاهل؟؟
الشخص اللي جبت منه بنتي وكان أحسن اب وكنت بتمناله الرضا وكنت باسعده بكل طريقة اعرفها أو معرفهاش يستاهل؟؟
..طبيعي انهم يشوفوني زي ماهم عايزين يشوفوني
طبيعي يشوفوني راميه نفسي عليك عشان هم عمرهم ماكان بينهم اللي بيننا
...لكن انت ؟؟
ساعتها بيمشي ويسيبها
!ده مش الحوار المكتوب بد ده الحوار اللي أنا بقراه في عنيها واللي هوبيهرب منه في اخره المشهد وبيسيبلها البيت ..تاني

في الاخر هي بتخسر القضيه قدام المحكمه في الوقت اللي هو فيه بيراجع نفسه عشان في النهايه جبل الإنسان انه يراجع نفسه
أو ربنا يحطه في مكان الشخص ده عشان يرجع يشوف الناس اللي نسيهم في حياته وسابهم وراه
!!وبيرجع
النهايه كانت مفتوحه زي أفكاري بالظبط
..ساعتها الفيلم انتهي
علي كلمتها
اللي ضاع  أنا معرفش ارجعه إزاي ...
اللي ضاع احساسي بالامان..