"الحلقة الرابعة " الإيميل السحري

سكت للحظة ومع إن السوال مش غريب بس مش عارفه ليه لقيت عقلي فاضي ..مفيهوش حاجه  يعني لا رفض ولا هروب ولا
 !!موافقة على كلام عبير..أو  حتي تفكير فيه ..صحرا كده
عبير :يا سلااام ..هتعملي فيها رومانسيه دلوقتي بقى؟؟
أنا : على فكرة لأ بس دماغي راحت لحته جديده ..تصدقي يا عبير إني أصلا معرفش معني محدد للحب ومتبصليش كده أنا شايفاكي
 بس فعلا لو فكرتي فيها هتلاقي إننا مبنعرفش معني الحب غير لما بنصادف حب تاني
خليني افهمك ..فاكرة سامح ابن خالتك لما كنتي بتعدي تحكيلي عنه وعن اد ايه أنتي بتحبيه والدموع والاغاني  و..و..و و
لكن بعد شويه اكتشفتي  إن الحب مش أغاني ولا عياط وإن سامح اصلا ماكانش حب حياتك ولا حاجه زي ماكنتي فاكرة
وبعدها فاكره  أول مره شفتي دكتور حسين .. لما قلتي إنك مش هتقبلي بزوج غيره أو يبقى نسخه منه عالاقل
 عبير :ايوه يا حبيبتي بس كل ده اعجاب انما الحب بنعرفه أو بنحس بيه أول ما بنقابله
أنا :بصي يا عبير إنتي عارفه أنا عمري ماكان ليه في الحاجات دي خالص ولا عمري اصلا فكرت إني ممكن في يوم من الايام يكون ليَّ
عبير :لأ ثانيه واحده حاجات ايه  الحب مش عيب ولا حرام يا جوجو
أنا:أنا  مقلتش كده بس أنا بالذات مش نازله بالكتالوج ده ...أنا العلاقات عامتا بالنسبالي حاجه معقده جدا ومبعرفش اتعامل معاها اطلاقا يعني من الاخر محتاجه معامله خاصة جدا اعتبريني  إني طفله وعامله كبيرة أو واحده كبيره وعايشه في دور العيله
يعني تركيبه ملعبكه وميتهيأليش حد ممكن يفهمها ولا عايزه حد يفهمها أنا عايزه انجح في حياتي وعندي حاجات كتير محتاجه أعملها
وأحلام وو
عبير :هو أنتي مش واخده بالك برده إنك هربتي من السؤال أنا سؤالي كان واضح وبسيط ثم إن متقنعنيش إن تعلقك بعلي ده تعلق بريء
أنا : بصي يا عبير مع إني مش متعوده على دور الراوي ده اتعودت  دايما اسمعكم ومتخيلتش اني قعد وأنا اللي أحكي في يوم بس ماعلينا
أنا هريحك ..
أنا علي بالنسبالي فكرة حلوه
أنا من صغري  علي أول ولد عرفته قبل مااستاذ عادل اخويا يشرف طبعا
 ..وكنت بحس دايما انه مسئول عني ..انه بيخاف علي وانه بيحبني
  مش بيحبني حب زي بتاع الافلام لأ بيحبني حب بريء ونقي بغض النظر إننا فضلنا بعدها سنين كتير قوي مبنتكلمش يمكن لحد ماكبرنا وده بقي مش عارفه له سبب لحد دلوقتي وطبعا ماجتليش الجرأة إني اسأله
ده غير إن علي مثال الشاب المثالي بالنسبالي
متحمل لمسئوليه امه بعد وفاة باباه عارف هو عاوز ايه ..ملتزم دينيا واخلاقيا وده مش كتير هتلاقيه واهم من ده كله انه مش راجل كده
عبير : نعم ؟؟!!
  أنا :سيبيني اكملك من فضلك ..قصدي مش راجل شرقي  ..مش عارفه افهمك بس بحسه بيحترم يعني ايه واحده ست زي أي راجل اوروبي وفي نفس الوقت بيغير عليها مش كله عالبحري كده  زي بتوع بره .
عبير: ..ايوه يا ماما ..يا نهارك ابيض  يا انجي إنتي خلتيني اسرح معاكي في اشعارك عن سي علي بتاعك ده ونستيني خالص العريس اللي جي واللي غالبا هطلعله بالبيجاما ده  متناميش بدري بقي عشان ابقى احكيلك ونضحك سوى ماالنهارده المساء والسهرة بقي وأنتي كمان افتكري كل التفاصيل المره دي بقي
 أنا :لأ إن شاء الله المره دي هيكونوا ضيوف بجد يعني عشا وعصير ودمتم  يالله هدعيلك وأنا هاروح اخلص البحث اللي كان ورايا قبل ماضيوف ماما يشرفو
تن تن ..قلبي اتنفض مع صوت الايميل وخصوصا أما عيني طرفت للمرسل
!!!" لأ اكيد أنا بعيش حالة هذيان مبكر" علي
 !!!هو يعرف ايميلي منين؟؟!! هو اصلا كان سمعني وانا بكلمه
معقول يكون ايميل عن طريق الغلط ؟؟!
ساعتها اتغظت من نفسي وقررت اعنفني >>طب ايه رايك تفتحي الميل وتشوفي بيقول ايه وقتها هنعرف كل حاجه ؟

سلام عليكم .. في انتظار الايميل>>
<<شكرا
بعد حالة الذهول والتتنيح والذي منه اللي اصبت  بيها الحمدلله إن امي الحبيبه كانت هنا عشان تفوقني على صوتها الحنين
انجي فاضل ربع ساعة وطنطك ميمي تكون تحت البيت والله أما كنتي لجاهزة في خلال عشر دقايق بالظبط مش هيحصلك طيب  ..مفهوم

 لو  عايز تعرف أصل الحكايه من هنا http://bentbdffayer.blogspot.com/2010/09/blog-post_08.html
وهنا http://bentbdffayer.blogspot.com/2010/01/blog-post_25.html
وكمان هنا http://bentbdffayer.blogspot.com/2010/01/blog-post_6267.html