بعيدا عن ذلك الصخب كنت اتشوق لتناول كوب من القهوة بالشيكولاته الغنيه والتغيب عن العالم للحظه فقط قبل استئناف موجه اخري من الضغوط  الحياتيه المقيته .

بعيدا عن تلك النصائح القيمه للغايه بالترفع ووعودي ..حسنا!! ..اشتقت لسماع صوتك  فتحدثت ..

بعيدا عن تلك الحميه القاسيه  استرقت بضع رقائق البطاطا وارتديت شالي الموهير الدافيء المفضل وسمحت لذلك المقعد الوثير باحتوائي  ومشاهده فيلمنا الكلاسيكي المفضل .

بعيدا عن كل توقعاتي لم اتعرف عليك حينها  ..لم اجدك سعيدا لم اجد الكلمات المناسبه لم اجد ما افتقده بحق ! 

بعيدا عن كل المبررات ..التمست لك واحدا.

بعيدا عن كل الاخبار لم اكن اريد سوي سماع اخبارك ..لم اكن اود الثرثرة ولا اقتطاف بعض الحكايات المبتورة عني 

بعيدا عن كل تلك الفوضي والجمل والأصوات المكتومه والاولويات الاخري والكلمات المقتضبه ..اوجعتني حقيقة عدم افتقادك اياي  وان كنت اقدرها فقط وددت لو فهمت ماوراء كلماتي مثل كل مرة ..فقط تلك المرة  

بعيدا عن كل تلك المساحه  وبعيدا عن نظرياتهم وعقلانيتك وعن كل تلك الامور لا اوافقك الرأي على غير العاده 

انت مخطيء تلك المرة مخطيء تماما ..

بعيدا عن كل تلك الابعاد وكل تلك التعقيدات افتقد مراجعتك لنفسك ,افتقد عالمنا الصغير ...

دعك من كل ذلك الحديث فقط افتقدك  ..افتقدك جدا ..افتقدك حدا لم يسبق لي اجتيازه .

-لسبب ما بقيت بحب الاحساس بالبرد !
=مش عارفه
-لسبب ما بقيت مابحبش أحكي حاجه لحد
"بهرب من كل حاجه وكل حد '
=عادي
-لسبب ما مبقيتش بحب دور الضحيه
=حقيقه
-لسبب ما مبقتش بكتب عشان حد ولا بكتب قصاد حد
بكتب لنفسي
=جميل
-لسبب ما مش عاجبني تعليقاتك على كل كلمه اقولها
= "....."
-لسبب ماسكوتك بيخوفني ...

=تحبي اقولك رأيي
-ممممم
=أنتي بتعملي دلوقتي مجنونه ومتناقضه عشان تثبتي وجهة نظر فيكي انتي عارفه كويس انها مش حقيقيه وتطلعي نفسك ضحيه ومش عارفه أنتي عايزه ايه  أو بالاصح تثبتي لنفسك ان عندهم حق فتصالحيهم زي ماخصمتيهم بينك وبينك "كالعاده "

أنتي مبتحبيش البرد ..إنتي بس مبقاش في حاجه بتدفيكي كويس !

أنتي لسه بتحبي تحكي بس مفيش حد بيسمع من غير مايصدر احكام..فالسكات اسهل بكتير من التبرير!

أنتي عمرك ماحبيتي دور الضحيه أنتي بس بتضحي بشكل سخيف في حاجات  مفيهاش تضحيه !
 فهمي الناس حجم المشكله  وواجهيهم بيها  قوليلهم ايه وليه بيوجعك وعشان ايه وقوليلهم ان حتي لو مفهمتوش مش مشكله ده بيوجعني وده كفايه ..لاني أنا كمان بخاف اوجعكم ..بخاف اوي ولو مفهمهوش يبقي متعمليش حاجه..  خلصت  .

أما عن الكتابه فماتكدبيش أنتي مابقتيش بتنشري حاجه بس لسه بتكتبي وبتكتبي أكتر من الاول واحلي كمان أنا بقرالك
أنتي بطلتي تكتبي عشان تقللي سقف الطموحات
"امتي هتنزلي كتاب ,امتي هتنشري في مجله , امتي , امتي ,امتي ...." مش عايزه تحبطي حد ولا حد يكون حمل عليكي
بالعكس أنا شايفه إنك دلوقتي بتكتبي عشان أنتي بتحبي الكتابه ..من الاخر بتعمللي اللي نفسك فيه  !

وتعليقي مش هايقدم ولا هيأخر احنا الاتنين في جبهه واحده فمش فارقه ..كده كده أنتي بتهربي من أي مواجهة !

أما بقي بالنسبه لسكوتي ...عندك حق أنا وأنتي أما بنسكت بنخوف  بس كلامنا كمان مش بيحل... بيوجع !

قوة الحضن "Hug power "

الحضن بالنسبه لي حاجه مهمه
ساعات الكلام بيبقي حضن ودايما الحد بيقول كلام
الحضن اهم عندي من كلام كتير يتقال أو حتي يقف في الزور وميتقالش وساعات كمان  اهم من النظرات في الترتيب بس الحضن والنظرات عامه اخوات توأم وتمللي مصاحبين بعض!
الحضن يعني دفا ورغي كتير من سكات ..
الحضن يعني التقاء حزمتين من الطاقه واحده بتزود أو بتمتص  والتانيه بتاخد وفي الحالتين بتخليك أحسن
الحضن عطاء مهما كان اللي بيعطيه!
الحضن أمان وأنا عندي مجموعه محفوظه من الاحضان كده شايلاها لوقت عوزه بذاكرتي

حضن الشتا : الحضن اللي بدخل فيه في عباية بابا الشتوي واستخبي واخد منه كل الدفا اللي في الدنيا وخصوصا لما يطبطب علي عشان يدفيني ..
حضن اللقا: أول حاجه بتيجي في دماغي ..لما احمد اخويا بيرجع من السفر عنيا بتلمع وباتشعبط في رقبته ومين ماكان ورايا مستني دوره في السلام مش بنزل إلى لما أحسن إني شبعت من حضنه !

حضن العتب : لما بيعتذر من غير كلام وبسامحه من غير كلام
حضن من سكات : له نصيب من اسمه  ... اخرس بس لو أتكلم بيتهيألي هيقول "في وجع ..بي وجع!
بس وجودك مهم وجودك اهم من أي حاجه في الحقيقه  !
حضن الخناق :هبه صاحبتي اللي عرفتني عليه في أول خناقه بيننا صوتي يعلي فيها صوتي علي وهي حست بي بـاد ايه كنت شايله ومش باتكلم حضنتني سكتت واعدت اعيط وحضنتها ..وخلصت الخناقه وكانهـ كانت خناقه على حضن !

حضن الصحاب : خفيف وسريع بس بيفرق وخصوصا لو بعد جلسة فضفضه  ساعتها بيقلب حضن "كل حاجه هتبقي كويسه!! "
حضن امي :..بيوحشني و بحتاجه وبيبقى ضرورة في الوقت اللي كل حاجه بتبوظ فيه بتبوظ لدرجة إني بتوه ومبقاش عارفه أبدأ منين
عارف ؟!حضن ضد التوهه كده !!
حضن على غفله :لما تبقي مش واخد بالك وبتعمل حاجه وحد واحشك قوي ييجي يحضنك من ضهرك وتعرف هو مين من بس من حضنه !
حضن النجاح :لما حد يفرح بنجاحك أكتر منك أكتر من علي تتحمله النجاحات فيقوم يحضنك بسرعه بقوه ويقولك "ايوه بقي !!"
حضن الاطفال : لما بابقى حاسه إني وحشه ومقصرة مع ربنا باروح من سكات ليحيي ويارا  "يحيي ممكن تحضني " وكأنهم بيفهموا من غير كلام بياخدني في حضنه  ويعد يكلمني إزاي ربنا بيحبنا ويلعب بـشعري لحد ماأنام
حض قبل النوم :اوقات الارق .
حضن الضغط :بعد يوم مرهق .
حضن الخوف : حضن بيوجع من كتر الضغط بس بعده تحس إنك عصرت خوفك بقوة الحضن
حضن بعد الصلاه: "بحبك في الله "
حض مها : "أنا هنا .. أنا فاهمه ..أنا بحبك مهما حصل ومهما بقيتي ومهما هتبقي ..ومش هاسمحلك تسيبيني في الجنه لوحدي !
"حضن بـاسمع صوته "
حضني :  .شوارع الدقي بالليل لوحدي ..في المطر .. البرد
حضن محمد "ابني الروحي ": أول  حضن في حياتي ماعرفش اوصفه بس اقدر اقول ان في 23 سنه شفت كتير احضان بس ولا حضن فيهم كان زي حضن محمد ..محمد بيطلع انقي مشاعر فيَّ عشان تحضن نقاء وصدق عنيه
حضن محمد مهما حصل هيفضل حضن مختلف حضن غيرلي حياتي حبه حلوين !

متستهونوش بقوة الحضن ماتبخلوش على حد محتاج محبه بحضن تصدقوا بيه زي ماالكلمه صدقه
كمان الحضن ثواب ...
على قد ماتقدروا  خلوله معني عشان على قد ماالحضن حاجه حلوه وبتفرح على قد ما مافيش حاجه توجع في الدنيا اد حضن حد قريب يفقد قيمته ...
"عندما يصبح الحضن حاجه ملهاش لازمه "

ودول اللي فاكراهم دلوقتي بس الحضن حاجه مهمه في حياتي مفيش كلام



مترجمه عن "Hugs power"
#من مذكراتي

هي #

النهارده جاتلي وحكينا بخاف منها..بخاف عليها ..بخاف والسلام !
 بخاف تقول حاجه تصدمني وأما بتقول بابقي عايزه اضربها آجي اضربها ابصلها الاقيني  بـاطبطب عليها
بخاف منها ..بخاف مني.. بخاف عليها !

كنت عايزه اهزها كنت عايزه افوقها ,عايزه اقولها انها مش بطله قصة في كتاب ولا روايه من اللي بتقراهم كنت عايزه اقولها كل حاجه..
كنت عايزه ارجعها عن اللي في دماغها عايزه اقولها ماتحكيش !
كنت عايزه اقولها كلام كتير بس لقتني بقولها  .."خدي بالك من نفسك"  

حنين

غزل البنات
هي وهو
حلوة فستانها
دفا كلامه
طعم الحلم
أيام المطر
وشوية حاجات بحبها :)

أي كلام

و من العلم مالا ينفع ومن الجهل مالا يضر ومن اليقين ما يحيي ومن الشك ماقتل !

أنا مش عايزه كتير بس حضن كبير !!
كبير اوي
أنا عايزه اروح الجنه !

فقاعات نهاية العام

ساعات مابفهمنيش!!
لأ المفروض اقول ساعات بافهمني
ساعات اصلا بحس إنك فاهمني أكتر مني !!
يمكن عشان كده انت حد مهم ؟؟
عشان في الاوقات اللي مبفهمنيش بلاقيك فاهمني ؟
هو أنا ليه مش زعلانه خالص
مع إني كنت فاكره إني متعلقه بكل حاجه هناك!!
هو أنا ليه و ازاي أما بوصل لقناعه  كده باتغير 180 درجه كان حد داس عالزرار ؟
هو ده صح ؟؟
أنا بستغرب قوة احتمالي
وبخاف من قلبتي
هو أنا ممكن اصدقهم واقتنع بكلامهم في يوم ؟
هو أنا ليه حاسه اني فرحانه ؟؟
كاني كنت مستنيه ده أو بتلكك مع اني مكنتش متوقعاه تماما
هو أنا ازاي مستغرباني كده وكاني ببص علي من بره ومع ذلك مبسوطه مني اوي حد الغرور
هو أنا ازاي مش فاكره كلامي ولا كلامك
بس فاكره إنك قلت بالميللي كل اللي عايزه اسمعه
هو انت إزاي قلت اللي عايزه اسمعه ؟؟
هو انت إزاي كده ؟
هو انت هتمشي ؟
طيب أنا هامشي ؟
هي الدنيا دي مش هتخلص بقي ؟؟
هو احنا مش هنروح الجنه ؟

وللحب أيضًا سكرات....2

فقط لو لم تكن أول ابجديه للحب تشق طريقها لقلبي
أتذكر أني حين رأيتك شعرت بذلك "الشيء" مجهول الكنه  ..ذلك "الشيء "الذي صرت أشعر به كل مرة حين أراك
ذلك الشيء الذي عرفت حين كبرت أنهم يسمونه بعالم الكبار حبا

فقط لو لم تكن  أول من سمحت له بامتلاك كل مفاتيح أسراري وذكرياتي وشخصيتي المعقده

فقط لو لم أكن أشعر فقط معك بذلك الاحساس المختلف "رائحه البحر و جو الشتاء وطعم القرفه الساخنه بفمي "

فقط لو لم أكن أري كل ذلك الحب والطيبه بعيناك
فقط لو لم أكن أشعر أنك جزء مني ..مهما افترقنا وحنقت عليك و- أقسمت علينا الذكريات بالذهاب دون عوده فقد أرهقنا قلبها الصغير
وبرغم كل ذلك ..وبعيدا عن كل ذلك وبرغم جزء مني تركته معك افتقده وافتقدك حينها أظل أقضي ليلي باسئلتي المضنيه "تراك بخير؟؟ تراك تبحث عني ؟؟تراك تأكل جيدا؟؟ تري ذلك البرد الخبيث تملك منك بتلك الليله الشتويه القارصه مثل كل عام وهل هناك من يصنع لك من العسل والليمون شراب ؟؟".


فقط لو لم أكن سئمت أنك أقرب بعيد وأبعد قريب .
فقط لو لم أكن أعلم أنك ربما تستطيع ولكنك لا تكلف نفسك عناء المحاوله
فقط لو كنت أصدق حديثهم أنك لا تحبني كفايه أو أنني لست بتلك الاهميه
فقط لو كنت لا أعلم أنك لا تفتقدني أبدا ...
فقط لو كنت أيقن أنك لن تفتقدني أبدا

فقط لو لم أكن أعلم أنه سطر مكتوب وعلينا أن نشكل النقاط
فقط لو كنت أسطيع أن أنزل عنه خلسه  لاسترق النظر
فقط لو لم أكن اشتاقك مثل الأن
فقط لو كنت قويه كفايه لابتعد عن
فقط لو كنت قويه كفايه لاقترب منك أكثر
فقط لو أني أستطيع ترك تلك المساحه المعلقه بين السطور

فقط لو كان عندي القدرة لاسترد مساحاتك بقلبي
فقط لو كنت أريد أن استرد مساحاتك بقلبي
فقط لو كنت تعلم عما بقلبي

فقط لو كنت أعلم مقدار تلك "الكفايه "
رقم بريدي لذلك" الكيف "

لو كنت أعلم عنوةنا لتلك ال "فقط "

فقط لو كنت أملك  تلك "إلفقط "
لو كنت كل هذا  لكن سهل علي علي فراقك


يا ريت بيتك كان منو بعيد
والباب تحت البيت مش حديد..  
                                    شو بخاف "فيروز"

وللحب أيضًا سكرات....من مجموعة (الليلة قررت البقاء

ذاكرة ما بعد الهجران

ذاكرة ما بعد الهجران
اذا اردت الذهاب... فقط اذهب.
فتانيب ضميرك لك لانك غادرت دون اسباب منطقيه اهون بكثير من عمق الجرح الذي ستخلفه بقلوبهم و انت تختلق اسباب غير منطقيه للرحيل فقط لاعطائك تأشيره شرعيه للهجران!
سيكون اهون بكثير من اختفائك بلحظات احتياجهم فقط لربما دفيء صوتك او حزم كلماتك..
اذهب ولا تعود فسوف تتركهم يحلمون بك كل ليله
مجرد أحلام يفيقون منها كي يتذكرون حقيقة أنك رحلت فجأة ودون مبررات
يمارسون هوايتهم الصباحيه بتعذيب الذات بتلك الاسئله المضنيه "ماذا لو ""ماذا لو لم "
بعدها يذكرون أنفسهم أن "لو كفيله بفتح بوابات لشياطين صقر ذاتها ..فيعم الصمت بعد الاستغفار
ارحل .. فهم يشعرون بك أكثر من اللازم هم يشعرون بعذاب بقائك هم يعرفون أنك تصعب الاشياء على نفسك ،
كما أنهم أضعف من أن يسمحون لك بالرحيل
هم أضعف من ذلك لأن بقائك يعني بقائهم ..هم ليسوا على أول القائمه ولكنهم مازالوا مدونون بايه حال..او كذلك يزعمون
فكرة رحيلك تضعفهم توخزهم باليوم ألف مرة ولكن هي لن تقتلهم بالنهايه
كما أنها لن تقتلك بداخلهم !!
أترك كل شيء واتركهم وأترك لهم الذكريات فذلك ناموس الهاربون يفروا مسرعين مخلفين ورائهم الحنين الذكريات ليتجرعوها كامله وحدهم من ارتضوا البقاء..
اتركهم واتركني وأترك كتب الحكايا القديمه ..
دعني اختر منها بكل يوم حكايه اسطوريه عنك لاقصها حتي يملوك و يملوني و يملو الضجر.
دعني ابتلع تلك الغصه وأنا أحكي لهم عن نبلك وكرمك وشجاعتك
اتركهم ..فقد أتعبتك الحكايا
اتركهم وأترك لي ما تبقي من حالي
اذهب وارحل عنهم وأترك لهم عالمهم..
فقط تذكر...
 أن تعود يوما ما.

علمتني الحياة "حتي الأن"

علمتني الحياة "حتي الأن" أن لا يوجد ما يسمي السعاده ولكنها مرادف أخر لكلمة "الرضا "

لن أتكلم عن تلك السعاده التي ليست في المال وأكم من أغنياء أقل سعاده بكثير ممن لا يجدون قوت يومهم .."سادرجه تحت قائمة الكلام المحفوظ

لكني ساتكلم عني بصفة خاصة..

 فأنا لا أشعر بالسعاده إلا عندما تتملكني تلك الحاله من الرضا 

الرضا بالنصيب..بالقدر ..الرضا عن النفس "قلما تحدث " الرضا بعلاقتي بالله ..الرضا بقدر باقات  الحب التي أتلقاها من الناس وتلك التي أرسلها لهم

*الرضا بوجه عام*

للرضا مفعول السحر في حياتي يمكن أن يقوم بتحويرها  من حال الى حال بمجرد لحظة رضا استشعرها في سكون تام بينما ينشغل ذلك العالم عني بمهاتراته السياسيه و أحاديثه العائمه وزيفه المتقن  !

فترة راحه من ذلك الكون المزعج  استمدها  لافتح نافذه أمل على عالمي الموازي.. تلك الحياة الكارتونيه الملونه بالون زاهيه تماما مثل أفلام ديزني مع زقزقة عصافير ملونه و صوت الشلال 

أعود بعدها لاستكمال حياتي بتلك المساحات الضيقه المزدحمه جدا بافكاري وأنفاس الشخوص وأنفسهم العامرة بالألوان القاتمه شمتي لا تنتمي لي و لا احبها !!

أعود بعدها لاشع بالرضا

ذلك الرضا الذي يتركني في أشد اللحظات حاجه اليه -غالبا لاتعلم قيمته فاقدره حق قدره  بكل مرة عن سابقتها -يتركني كي أيقن أني بالرغم من  امتلاكي كل مؤشرات السعاده الممكنه ولكني افتقدها هي شخصيا افتقدها فقط لافتقادي  الرضا 

لتعلمني الحياه حتي الأن  أن السعاده هي ذاتها الرضا أو في الحقيقه

السعاده هي هديه زيارة يقدمها الرضا بكل مرة يطرق بابنا ليعبر عن مدي امتنان صديقه اللدود "الصبر "

لم أذكر  الصبر سابقا  ؟؟

حسنا لربما ذلك حديث آخر  :)

اسم التدوينه

عما علمتهم اياه الحياه!!

منذ فترة ليست بقصيرة كنت قد أقسمت على الا اقترب من الكتابه تحت العنوان الشهير "علمتني الحياه "
يضحكني ذلك المسمي واندهش حقا ممن لهم القدرة على استخلاص تجاربهم الحياتيه بتلك السهوله وتدوينها هكذا بلا أدني جهد مبذول
بالحقيقه ربما ذلك هو الحقد الداخلي بعينه نعم فانا أري أن لي كل الحق أن أحقد على هؤلاء من لديهم تجارب ثابته يمكن تدوينها والتشدق بها في المناسبات

كمن سمعته ذات مرة يقول علمتني الحياه "الا أهرب أبدا وأواجه أي وكل شيء "
أول ما قفز إلي فكري منظر ذلك الرجل وهو يفزع من نومه ليجد أسد أمامه هل سيستخدم حينئذ ما علمته اياه الحياه أو سيفضل تلك المرة تطبيق درس الطبيعه الفطري " الحفاظ على البقاء"

لا أعلم ولكني أري في "علمتني "شيء غير دقيق من الناحيه اللغويه والعمليه أيضا ذلك "الماضي" لا يليق باصل الحياة المتجدد والذي يذهلنا كل يوم بشئونه و تقلباته وذلك ما يجعل دروسها لها نفس الطابع

(متقلبه و غير ثابته واستثنائيه إلى أقصي حد "
فذلك الدرس الذي علمتني اياه الحياه غالبا لن تستفيد أنت منه على الأقل قدر استفادتي وأنا نفسي لربما ما علمتني اياه الحياه في شبابي يكن "كلام فارغ " في أيام الكهوله!
ما ادراك !!..لربما إذا عدت لما علمتك اياه الحياه بعد عشرون عاما تجد أن ذات الحياة علمتك عكسه تماما في تلك السنون .
ذلك لا ينم على مدي خبثها ولكن تلك طبيعتها فلا تحاول تغييرها ...اندمج معها !


عامة أعجبتني الفكرة الأن لا على سبيل التدوين والنشر ولكن على سبيل التسجيل والتذكير
حسنا سأحاول ذات مرة الكتابه عن ما علمتني اياه الحياه و ما علمتها اياه أنا الأخري بدوري ولكني ساكون في غاية الخبث وأتفادي الخطأ اللغوي الشائع
ساكتب تحت عنوان "علمتني الحياه حتي الأن "- كم يدهشني ذكائي و فطنتي أحيانا -


عموما سيكون أول درس "كالعاده " عن" السعاده "..

وحده

وحدك و انا وحدي ..باهرب و انا لوحدي

يا غربتي في بعدك يا غربتك بعدي!!

حتى نهاية العمر....

               قالوا مشينا و ما تودّعنا
                                        متل حبوب اللّولو وقعنا
                                                           حبّة حبّة
                                        كلّ الإشيا اللّي بتجمعنا
                                           بطّل هلّأ إلها معنى
                                                             و صارت كذبة

نحنا مهما بعدنا و ضعنا
بلحظة بتلاقينا رجعنا
وحدُه الحبّ بيبقى معنا
وطن و غربة!!!

كلّ يوم بيمرق بدعيلَك
بحطَّك بعيوني و ما بشيلَك
و بعتم اللّيل بضوّيلَك
جوّا بقلبي

غالي عليّي و بيلبقلَك
بحبَّك من روحي و بشتقلَك
و سنيني كانِت من قبلَك
مرّة و صعبة

فلانه الفلانيه اللي أنا معرفهاش

مش هتباركيله؟.. ده خطب !!

أنا معرفوش..
على فكرة مكنتش بـاكدب بس  أنا فعلا معرفوش ..بس عارفاها
لأ كده بكدب.. أنا كمان معرفهاش!
كنت عارفه منها اسم
وكنت عايشه حكايه معرفش من تفاصيلها غير انهم .."بيحبوا بعض"
معرفش ليه ده كان كفايه اني احتفظ بدعوه ليهم معايا كل يوم
النهارده عرفت انه خطب....
معرفش ليه اتخضيت كده  وزعلت
معرفش منه أو عليه ولا عليهم بس سبت ده كله
واعدت افكر فيها
يا تري نسيت؟؟
لسه فاكره؟؟
اتخطبت؟؟
يمكن اتجوزت؟
زعلانه؟
طب حتي لو خلاص نسيت يا تري لما تعرف انه هو كمان نسي هاتزعل؟
كل الاسئله دي دارت في ثانيه في عقلي وصوتها اللي عمري  ماسمعته رن في وداني وهي مخضوضه وبتقول  " خطب ؟؟"
وكل الذكريات اللي جت في بالها جت في بالي
اد ايه كان مميز  لها  وكانت عاديه بالنسبه له !
اد ايه كانت بتصبر نفسها لما يبقي مزعلها ومش مفهمها ولا معرفها هي مين و فين طب وامتي ؟؟
عارفه إن ساعتها على اد ماكانت بتتامص كانت بتبقي كل ماتحس  انه ممكن ينسي في بعده عنها ..
ينساها ولما يفتكرها يفتكرلها بس الوحش..كان بيصعب عليها
هي مش وحشه ..هي بتحبه !
وسكت ...و اتنهدت أنا   وخدت نفس عميق

دعيت يا رب لو لسه فكرآه سكن قلبها.. أنا عارفه واجعها
أنا عارفه اد ايه كانت بتستناه في الاجازات
أنا عارفه كانت بتعمل ايه كل ماعريس بيتقدملها
أنا عارفه اد ايه بقت واحده نكديه عمرها ماكانتها
أنا عارفه اد ايه كانت بتضايق من الحاجات اللي منكده عليها ومخبياها عليه عشان متزعلوش
أنا عارفه اد ايه كان بيزيد مضايقتها أما بيقولها انه عايزها فرحانه
..أنا عارفه
عارفه هو كان ايه بالنسبالها 

بس ...هو أنا ليه مسألتش ولا كان عندي فضول حتي أعرف  هي مين ؟؟

= ايوه والله خطب واحده اسمها "فلانه الفلانيه " بيقولوا كانوا بيحبوا بعض

فلانه الفلانيه ؟؟
اللي هي اصلا هي ؟؟
هو أنا ليه مفكرتش إن ممكن تطلع هي ؟
الحمدلله انه خطب =)

منك و مني و منهم لله :)
و بس ...

معليش !

قال قايل إشيا بشعة عني
(معليش معليش)
أخبارك مش عم بتطمني
(معليش معليش)

إيامك قدامك
ألله يخليه إيامك
إنت ما بيطلع منك
إلا كل شي حلو...

أخبارك يعني كلا منيحة؟؟
يعني ماشي حالك؟؟
ومش عم بخطر على بالك؟؟
معليش!!

‎_خليني احكيلك عن الاوضه الضلمه ..

اول ما تشوفيها هاتتصدمي هتخافي هاتحاولي تهربي ..مش هاتعرفي فهتبتدي تتصرفي بهستيريه!

=و بعدين؟؟!!!

-و بعدين هاتبكي شويه من وقت للتاني و هاتعيشي ساعات وسط الحنين و الذكريات ..وممكن تندمي علي كام قرار" صح" خدتيه و بعدين هاتتعودي!

=و بعدين ؟!

-و بعدين هاتخديلك ركن تعدي لوحدك فيه من سكات و تستني اول حد هايدخل بعدك عشان تحكيله عن الاوضه الضلمه..

ليلة عيد

أكتر ناس بتحس بروعة وبهجه  و حلاوه العيد  هما الناس إلي طلعوا من رمضان بقيمه 
الناس إللي بالنسبلهم العيد  عبارة عن  فترة استراحه من جهد (متعب شويه  صحيح) بس على قلوبهم راحه 
العيد بالنسبه لهم مش بس أجازه سنويه !!
العيد بالنسبه لهم  كمان هديه ربانيه... 
يا رب أكون أنا وانتم من إللي ذاكروا كويس و عيدهم مش أجازه لأ ....هديه 
كل سنه و حضراتكم طيبين ومن  البسكوت والكحك مخففين وعالناس- فرحه ومحبه- مرشرشين 
عيدكم بركه :)

ليلة عيد ليلة عيد ..الليله ليلة عيد:)

بعوده ...

خلاص هاتمشي؟؟
يعني خلاص لميت حاجتك و ظبط حالك ؟؟
ما كل الشهور بتعدي ببطء وملل يعني  اشمعني انت ؟؟
ولا أنا اكمني بحبك ومقدرش استغني عنك تعمل في كده
اصلا اساسا هو أنا بشوفك غير مره كل سنه
طب كالعاده زعلت منك عشان بعد كل غيبه و غيبه بتيجي مستعجل و تمشي كمان زي ما جيت مستعجل !!
وافضل زعلانه و طبعا زي كل مره ولا هاتعبرني غير بعد سنه لو ليا نصيب..
طب خدني معاك :(..
طب اعد معايا :)
يوووه ..هو انا كل ما هكلمك او اعاتبك هاتقوللي سايبلك عيد؟؟
كتر خيرك:( بس انت خيرك مختلف
خيرك رحمه و بركه و رزق و غفران
طب بص انا مش عايزه اقلب مود نكد بس ممكن تيجي بسرعه؟؟
طب ممكن تيجي تلاقيني زي ما سبتني و اخواتك اللي بيعدوا علي ورا بعض ما يغيرونيش و ترجع تلاقيني ناسيه و قاسيه و اخد وقت لحد ما اصدق انك فعلا جيت و انك فعلا بتطبطب علي بالراحة كده و انك بتغسلني بالرحمه الللي ربنا بعتك بيها !!
وعد؟؟!!
طب خلاص امشي بقي عشان تلحق ترجع بسرعه :)
هاستناك ..عارف لو اتأخرت ؟؟:(
اه و لما تيجي اسال عني :)
و الله لسه بدرى ..بدرى اوي بقي :(
يا رب بعوده :)