يعني ايه ؟
يعني تذكرة قطرك تزغرط نسأل اللي جاي امتي جاي ليه؟
يعني طعم الصبح صابح حلو ليه؟
يعني قهوتي اللي عادتها ساده يبقي سكرها زياده
طب وليه؟؟
تصحي شمس الصبح بدري ثانيتين
تكة الساعة القديمه زايده تكه أو تكتين
يعني همسه يعني ضحكه يعني بحر شراع ونسمه
يعني راضيه يعني هاديه يعني قلبي نط جوه بين ضلوعي مرتين
مرة كانت لما شوفتك من بعيد
والاخيرة لما شوفت شكل وشك صافي جدا.. مش عنيد
يعني انت كنت فين؟
يعني اخاصمك ؟..يعني اعاتبك؟ يعني الومك؟
..ولا اقولك مش حلومك
انت يعني زي ماانت ؟لأ مغير حبتين
شعرك الفضي في جبينك يمكن زايدله شعرتين
مش هتقولي كنت فين؟
شفت امك ؟؟..كان واحشها اعدتك وسط اخواتك البنات ..
لعبك وضحكك ويانا ياما
كان واحشها نكتتك ساعة عشانا
حتي خناقتك الهابله وحمقتك و"مفيش نزول" كنت طول عمرك حمش ..راجل علينا أو معانا
...كنت حاجه مفرحانا
خدتها في شنطة سفر خدت وياها السهر خدت الفرح خدت السكات
بالك سهرنا بعدهـا ؟؟غيرش هما الذكريات
تصحي امك تتسند عليهم لما ديك الفجر يدن
تصحي تبدأ يومها بدري لاجل يخلص برده بدري
تصحي تبدأ يومها بدري لاجل يخلص برده بدري
!! ليله ورا ليله ..عمر فات
واللي راح كان ناوي يرجع بس قطره معاده زي العمر.. فات
يوووو ه ..استنينا والليل ده اصله كان غلس بيعدي زي ضيف ثقيل
ولا اقولك سيبك انت .. من امتي كان لك في النكد ورغي البنات؟!! عارفها امك طول عمرها تموت في النكد
!وانت بعيد دموعها ماهمدتش يوم ..ولا لما جيت
هو انت مش هتقولي برده كنت فين؟
مش مهم
بس ساكت انت هادي ..مش طبعك
كنت لما تدخل تقلب الدنيا دي كلها ضحك وهرج
تنكش في ريم وتغيظ في ليلي وتعاكس سعاد
!!الحق برده يا أخويا طول عمرك سخيف
كبروا البنات !!
بالك كبرت ؟
عارف هتفضل طول عمرك عبيط ..
!!كان بان عليك
عامل زعلت؟؟.. ازعل
مش هجري و لا اطبطب عليك
مش هجري و لا اطبطب عليك
!عامل كبرت
يعني ايه ؟؟
برده مش عايز تقولي كنت فين؟ !!
مش مهم !!
0 التعليقات:
إرسال تعليق