طق حنك

تعرف ايه عن العنصريه
..أنا اقولك 
 العنصريه هي لما تكون عايش في بلد اسلامي واغلبيته مسلمين وتبقي مضطر تبرر  لافعالك واقوالك من اصغر لاكبر حاجه 
 وتحلف مليون يمين إنك وسطي ومش متشدد بس ان ده الصح و انك كل اللي بتحاول توصله في دنيتك انك "تعمل الصح"ز
العنصرية
إنك تبقي عايش في مجتمع عنده جهل ديني مطلق  و يبقي ده ذنبك انت "علي طريقة عمرو مصطفي اتكلم و اشرب "
فاما ربنا يفتح عليك وتحاول تطبق ابسط قواعد اللي بيفرضها عليك دينك
فتلبسي لبس الحجاب الشرعي يتقال عليكي شيخه "علي فكره انا مقصدش تعملي سنه ولا فضل لأ لأ لبس الحجاب الشرعي وآه لبس
الحجاب الشرعي مش "بنطلون سكني على بادي وايشارب احمر "

أو تقرر تنزل تصلي في الجامع أو تحدد حدودك مع زميلاتك في الشغل  و تغض بصرك عشان أنت "راجل "

 تبقي رجعي ,متشدد وفاهم الدين غلط
 الست مش سلعه عشان أغطيها و الراجل ذ مش حيوان شهواني "مع أن الدراسات العلميه هي إلي بتثبت إن الراجل بطبيعته كائن  شهواني بس عامة كل واحد أدري بنفسه   و  الله  محبه 

اه اه نصيحه مني متحاولش تفكر حد إن مفيش حد كبير عن الغلط والفتنه  ساعتها هيبقي لازم تتكلم عن نفسك
و تخليك في حالك 

 والا يبقي مطلوب منك إنك مش بس تبقي فعلا "شيخ" زي مابيقولوا لأ تبقي معصوم
أو بقي تقعد تاخدلك جمب كده عشان انت راجل "بركه"ه
ايه يا ست الشيخه هتتكلمي في سياسه ولا اجتماعيات ولا تعليم ولا ولا..... ليه احنا هنهرج بقي
يا ستي خليكي إنتي في الاخره احنا بتوع الدنيا
يعني لما تقول وجهة نظرك في حاجه صح "من وجهة نظرك" في أي حاجه عامة تبقي وجهة نظر اسلاميه  ومش بس كده تبقي رجعيه  ومتخلفه عشان اصلا الاسلام دلوقتي مستورد, فاهمينه غلطو احنا ماعندناش مسلمين دلوقتي كلهم وهابيين!!
"ايوه و انت بالذات موطنك الاصلي كوكب عطارد زززليك شوق في حاجه؟؟
يعني أما تحب تروحلك درس ولا تسمعلك خطبه  اهلك -ده في حالة انهم أهل لييبرالين وهيسيبوك تروح اصلا " يعدوا حاطين ايديهم على قلبهم ويفضلو سايئين عليك كل معارفهم وقرايبهم وخلانك وعمامك عشان ينصحوك ويرجعوك لعقلك مع انهم اصلا محاولوش يقعدو ويعرفوا عقلك دلوقتي فين أو اعايزيبقي فين أو لو رجع هيرجع فين
كل ده عشان المسلسلات اللي كانو بيتفرجوا عليها في رمضان وهما بيتسلوا بالياميش هي الحكايه كده  دايما الولد أو البنت المنطويه اللي اتصدمت في علاقتش حب أو دخلتش فيها تنضم" للجماعة الإسلاميه "اللي تبع مسجد الجامعه  فيها الشيخ ابو جهل بيعمل طيب لحد
مايجيب رجلك عشان تشتغل ارهابي  في وقت فراغك وهو يقعد يضحك ضحكات شريرة متقطعه
طبعا ما هو لو حد من بتوع المسلسات دي كان فكر كده مجرد تفكير يهوب ناحية المسجد كان عرف ان كل الكلام ده فارغ مش     عشان مش بيحصل لاء اطلاقا ء :D
بس يا سيدي الفاضل احنا المسجد في جامعتنا و دورة المياه في مقارنه سريعه جدا   بيشتركوا في الكتير من اوجه التشابه
 الريحة الاتنين ماحدش بيفكر مجرد تفكير انه يقرب جمبهم مهما كانت شده احتياجه لهم ما بالك بواحد يفكر ينضفهم
عارفة ان المقارنة لاتجوز و ان كانت خالية تماما من المبالغة لكن انا بتكلم عن حاله معينة "عندنا ""بسببنا" مش عن عموم المساجد و العياذ بالله

يعني تتمني ساعات تبئي زي ليديا صاحبتك لم بتروح الكنيسه كل الناس بتسقفلك وأما بتعمل أعمال خير الناس بتساعدك على أنك تبقي شاب مسيحي مخلص مش علي انك سهن و لازم نواياك تبقي دنيئه وبتلعب وبتتاجر باوجاع الغلابه
يعني لما تقول" اتق الله" تبئي بتكفرنا ولو لك رأي معين في مسئلة ويا حبذا بقي لو بتتكلم في حاجه حاصله في البلد
لو أستدليت بموقف من قرأن او سنه  لشرح وجهة نظرك هيقولو بيفرض علينا رأيه بحجاب الدين
 لو سكت هيفتكروة أنهم كده كلوك وإن هما دول الاسلاميين محاميين فشله عشان فاهمين القضية اساسا غلط
"اه علي فكرة اسلاميين دول غير مسلمين يعني عز علينا أوي إن معندناش تصنيف في الإسلام فقلنا اشمعني احنا
لو كان في حدث او كارثه بتحصل لو بادرت ورحت تاخد موقف اه طبعا أكيد وراه حاجه هم دول بيمشو كده دول كل أفعالهم استراتيجيه
لو قاطعت وقعدت في بيتك هتبقي سلبي وبتتكلم عالفاضي
لو سبت البلد وطفشت مع العلم انها وطنك يعني المكان الوحيد اللي المفروض يقبلك زي ما انت بس أنت بره صدقني هتلاقي فرصه تتعامل بطرق أحسن على الأقل لو حد فكر يهوب ناحيتك في بلد محترمه عشان دينك أو مظهرك هتوديه السجن
اه نسيت أقولك أنك لو زهقت في يوم وفكرت تاخد موقف من الناس دي وتتصرف على أساسه هيبتدوا يتهموك بعدم التسامح إللي بيفرضه عليك دينك وانك ضد حريه التعبير
يعني لو قولت انك ملكش دعوة وإللي عايز يسأل في الدين عنده الازهر ومتقرفوناش تبقي منظر عالفاضي و ملكش فيها
ولو اتكلمت وحاولت تفهم الناس إن الموضوع مش قفش لكن فعلاً في حاجات متنفعش وإن بس احنا عندنا جهل عام
 تبئي بتشتمهم وعايز تعيشهم أيام الخيم و تنشر الدعوة الوهابيه 

لو فهمتهم إن كل حاجه بالتدريج تبقي مش سهل وبتستدرجهم ولو قلت طب هو كده وقفش ,,,أيووه أظهرررر على حقيقتك 

العنصريه انك لما تعمل إللي إنت عايزه ينتقدوك
المصيبه انك لما هتعمل إللي هم عايزينه هينتقدوك برده
العنصريه لما أكون حاسه اني لازم اكتب في أخر المقال أني مش اخوان مش سلفيه  وأضيف صورة لي عشان أثبت اني لا انتمي لاي تيار ديني أو سياسي و اني" شابه هئي"  اساسا عادي وكأنها سبه عشان يتسع صدر القاريء من غير اي ضغائن و يكمل للاخر
أو أني أفكر أصلاً بعد ما نشرت المقال امسحه لأنه ممكن ما يهمش حد أو يكون مش منطقي بالنسبه لحد أو حد يحس بيه من غير ما يعتبره مبالغة غيري
بس بيتهيإلي لما امسحه هيقولوا شوفو هما دول السلامين مش عارفين يقفوا و يدافعوا عن قضيه ويحاربوا عشانها بمجرد  تعرضهم  لانتقاد بيجيبو ورا
مع أني لو نشرته هيتقال أيه شغل اليهود ده بيحاولوا يصعبوا علي مين ..ناس علي راسها بطحة و مبالغة فارغه!!!
وعشان أوفر عليكم الارهاق الذهني البوست ده كان مكتوب نتيجه موقف شخصي حصلي وفش غل مش أكتر و لا ليه علاقه من قريب أو بعيد بمواقف مطروحة على الساحه و ضاره بالصحة
بس تقدروا تقولوا كده أني زهقت من تصنيف الناس والمعايير المزدوجه
أنا كل أمنيتي فالحياة اني اعيش ,اتعايش افهم اتعلم و اعمل كل ده و انا محترمه!
أيوه أنا بعلن من هنا عدم رغبتي في إن أي حد يعتقد اني شيخه لمجرد مظهري الخارجي او ارائي الشخصيه
مش عايزه أي  واحده مش محجبه تيجي تقعد جمبي في المترو و انا عمري ما شفتها و تشيل كل الحدود و المسافات عشان  تقنعني برغبتها الحاده في الحجاب واني أدعيلها ربنا يهيدها أو واحدة تانيه تبصلي من فوق لتحت وتبقي طول الوقت متأهبه أمتي هطلع المنشورات و كل  ده عشان مظهري
اه معلش لو فيها ثئالة يعني "كمان مش عايزه حد لما أتهبل وأعمل حاجات غلط يقول رجعت لعقلها وبقت وسطيه هو ده الدين
ولا لو قررت أعد في بيتنا و ماطلعش منه  ..
مش عايزه حد يتدخل في خصوصياتي لمجرد اني شكلي بيقول اني "ست طيبه و بتاعت ربنا " سبحان الله يا اخي ما كلنا بتوع ربنا!!

اقر أنا الموقعه أدناه وصاحبة تلك المدونه واعترف أن أفعالي وتصرفاتي نابعه من داخلي وأنها لا تمثل ألدين الاسلامي ولكن تمثل انتمائي له
أنني أحاول أن أكون متدينه بديني ان أفهمه وأعرفه حق الفهم والمعرفه في زمن ندر فيه العلم ,ملاكه وطلابه
واندثر الحق و مريديه ..
باحثة عن الحق أنا.. اجاهد و اجتهد كي أصل له وطريقي لا اعلمه و يعلمه الله ولكني قابله للنجاح والاخفاق مرارا
لست صحابيه
لم اصل حتي لاكون تابعيه بحق
أحاول أن أكون طبيعيه
واتشوق أن أعامل معامله طبيعيه ببلادي ليبراليه كانت دينيه عسكريه أو متئسلمه أو اي مسميات خرقاء أخري
الشيء الوحيد المؤكد  بكل فخر لدي و الذي لن اسمح لحظه بالتشكيك فيه أنني بالصميم

مصريه مسلمه 


ايناس البداوي