حاضر هندهلك مصر (من يوميات خاليه من الكوليسترول

(مقدمة( ملهاش لازمة

النهارده أول يوم افضى نسبيا واقرراقعد في ركني المفضل في الاوضه ..وطبعا السؤال المعتاد

..اشمعنى الركن ده؟؟

طبعا عشان اشعة الشمس بتدخله بزاويه ميل 270 والشمس بتكون ...أي كلام طبعا الركن ده بالذات عشان بحبه.. خلصت

بس يمكن النهارده ليه اهميه اضافيه "انه يحمي ضهري تحسبا لاي ظروف محدش ضامن بردوا

..قبل ماأبدأ.. لازم اتاسف

قبل كده قلت مش هاكتب وانا مستعجله ومش هاكتب وانا متغاظه ومش هاكتب وانا ثائرة ومش هكتب في عز ثورة...يعني مش همشي

ورا كل من هب ودب اسفه لاني هتنازل عن كلامي

معلش حاولت استنى على اد مااقدر والدنيا تهدى والاحداث الوالعة تخف بس باين إني لو فضلت استنى كده

هفضل قدام الكيبورد الخربان بتاعي لحد ما شعري يشيبب ,ولو انه بدا كام شعره بيضة يظهروا فعلا بس ماعلينا مش ده موضوعنا

(تمهيد لابد منه لدواعي امنية)

أولا ..أنا مش جاية أتكلم دلوقتي عن فتنه أو غيرها ..لأ خالص اطلاقا ..

على فكره ولا كمان جايه اباركلنا إن احنا بقينا 80 مليون مختل

ولا جايه اشكر الساده الفنانين خصوصا الاستاذ"محمد فواد" انهم انقذونا من فتنة كانت هتدمر أمن البلاد

لأ لأ خالص مش اخلاقي أنا بس جايه اسأل سؤال صغير جدا جدا وياريت بردوا معلش لو فيها رخامه وثقل دم الاجابه تبقى بسيطه ..

يعني مش كلام من اللي بيطلعوا يقولوا في برامج التوك شو وكل الناس تفضل تهز دماغها وفي الآخر تسقف وياخدوا اللي فيه النصيب

ويمشوا

الموضوع بدء من كام يوم لأ.. يوم ايه ؟؟ قول اسبوع.. لا والله ولا حتى اسبوع !!ا

...الكام سنه اللي فاتوا

كل مايحصل حاجه وبمناسبة أو من غير مناسبة

الاقي الناس طالعه بمظاهرات الكترونية (ايوه وربنا يخليلنا الفيس بوك ...اه.. مدونين ايه ومدونات ايه دي موضه قديمة وخلصت

"الفيس بوك دلوقتي تحت شعار" البهبهة حق مكفول لكل مواطن " بس بردو مش دي مشكلتي,

الفكرة إن الناس أول مايحصل حاجه تطلع بـستاتيوس وتعليقات وكتابات وكلها موجهة ل " مصر"ه

يعني من طرازالحقي ولادك يا مصر

"احنا بنموت يا مصر"

ارحمينا يا مصر"ا

وبصراحه حسيت إن قلبي بيتقطع وإن مصر دي أكيد براوية و عديمه القلب والرحمه

لكن الموضوع موقفش لحد هنا الموضوع ابتدى يكبر

ده دخل في مسألة نسب ؟؟؟!!!!!!1

..بدأت أسمع الناس بتقول

" احنا ولادك يا مصر

لمي ولادك يا مصر

لحد ماوصلت للشتيمه وقلت القيمه و طبعا سمو اخلاقي ميسمحليش اكتب امثله (بس يعني لو حابكه معاك قوي ممكن تفتح صفحتك لو قلبت .. شوية هتلاقي كلام زي الفول

المهم اني نمت / صحيت لقيت كل الناس بتشتم في مصر وبتتهمها والعياذ بالله باشنع التهم

وطبعا متفاجئتش بعدها لما لقيت الموضوع قلب ب "ـسيبهالك مخضره يا مصر ""اشبعي بيها يا مصر""كليها والعة يا مصر "ه

اسفه لركاكة الإسلوب بس ده نبض الشعب ولازم يتنقل زي ما طالع من الشعب

هنا بقى قلت.. لأ بسسس الموضوع كده كبر ومحتاج تدخل

هي مين مصر العاميه الطرشه الخارسة دي اللي مطلعة عين الناس كلها وهي ولا على بالها

في يوم الموضوع ده فضل شاغلني اوي لدرجة إني كنت خارجه مع صحابي وكنت متنحه على غير عادتي

مالك؟؟؟ فيه ايه يا ماما ؟؟!مصر خسرت كاس العالم؟؟؟

هنا بقى وقد كانت جنت على نفسها براقش

أيوه بقااااا-تعالي هنا وقوليلي ...هي مين مصر دي ها مين ..لا حقيقي هي من وفين ولو موجوده هنا يبقى ليه عايشه في دور الاهبل

طبعا هنا ابتدى الناس وتبص علينا وتركز معانا والناس الشغالة في المكان ابتدوا يبصولنا شذرا

فابتدوا يهدوني قبل ماافضحهم والم عليهم الناس على أساس إنها مجرد حالة عصبيه نتيجة الإمتحانات وهتعدي إن شاء الله على خير

فضلوا يهدوني وانا بحاول اشرحلهم إني هاديه وطبيعيه وبأسأل سؤال طبيعي وعايزه رد عادل عليه

هي مين مصر وهي فين؟؟

أما لقوا مفيش أمل مني روحوني البيت ووصواعليَّ ماما بس بردو محدش جاوب على سؤالي

بعدها بكام يوم فتحت التلفزيون لاني ساعتها قاطعت النت لاني اكتشفت إن ضرره في الايام اللي زي دي كان اكبر في رفع ضغط الدم من التليفزيون فقررت بقى اختار اهون الضررين

!!!!!!!لقيت التلفزيون كله أغاني وطنيه .."اصله ماعادش على مصر و"مصرهي أمي "و"بلا.... ايييييييييييه ؟؟؟؟؟؟؟؟امي

بصيط لماما _اللي كانت قاعده جمبي بتاكل لب وهي بتابع الحدث في انهماك رهيب _نظرة يتطاير منها الشرر وكانت الست الغلبانه لا

بيها ولا عليها بصتلي ورجعت تاني بصت للتلفزيون قبل ماتدرك مدى شراسة نظرتي فرجعت تاني بصتلي برهبةف

ا..ا..ايه يا انجي خير يا حبيبتي ف ..في حاجة ؟ا-

ساعتها استعذت بالله من الشيطان وقمت حبيت على راسها..

لا يا أمي انتي لا يمكن تكوني مصر اللي بيتكلموا عنها دي أبدًا-

سبتها وهي بتبصلي نظرة عليه العوض ودخلت أوضتي أذاكر

لقيت اخويا قاعد على الكمبيوتر بتاعي بيتابع أخبار البورص..قصدي الفيس بوك ..حاطت الهيد فون على دماغه وعايش في دنيا تانيه

يابني يالله من هنا هنرش ميه ..يالله يا حبيبي عايزه اذاكر-

اتنفض فجأة فسحبت كلامي في ثانيه

الا طبعا لو كنت مشغول أنا ممكن اذاكر في المطبخ عادي-

طبعا ما انتي ولا على بالك=

من جوايا فرحت بيه بغض النظر انه تافه وفاشل وبغض النظر عن طريقة كلامه معايا وانا المفروض اخته الكبيرة بس فايق للي بيحصل حواليه

بفرحه قلتله

- قصدك على ايه بالظبط .. ايوه أنا مذاكره كويس قولي بس قصدك على ايه وانا اقول معاك-

يا انجي الدنيا خربت القوالب قامت والإنصاص نامت=

آه لأ كده يبقى أكيد مش قصده على احداث الإرهاب

..يبقى أكيد بتتكلم عن السودان ..صح و-

يا بنتي بقولك ثورة.. مصيبه=

-عندك حق ماهو اللي بيحصل في تونس ده مايرضيش ربنا أبدًا-

بص بقولها ايه وتقولي ايه ...أنا هاشهد اجهل خلق الله اللي هو أنتي =

ينفع كده يعني ينفع نتعادل احناااااااا والزمالك وصفر صفر دول مبيعرفوش يلعبوااااااااا؟؟

ممممممم.. طب أمشي بقى أطلع بره قبل ما.. وبعدين تعالى هنا ايه اللي أنت كنت بتسمعه ده ......ايييييييه-

مصر التي في خاطري ..تعالى هنا مين قالك الكلام ده؟؟ه

ايه يا انجي عادي يعني =

عادي ..متستهبلش ورد عليَّ أنت في حد أكدلك المعلومه دي-

معلومة ايه؟؟ أنا باشجع الوحدة الوطنيه=

ت..ت... أمشي يا عادل ..أمشي اطلع بره وسيبني لوحدي من فضلك -

ايوه قررت مضيعش وقتي معاه لأني عقبال ماافهمه الاحداث ويستوعبها هتكون مصر نطقت وافصحت عن مكانها وسلمت نفسها كمان ......

ده فاكر الوحده الوطنيه ماااتش كورة!!!!!ارحمني يا رب

دخلت أنام وأنا بحسبن في سري... بس فجأة جه في بالي ..

الله !هي مش مصر دي لو كانت ابرة في كوم اش حتى معقول ..معقوله لو التمانين مليون بني ادم دول بيدوروا عليها زي مابيقولوا

مش كان بردو زمانهم لقوها ؟؟

ونمت وصحيت عدت الايام والحياه ورجعت تاني لمجاريها ودخلنا في فترة امتحانات وزالت حالة التتنيح اللي كانت لبساني ونسيت أو تناسيت وهكذا .. زي كل مره

وفي يوم وانا خارجه من باب الجامعه لقيت شويه ناس متجمعين وعاملين مظاهرة وعلى رأسهم واحد رافع يافطه كبيييييييرة

وعمال يزعق ولا كأنه سلامه في فيلم وااسلاماه " انتيييييييي فيييييييييين يا مصر ... ردي عليَّ يا مصصصصصصصصصصصصر

ساعتها بس ضحكت ..دورت وشي الناحية التانيه ومشيت وسبته عمال يهاتي في الخلفية..وقولت في سري

. حااااضر .. أول ما اشوفها هندهلك مصر