شجر الزيتون

رب همة احيت امة

بالظبط من سنتين سمعت الكلمة دي في ندوة عن التنمية والنهضة ...أنا فاكرة كويس كنت قاعدة برسم الاشكال الحلزونية اللي بحب ارسمها ومش مركزة اوي في الكلام..أصل الكلام كله محفوظ ومفيهوش جديد لكن الكلمة دي خلتني غصب عني اركز مش عشان عجبتني وبس,لكن كمان عشان كانت غريبةغلي .. مكنتش مستطعماها.

ساعتها بدا المحاضر يتكلم عن حقيقة شجر الزيتون- للي ميعرفش زي حالاتي- شجر الزيتون بيمثل حكمة في حد ذاته وهي(بذر الاجداد حصاد الاحفاد)..وده لأن الشجر بيدي طرح بعد جيلين كاملين..

ساعتهاحسيت بوضعي في المجتمع و قررت إني باعتباري جدة مسؤولة ومحبة لأحفادها فـأنا من دلوقتي لازم افكر في البذرة علي هبزرها وتكون نيتي واضحة من البداية إني احاول على اد مقدر إن بذرتي تكون صالحة ومنتقاة بعناية عشان ببساطة دي هدية احفادي .

ساعتها مكنتش حاسة إن الكلام كبير ولا حاجة...

بس هو فعلا الكلام سهل.. بدأت أعمل ده شوية واكسل شوية وهمتي تعلي شوية وشوية تنزل يعني الطبيعي بتاع كل الناس

لحد النهاردة...

كنت قاعدة في ندوة برده بس المرة دي كانت عن العمارة والتخطيط العمراني بغض النظر عن إن الندوة كانت ممتعة إلى اقصى حد ,وبغض النظر برده عن مدى خبرة وثقافة واختصاصيه المحاضر إلا إني فجأة وبدون أي مقدمات .........

"رب همة احية أمة"

قالها الدكتور وحصلي ساعدتها صدمة عصبية وعلى طريقة الأفلام الاجنبي لما بيجيب في لحظة كل للقطات اللي مرت علي البطل بشكل عكسي لحد ماتوصل لللقطة الأولى من سنتين .

بعد ماخلصت المحاضرة روحت وأنا دماغي مش قادرة تبطل تفكيرووكأن حد جوايا بيتكلم...

احنا مش بس هنتحاسب علي الحاجات اللي عملناه افي حياتنا احنا كمان هنتحاسب على الحاجات اللي معملنهاش ..على الأحلام اللي محلمناش بيها ..على طرق اللي سبناها ومكملنهاش....

حسيت ساعتها بس اني بدأت استطعم الجملة ولقيتني بأقول لنفسي علي فكرة مش بس همة ....

ممكن فكرة ..كلمة ...حلم يحيي أمة بحالها .

حلم... مجرد حلم مدروس وامل في إن شجر الزيتون بكره هيطرح أحلى طرح ..

مجرد حلم.. نعيشه بجد مش بس نشوفه واحنا نايمين..لمرة نتعلم نحلم صح ..نحلم واحنا عيوننا عالسما وقدمنا بيدب عالأرض.

حلم.. نحلمه من غير مانخاف ونحطله معالم واضحة ونرسمله طريق..

ايوه عندي امل إني هغير الكون ...عندي امل في شجر الزيون ..عندي امل في قوة الحلم ...

بس احنا نحلم ...