هوامش قديمه

بعد الفحص والتمحيص والمعايشه 

اكتشفت إن مشكله الولاد بعد التخرج الجيش ومشكلة البنات هي الجواز

مش بهرج..

أول ماالولد بيتخرج بيبقى الشاغل الاكبر لهمه وباله وتفكيره "الجيش "

انما البنت بقي تحس إن الناس بيتربصوا بيها.. بيستنوها تخلص دراستها عشان يبدأو يبصولها على انها مذنبة حتي تثبت براءتها!!

أو يعني دي نوع من الهزار
لكن الحقيقة إن من ساعة تخرجي و أنا  كل التهاني والدعوات القلبيه والغير قلبيه والمجاملات والجمل الفعليه والاسميه والخبرية والافتراضيه بتنتهي ,بتبدأ أو بتصاحب بـ كلمه واحده" العريس"

وبدأت أحس إن دي براعة لغوية إن إزاي ندخل كلمة "جواز"أو "عريس " في جمله مفيده

لدرجة إني بجد بدأت أحس إني سني كبر وان الناس خايفه عليَّ اعنس

أو اني فعلا شكلي فيه حاجه مختلفه باين علي مثلا اني "عايزه اتجوز "أو العكس إني ضد المبدأ مش عارفه!!
المهم إنها حاجه بتخلي كل الناس يبصولي بريبه تتبعها ابتسامه عريضه ويبدأوا يكلموني ويقنعوني باستماته  بـاهمية الجواز للبنت

مع إني والله عارفه ده كله  وأنا مش بقول إني مش هتجوز لا سمح الله بس الجواز له شروط وتوقيتات يعني  مش قفش كده ..مش مقتنعة أنا أصلي بسياسه المراحل خلصنا الدراسه ندخل على مشروع تأسيس البيت السعيد ..ماعلينا مش وقته

كنت بتكلم أنا وواحده صاحبتي وبقولها "هاه بقى يا ستي هتدعيلي بايه النهارده" ؟؟

قالتلي هدعيلك بـ ....... والزوج الصالح

مش عارفه ليه ساعتها لقتني بابصلها بمنتهي البلاهة وبقولها

-يعني ايه زوج صالح ؟؟

=يعني يراعي ربنا فيكي

-مم طيب
=في ايه ؟!!!
-ولا حاجه ..!

قفلت معاها ولقيت الست الغلبانه اللي حظها العاسر خلاني بنتها
-مش محتاجه مساعده يا ماما
=لأ شكرا
-طيب ....
=.............
-متاكده إنك مش عايزني اس ..
=ايوه متاكده
-ممم طيب ..

-على فكرة يا ماما أنا مش هتجوز

=ماشي يا حبيبتي براحتك

-طيب....

-ماما هو أنتي مش هتسأليني ليه بقول كده؟؟!!

=لأ

-ليه؟!

=امري لله... ليه بتقولي كده؟؟!

-عشان أنا اللي هيبقوا عايزين يتجوزوني مش عايزاهم واللي هعوز اتجوزهم هما مش هيعوزوني؟!!

=ليه يا حبيبتي بتقولي كده؟!هو اينعم الست والدته هتبقي داعيه عليه بس أنتي برده طيبه و قلبك ابيض

-لا بجد يا ماما من غير هزار ..عشان نبقى واضحين يا ماما أنا مش عايزه احبطك بس أنا عارفه أي حد هيتقدملي دلوقتي هيبقى عادي قوي

عشان أنا كمان عاديه دلوقتي بس أنا لا عايزه افضل عاديه ولا اتجوز واحد عادي

=ايوه يعني ايه مواصفات الشخص الغير عادي ده؟!

-مش عارفه يا ماما عايزاه مسلم بجد عارفه المسلمين الجدد اللي بنشوفهم في التليفزيون بيعلنوا اسلامهم وبيتكلموا عربي مكسر

يعني صالح كده...

=إزاي?

-يعني يراعي ربنا في

=إزاي?

-يعني يبقى فاهم دينه صح لا تيسير ولا تعسير بزياده

=بمعني??!

-يعني لما مايبقاش فيه ولامليم في بيتنا يبقى عنده يقين أكتر مني مليون مرة
يمسك ايدي ويطمني إننا ماغضبناش ربنا في حاجه ون ده مجرد ابتلاء

ياخدني نصلي ركعتين شكر لربنا انه ابتلانا عشان بيحبنا وانه عافانا مما ابتلي منه كثيرين

=وبعدين!!

-و يكون بار باهله وبيا وبأهلي ..فاكر ربنا في كل لحظه يعني
قبل مايخرج من البيت يبقى فاكر انه ربنا شايفه فيراعي ربنا فينا وفي نفسه وفي جوارحه وفي رزقه..
ويبقى قلبه قلب طفل مع ربنا ..ميتكسفش إني اشوف دموعه وهو خايف ..وهو مع ربنا

وف نفس الوقت يكون طموح وفاهم الدنيا كويس وميضحكش عليه ودايما عايز يعلي ويعلي بيتنا معاه مش بس يقولي أعمل ومعملش واللي بعمله هو ميعملوش!! ويقولي تبريرات واهيه

نفسي يكون فيه صدق وعدل وقوة وحزم ورقة ولين ويكون بيخاف وبـيغير على أهل بيته

=حلو اوي طيب ليه بتقولي إنك مش هتلاقيه ؟!
-يوه يا ماما ما أنا قلتلك اللي زي ده هيتجوزني ليه اصلا مايروح ياخد واحده صوامه قوامه..

=بس أنتي مقلتيش أنك عايزاه صوام قوام وإن كان اللي فيه الصفات دي هيبقي بالطبيعه كده
زي برده ما أنتي لو ربيتي نفسك عالصفات دي هتبقي كده بطبيعة الحال t

...عارفه يا بنتي اللي أنتي بتطلبيه ده مش مجرد واحد مسلم.. أنتي بتطلبي واحد  مؤمن ...والإيمان دي درجه اعلي من الإسلام

اللي بالاسم

حسيت إني حصلي تحويل مسار ذهني كعادتي أما ماما بتنهي كلامها
أنا عمري مافكرت في الموضوع بالشكل ده

أنا فعلا دايما مش بعرف افهم كلمة الزوج الصالح يعني يبقى عمل إزاي لكن قادرة أحس يعني ايه زوج مؤمن
وإن كانوا نتيجه لبعض بس ..عمري ماقدرت احط كل الموقف اللي فوق دي وأكترمنها في كلمة زي ماامي عملت !!

« إنّما المؤمنون الّذين يخافون الله، ويشفقون أن يُسلبوا ما أُعطوا من الهدى، فإذا ذكروا الله ونعماءه وجلوا وأشفقوا، وإذا تُليت عليهم آياته زادتهم إيماناً ممّا أظهره من نفاذ قدرته وعلى ربّهم يتوكلون».
لقيت المقوله دي وأنا بدور عن صفات المؤمنين كان الإمام علي بيقولها لابن جندب
ايوه أنا عايزه من ده فعلا ..أنا مش عايزه واحد فاهم التقوي صلاة وصوم وبس افتكرت ساعتها الايه اللي بتقول
{قَالَتِ الأعْرَابُ آمَنَّا قُلْ لَمْ تُؤْمِنُوا وَلَكِنْ قُولُوا أَسْلَمْنَا وَلَمَّا يَدْخُلِ الإِيمَانُ فِي قُلُوبِكُمْ}. (الحجرات:14).
اكتشفت إننا فعلا محتاجين نتعلم معني الايمان اللي بيسهل الحياة وبيجعلها احلي ميت مرة عشان بتبقى في حب الله عشان
هو راضي عشان أنتي مش بس واثق ومسلم وعارف بيه لأ أنت مؤمن بيه!!
  عشان المفروض اللي بيؤمن بفكرة مش بس ممكن بـيبقي مستعد يموت عشانها الاصعب انه يعيش طول عمره عشانها!!

احنا فعلا كتير اوي مسلمين بس تعالوا كده نعد كام واحد مؤمن بجد ؟؟
  اتصلت بصحبتي وأول ماردت عليَّ قولتلها..
معلش أنا هتعبك معايا كانسلي دعوة الزوج الصالح ممكن اطلب منك طلب
ادعيلي أبقى زوجه مؤمنه صالحه ومصلحه عارفه ابني بيت يكون اركانه الايمان
=متاكده انك مش عايزه ادعيلك بالزوج الصالح ؟!!...يا بنتي الحقي  ده موسم!!
-لأ شكرا جدا ..أصل أنا افتكرت حاجتين
"من يتقي الله يجعل له من عمره يسرا "
والاهم ان ..
الطيبون للطيبات

من خواطر كتاب الايمان أولا

اتكعبلت في اللينك ده
http://www.baqiatollah.net/__print.php?filename=201101010354250