اليها!!

هو أنا ممكن أقول سر صح ؟؟!
أنا بحب رضوى !!
النهارده كان افتتاح معرض الحلي بتاعي "الاول ":D
مقولتش لحد؟؟!! دي حقيقه طيب ده يتطلب مني  إني اقول سر تاني !
أنا مابعزمش الناس المهمين عندي على أساس إن" البيت بيتك" بس في الحقيقة بادي تلميحات.. المهتم واللي عارفني كفايه بيلقطها :)
ده عشان أنا باحرج في الحقيقة جد::$:$ا وعشان مبحبش اتقل على حد.. جايز برده
بس الاكيد عشان مابقتش بحب ازعل !!
فباسكت وبكتفي بتلميحات من فوق الوش ..ساعتها على الاقل  لو محدش جه تبقي غلطتي أنا :) أصلي مأكدتش !
المهم إني من ساعة معرفتي ورضوي وأنا باعتبرها تميمه حظ وبحس انه مينفعش يوم مهم يعدي من غير رضوي فيه
طبعا صحابي هيقتلوني على ده بس الموضوع مش كده
الحكايه كلها إن رضوي
1- عندها وش من اللي بيقولوا عليه شفاف يعني أي حاجه جوه بتبقى بره في ثانيه ..صدقها ساعات بيحسسني إني عايزه اعيط :D بتضحكني قوي أما بابصلها والاقيها حيرانه بين احساسين .. ماما قوي اللي بتحلق علي "حسبي دي اعدلي دي اعملي كذه اقفي هنا هنا اوضح, كده أحسن ...واحساس حد فخور بحد قوي ..
لدرجة إني ساعات ببصلها وابقي نفسي اقولها "رضوي" أنا كويسه بس مش اوي زي ما انتي فاكره!!...
2- عشان بتقرالي قرآن في سرها وانا باخد بالي وبابتسم بيني وبيني :)
3- عشان رضوي مبتجاملش و  مبتكدبش ومبتبالغش فببقي واثقة إن الكلمه اللي بتقولهالي واحده وإن نظرتها ليَّ في مكانها بيني وبينكم بتخليني اخد الم محترم في نفسي ..
3-رضوي أما باجي أعزمها بتزعل ..لأ بتزعل بجد يعني لدرجه بتحسسني بالذنب  اصلها  اكيد جايه!! ..
بس مش ده المهم الاهم إن نبرة صوتها ..حقيقية لدرجه مش معقوله لدرجة  بتخليني أحس إني حتي مش عارفه اقولها شكرا
4-لاننا بنحب تقريبا نفس الحاجات فرضوي بتحب بالظبط اللي ان ابحبه ومع إن الحاجات اللي بنحبها معروفه ومتوقعه إلا ان رضوي كل مرة تشوفني تفاجئني بهديه مختلفه جدا !!..النهارده  جابتلي ورد بلون البنفسج اللي احنا الاتنين بنحبه و hot chocolate  with hazelnut ..رضوي!! أنا بس عايزه اقولك إن خطيبي المستقبلي معتقدش انه هيعرف من غير مااقوله إني بحب الشيكولاته بالبندق!!
5- رضوي بتاخد بالها قوي من التفاصيل اللي أنا مابهتمش بيها....ده غير انها عندها عين فنان لازم تشوف أي حاجه قبل العرض
أما لو رايحه مناسبه مهمه فـلازم تبقي مشيكه على اللبس قبل ماأنزل
6-رضوي لو دخلت معاها سبق في مين هيفرح مين دايما هخسر ..رضوي أنا مقلتلكيش ده قبل كده بس أنتي بجد بتفرحيني في أكتر  الاوقات  كآبه
7-عشان عارفه انها مش هتفوت مناسبه حتي لو كانت مش مهمه عندي ..بالعكس هتخليني أحس باهميتها  اصل الإهتمام ده عدوي
8- عشان رضوي عندها ابتسامه مش بس بتفائل بيها ..بس مش بعرف اشوفها ومضحكش حتي لو بترخم علي :@:D

ده مش بوست من اياهم بتوع أنتي حد جميل!! بدون تريقه عالبنات اللي بيحبوا يعملوا كده والله "عشان لا يسخر قوم من قوم "
بس ..تصدقي مش عارفه بس طول ماأنا في الطريق وانا عماله افكر في الكلام ده وافكر في ايه اللي ممكن تكوني شايفاه فيَّ يخليكي تبقيلي كل ده !!
بافكر إن كل حاجه بحبها قوي ربنا بيبتليني فيها وغالبا مابتفضلش في حياتي بشكل أو تاني ..أنا عايزاكي هنا
جايز عشان اشكرك على أنك جيتي النهارده رغم كل حاجه ..عشان دايما بتحسيسيني اني  مهمه  ولي اولويه ..قوي
جايز عشان اغيظ الناس إني عندي صاحبه زيك؟! يمكن برده !!
جايز عشان في حته مني كانت مستنيه ناس بعينها تيجي حتي لو قلتلهم مايتعبوش نفسهم ..مش عارفه

بس الاكيد اني مطمنه "وده احساس عندي اكبر واحلي من اني اكون بس فرحانه "
وفعلا عايزه  اوثق بصوت عالي .. اني بجد فخورة بيكي اوي..اوي..أوي
وتحت أي ظروف ومهما قلقت منامك في عز اليل على تليفون تردي عليَّ بمالك اقولك خايفه ..
افضلي حبيني دايما زي ما أنا ..خليكي دايما زي ماأنتي !!