على ماتضربيه !!
ايوه..ماهو ده الجديد,وبعد شوية هيبقى ده العادي ولازم نمشي الثقافة الشعبية والامثال على اساسه ده إذا مكنش حصل فعلا خلاص
معقول!!!....
معقول لسة في ناس بتفكر بالشكل ده؟!,يعني معقول بعد كمية الانفتاح ده سواء ثقافي ادبي وعلى رأسهم ديني نبقى لسة بنفكر بدماغ خالتي ذكية ؟! ونعد نغني بكلام كنت فاكره انه مقتصر بس على ماري منيب في أفلام الابيض واسود على طريقة " يا مأمنة للرجال ..""وجوه وبره فرشتلك.." و إن " الرجالة دول صنف ملوش أمان.." وإنك لازم تخلصي على اللي حيلته أول باول عشان مايلعبش بديله,واياااااااكي يغلبك بصوته العالي
الكلام ده أما اسمعه من ناس جهلة ممكن اعديه وأعمل نفسي مسمعتوش لكن كوني اسمعه من ناس المفروض على درجة مقبولة من الثقافة
المصيبة إن ببيفضل الكلام هو هو بس بيختلف القالب ,يعني بيبقى اشيك ومتذوق حبتين.
يعني بدل ماتشغليه بالعيال (بيئه قوي مش كده) بقت ماتشغليه بمصاريف الشوبنج والسبا... وبدل جوزك اللي هتعوديه يبقى جوزك اللي هتمسكي عليه مؤخر الصداق وتكسري عنيه ..و اياكي تتعاملي معاه بطيبة لا ياخد على كدهولا كده وإن عدتيها له مرة............ يبقى اشربي بقى طول عمرك
اتصدمت لما سمعت كلام شبه ده من ناس صحابي !!..يعني نفس الثقافة والمستوى التعليمي والبيئة مش مختلفة كتير ابدا بجد صدمني الفكر
روحت وحاولت اوصل لتحليل منطقي للموقف ..
بصيط لنفسي في المرايه "هو أنا ممكن أكون كده في يوم من الايام ..يعني ممكن افكر بالشكل ده ؟؟!
ممكن فعلا أبقى واحدة من الستات اللي مبيعملوش حاجه غير طول ماهما قاعدين يشتكوا من اجوازهم ويندبوا حالهم؟!
يعني أنا واحدة بشوف الجواز ده رزق زي أي حاجه تانيه في الدنيا بيديها لنا ربنا..نعمة ويا إما نشكر ونصونها وتبقى تأشيرة دخولنا الجنه ورضا ربنا عننا يا إما بلاء فنصبر ونحاول نغير ونتغير فيبقى برده خير لينا !!
وفجأة جت في دماغي فكرة سيطرت على تفكيري "هو احنا ليه بنتجوز اصلا؟!"
يعني لما الجواز حرب ونظريات مؤامرة وفرض سيطرة كده يبقى ..لييه نتجوز أساسا وليه الناس هتموت عالجواز بالشكل ده!
وقدرت اوصل لحد دلوقتي لشوية ملاحظات كده عالماشي ..
الا إن الناس تفكيرهم بيتوزع على تلات محاور رئيسيه بتحددها عوامل كتير اهمها الدافع و الطبقة الإجتماعية وخلفية البنت وهكذا ..
يعني الناس الملتزمين بقواعد الدين والعرف بيبقى الجواز بالنسبة لهم مجرد إطار شرعي ورسمي لعلاقة الولد والبنت
ولو ربنا فاتح علي شوية منهم فيبدأ يتكلموا عن صلاح الدين المنتظر و ياخدوا نية انهم هيجيبوا "قادة المستقبل"
طب منين ؟؟!! ....بالنسبة للشريحة الأولى طبعا الجواز بغرض العفه ده هدف مهم من أسباب الزواج ولكن مش ده كل اهدافه
ومينفعش بـأي شكل من الاشكال بيت يتبني على الدافع ده
لأن ده بيت وليه عمدان لازم تشيله ..يعني وضع أساسات و مسئولية واهتمام وصيانة متابعة .. وده مش بييجي فجأة
يعني مش فجأة بنبقى ناس مسئولين وعندنا حكمة ونظرة شمولية في الحكم عالأمور دي مهارات محتاجة تعلم وممارسة
فمينفعش ابدا يتبني بيت المفروض يضم كل القيم دي وأكتر على جانب غريزي فقط!!
وبالنسبه لقادة المستقبل وحمله الراية والكلام الحلو ده ماهو برضه هييجي إزاي؟!
يعني معتقدش أبدًا إن صلاح الدين كان بيتساب قدام التلفزيون لحد مايجيله تخلف ولا سمعت إن محمد الفاتح كان له دادا هي اللي بتربيه.
على حد علمي القائد ده بيحتاج قدوة في الأول ...
نيجي بقى للنوعية التانية وغالبا بتبقى طبقة وسط ..يعني الجواز عندهم سنة الحياة وإطار اجتماعي بحت
ولما بتسأل البنت فيهم هو أنتي بتتجوزي ليه ..بترد بمنتهى البساطه عشان كل الناس بتتجوز!!
وفي الحالة دي الجواز بيبقى بالنسبالها مرحلة زيه زي الطفولة المراهقة التعليم كده يعني.. مجرد مرحله محتاجة تتخطاها
وبالطريقة دي لو كنا لما بنكبر شوية وننتقل لمرحلة اكبر بنرمي كتبنا القديمة فهي بتعامل الجواز على الأساس ده برده .
مع بداية كل مرحلة فيه تبدأ تتخلص من مخلفات المرحلة اللي قبلها ..يعني لو كانت أثناء الخطوبة" النسمة, الحنينة .المطيعة,قمر 14..الخ"
فبعد الجواز بتبدأ إنها تتخلص بسرعة من كل ده لانها بتعتبر إن وقته انتهى و" إن لكل وقت ادان "
آخر نوع قدرت اتوصله لحد دلوقتي "الناس الفافي " اللي بيسموهم ولاد الناس - مع إني مش فاهمة لو هما ولاد ناس يبقى احنا ولاد ايه؟!-
المهم إن النوع ده بياخد الجواز كنوع من" التغيير"...
يعني المسكينة بتبقى عملت كل حاجة في حياتها جغبت السفغ* والشوبنج وال ..الخ *(جربت السفر )
يلا هنعمل ايه مفضلش غير الجواز
ساعتها بتروح لمامي أو بابي -على حسب اللي بيبقى موجود في البيت ساعتها وتطلب منه جوز في عيد ميلادها - وساعات بيبقى الموضوع اسهل من كده غاية ماهناك وهي قاعدة تدردش مع انتيمها" ماجي " (وماجي ده دلع امجد)بطق في دماغها الفكرة و ماجي طبعا مابيصدق ساعتها بيقروا يتجوزوا على سبيل التجغبه*
يعني شوية تقليعات جديدة على فرح فخم في الفورسيزونز أو جراند حياة بـميزانية تعيش دولة صغيرة مستورة وميضرش شهر عسل في لندن أو باغي* (باريس)
وبعدين..
لأ مفيش بعدين هي خلصت لحد كده
المهم يعني إن اللي بيربط بين الحالات الثلاثة دول إن الجواز بالنسبه لهم هدف في حد ذاته وبمجرد مابيوصلوله خلاص بتنتهي القصة كلها
أنا شايفة إن الجواز لا هو هدف وكمان مش حرب يعني مينفعش أبدا يبقى جوانا كمية العنف و الشر ده ..
لأ أصل أنا لو سمعت كلامه يقول عليَّ معنديش شخصية,ولازم اسكه علي دماغه عشان يتعدل وفي أحسن الحالات بتبقى الجملة الدارجة اياها" هيراعيني قيراط هراعيه عشرة وغيركده يبقى ذمبه على جمبه....
مش ممكن ده يكون الجواز ..الرابط المقدس اللي ربنا جمع بيه بين روحين من خلقه وجعل بينهم مودة والفة ورحمة
معنديش تبرير لده كله غير انه نابع من جهلنا البين. جهلنا بحاجات كتير قوي على رأسهم "الدين"
السر كله بيبقى في الدافع اللي بيحركم ناحية النجاح ...على قد رغبتهم في النجاح هينجحوا..
مجرد مابتشتغل جواك شرارة الرغبة في حاجة يبقى هتوصلها .
كان في مرة حد قاللي "محدش بيزهق من السعادة"...خلينا نتعلم سياسة السعادة..
4 التعليقات:
مش ممكن مقالة رائعة... عجبني فكرك قوي و اقتنعت والله , بس لما فكرت في ايه هو هدفي من الجواز لاقيتني عايزة حد يقوللي (زي ماتعودنا طبعا حد بيقولنا مش بنفكر احنا) و كان الجواب هم الثلاث اختيارات اللي قولتيهم :(
طب و الحل ايه ... ايه ممكن تكون اهداف أخري يعني؟؟
دعاء
ربنا يخليكي ده من حسن ذوقك بس:)
واسفة جدا على تأخير الرد بس أنا رديت عليكي أول ما قرأت تعليقك بس حصلت مشكلة وردي اتمسح:(
يا دودو متضايقيش ابدا,.. معرفة المشكلة جزء كبير من الحل
بصي يا دودو أنا شايفة إن الجواز تجربة فردية يعني إنتي اللي هتعيشها ولوحدك ومفيش حد هيعيشها معاكي عشان كده كل الموضوع بيتعلق باختيارتك إنتي في الحياة وبـاهدافك إنتي برده,
مينفعش حد يحطلك هدف مهما كان نبله ويمشيكي عليه
لكن الفكرة كلها واللي أنا كنت اقصده ...إن الجواز لازم مايكونش هو في حد ذاته هدف!!
لازم نغير المفهوم ده مع شوية مفاهيم كتير زي إن الجواز كمان مش حرب
وكمان ماهيش حياة ممله أحلى جزء فيها شهر العسل وبينتهي العسل بانتهاء الشهر ولا هو حبة قصص خرافية اللي بيوجهنا بيها الأعلام ربنا يخليه لينامن خلال مسلسلات وأفلام الخ..
أنا شايفة إن لو كل واحدة مهما كانت أهدافها خدت الجواز ده على انه وسيلة مش هدف.
وسيلة عشان تنول رضا ربنا في الأول وفي الاخر وعشان تحقق أهدافها هي سواء بقى كانت حياة سعيده ,جنة الله على الأرض ,اولاد رجاله واقصد هنا بيها الصفة وليس الوصف
أو كل الحاجات دي!
المهم إننا لو عاملنا الجواز نفس معاملة ادارة المشاريع مش على انه حاجة فوق البيعة أو زي ماتيجي تيجي
لو خططناله ودرسناه بجد
أنا واثقة إننا هنكون اسعد بكتير:)
ادامك الله سعيدة ورزقك حسن التدبير:)
عجبني كثير قولك ( يعني أنا واحدة بشوف الجواز ده رزق زي أي حاجه تانيه في الدنيا بيديها لنا ربنا..نعمة ويا إما نشكر ونصونها وتبقى تأشيرة دخولنا الجنه ورضا ربنا عننا يا إما بلاء فنصبر ونحاول نغير ونتغير فيبقى برده خير لينا !! )
فعلا صادقه 100%
بس من يفكر؟؟؟
نظل نبغى نتزوج علشان ننزف ونلبس فستان أبيض وعلشان الناس مايقولوا عنست ....الخ
الله يرزقنا خير عباده
عزيزتي وعد ..اشكرك على مرورك الكريم وادعو الله ان يستجيب لدعائك وان يجعل منا زوجة صالحات ومن ذريتنا
إرسال تعليق