اقفل النور ..غمض عينيك اوي اوي...
..
افتح النور
افتح بقى عينك عالاخر فجأة
!!هـا..شايف ايه؟؟؟
..أهلا بيك هو ده بالظبط إحساسي
عارف أما تغمض عينيك قوي وتفتحهم فجأة في عز النور..بتلاقي الدنيا ضلمة وفي كام بقعة نور كده بيظهروا ويختفوا
ساعتها مبتعرفش توصف حالتك ...
أصل صحيح ..ماهو لا انت شايف كل حاجة قدامك والحياة زي الفل وبرده تبقى كداب لو معترفتش إن في كام (سبوت) مخليينك شايف شيش بيش
مشكلتي المذمنة إني من صغري وانا باكره إحساس الزغللة ده ..
ماهو يا أبيض يا اسود ..لكن مش هنلعب يعني
يعني مع إني بترعب مالضلمة بس ببقى عارفة ساعتها إني خايفة ..ببقى عارفة أنا مين وفين وليه وإني دلوقتي مش شايفة عشان النور مقطوع في الفترة دي وزمانه جي ولحد ماييجي أنا عارفة إن لكلوكي الوردي في مكانه ومذكراتي البمبي وحتى شمعتي اللي بحبها بريحة القرفة.ه
المهم إن بقالي فترة والحالة دي مش راضية تفارقني.
لا قادرة اعلن حزني وأبدأ مراسم الحداد ولا أضحك باعلى صوتي وأقول إني فرحانة ..دانا حتى مش قادرة آخد هدنة أقعد فيها معايا وأرسالي على بر وانهي حالة الشيزوفرينيا اللي أنا عايشة فيها دي, معقولة مش عارفة افسر ولا أحس بطعم النور في حياتي مع إنه واضح وملموس وكمان مش قادرة اكمش في نفسي واخاف مالضلمة اللي عايشاهازي مابعمل دايما..
عامتا في الحالتين قررت اتجاهل الخدع البصرية وألعاب الضوء اللي أنا عايشة فيها دي كلها واركز
ماهو يا ضلمة يا نور ...
أو عالاقل ابطل بعد كده افتح عيني جامد في وش النور عشان من الواضح إن عيني مش متعودة ....ه
بيني متعودتش عالإضاءات العالية
0 التعليقات:
إرسال تعليق