بنت بضفاير

عديت في شارع حواديته كتيرة وبيوته أكتر..و لقيت في زاوية بنت بضفاير ضحكتها زي السكر ..بصيت لقيتها إبتسمتلي وبتغمزلي وبصوت ملايكة بتندهلي وبضحكة صافية تسمع بقلبك رنتها ترميك في حضن ليالى دفا يمكن جنان وحاجات كتيرة عشناها أيام زمان...... ودتني عند الدكانة..بيتنا الصغير وأبن الجيران.. ودتني لحاجات عشناها ،أحلام جميلة رسمناها ووعدنا نفضل وياها ..وحلفنا لو يوم هنسيبها نرجع نقف على باب بيتها.. يمكن في مرة تودينا على ذكرى حلوة في ليالينا وتجيبنا تاني تدور بينا على حلم ضايع في عنينا .. البنت دي مش معقولة وبنظرة منها وضحكاية أو تكشيرة رجعت بعمري وأيامي خلتني بنت في سنة أولى لسة بضفايري و فستاني..خلتني عايزة أحلم وأطير و أطلع على شجر البساتين وأجري وأعاكس العصافير وأنا لسة لابسة خلخالي وكعبي العالي. اه منك انتي يا بنوتة وملضفاير المربوطة ..يمكن يوم هتفكيها بس إوعيدني في يوم تاني تمشي في شارعنا المليانة بيوته حواديت كتير من حواديتنا .. أحلامنا اللي حلمناها على باب بيتنا محطوطة جمبه شرايطنا اللي نسيناها وسبناها علمسطبة جوا حارتنا
وساعتها يمكن يتاخد قلبك.. لما بضحكة حلوة نغمتها بترن في ودنك لبنت حلوة سغنتوطة لسة بضفاير مربوطة ترجع بعمرك وسنينك لذكرى حلوة وحدوتة