المرأة الحديدية

إنتي مش ممكن تكوني واحدة ست!!!!!!!!

طبعا مش ست .. ست إزاي ومنين؟؟!

تقدر تقوللي حضرتك ايه مفهومك عن الست ؟؟؟

بتغاظ وبيتحرق دمي من الرجالة اللي بيفضلوا يتريقوا على حال مراتتهم وإن إزاي من بعد ما اتجوزها اتحولت وبقت شبه درفة الدولاب ومفيش فرق كبير بينها وبين حسين صاحبه !!!....

طيب هو حضرتك بصيت لنفسك في المراية قريب ؟؟؟

طب بلاش دي ..بصيت لها هي ؟؟

لو تحب ممكن اديك نبذة بسيطة عشان واضح إن حضرتك مش واخد بالك من شوية رفايع كده !!

خليني اقولك مراتك دي ايه حيثيات وظيفتها كزوجة في المجتمع المصري

أولا ...ست بيت(سبع صنايع والبخت ....)

أيوه.. يعني تطبخ وتغسل وتكوي وتنشروتشيل وتحط وتنزل تجيب الخضار والطلبات وتحاسب الجزار وتقف مع السباك عشان الحنفية اللي بايظة بقالها 3 أيام ومغرقة البيت .وفي آخر اليوم مش من حقها حتى في كلمة شكر... ده يبقى خير وبركة إذا مجتش حضرتك علقت على المخدة اللي مش في مكانها أو الملح الزايد في الاكل (مع العلم إنها زودته بناء على طلب السيادة )...من الاخر خدامة من غير أجرة

>>>>>>>>>

إنتي جاية تشتغلي ايه؟؟؟...سواقة

يعني تنزل تودي الاولاد المدرسة وتروح تشوف طلبات البيت وتجيبها وتروحهم ومفيش مانع طبعا لو عندك كام مشوار عايز تخلصهم فتعملهم لك بالمرة ..طبعا أصل هي وراها ايه ماهي قاعدة فاضية

<<<<<<

خدامتك مدرسة انجليزي وحساب وفرنساوي لحد ماييجي مدرس الفرنساوي

طبعا الميزانية ماتسمحش بدروس خصوصية والذي منه فـبتضطر إنها تقعد تذاكر للملايكة ولادك قبل ماحضرتك تيجي عشان دوشة العيال طبعا ماحضرتك شقيان طول اليوم ومش حمل دوشة يعني!!!!

^^^^^^

موظفة علاقة عامة!!! (الو مرحبا ...كيف الحال..!!)

يعني اجنده متحركة تفتكر اعياد الميلاد والمناسبات العامة والاجازات الرسمية ومن ضمنها انها تفكرك بعد ميلادها وعيد جوازكم عشان حضرتك عقلك مش فيك وليك عذرك وطبعا متنساش تسأل على عمتك اللي في استراليا عشان بتزعل وبتاخد على خاطرها وتحضر معاك عشاءات العمل وتكون لطيفة ومبتسمة ولبقة وشيك ومثقفة...

تسأل على اهلك وأهلها وتحاول خلق جو ظريف من الحياة الاسرية الدافئة

<<<<<<<<

مستشار خاص..

لسماع جميع المشكلات العامة والشخصية والمساعدة في الوصول للحلول اللازمة والمنطقية

وده طبعا عشان مشاكل سعادته تستحق وذات قيمة لكن مشاكلها هي عبارة عن تفاهات وكلام فاضي

<<<<<<<<

وده كله لو مش بتشتغل عشان تساعد في مصروف البيت ...دي حكاية تانية وموال لوحده

وبرده هنا احنا بنتكلم على ناس مرفهين نسبيا عندهم عربية لكن لو ناس عادية يبقى ضيف لده بهدلة المواصلات والرزالات والذي منه
نيجي بقى لدور الست...
طيب منيين؟؟؟؟؟؟!!!
على فكرة أنا مبقولش إن كون الست تبقى ربة منزل أو تعلم ولادها أو تشوف احتياجتها ده مش دورها بس أما تبقى مسئولة عن كل صغيرت وكبيرة ..أما تبقى مطالبة لوحدها ببيت واولاد ومصاريف وحماية لكل ده بما فيهم هي نفسها من غير حتى كلمة شكر أو تقدير مش هقولك مساعدة ..يبقى أنا آسفة جدا بس إنت معاك حق دي مش ست ..دي راجل

للاسف في مجتمعنا فقد الرجل وظيفته واصبحت الرجولة مجرد وصف وليست صفة ...عندما تخلى الرجال عن وظائفهم وتنحت النساء أيضًا عن دورهم ...

فكنت احسب دوما ان للرجل دور السند والحماية والتفهم والرعاية وان المرأة هي كيان المجتمع الحنون الرزين وذلك لم يقلل من دورها أو مكانتها يوما ..

أما الآن فقد انقلبت الاية فهذه امرأة تمسك بتلابيب رجل و"تمسح بكرامته الارض"وتتلفظ بانبى الالفاظ "قال يعني بتاخد بحقها"والسبب>>>ركن مكانها

وهؤلاء رجالا يقفوا دور المشاهد امام بعض الصبية المنحرفين يتحرشون بفتاة

ولكني لا الوم تلك السيدة كما لا الوم اشباه الرجال هؤلاء

فللرجولة معاني اخرى... وعلمت ان الله خلق حواء من ضلع ادم ليرعاها ويكن رحمة بها وتوفر له هي الانس والالفة.

لم تخلق من قدمه ليدوس عليها ولا من راسه لتعلوا فوقه خلقت من ضلعه كي تكن له قلب حانيا ويكن لها حماية وسندا.

سيدي طالبني ان اكون حواء عندما تكون انت بحق ادم