مش عارفة ليه -مع إني معنديش مشاكل شخصية مع السفر بالعكس بحبه -كل ماحد يجيب سيرة السفر أو نقرر السفر فجأة قلبي ينقبض وبطني تكركب

المشكلة مش متعلقة بمكان,مسافة أو مدة معينة.

فكرة السفر نفسها بتقبضني لسبب مجهول مهما طولت المسافة أو قصرت و حتى لو كان لمصر الجديدة (على اساس إني في تكويني الطبيعي كانسان بعتبر ان أي مساحة خارج نطاق الدقي... سفر!!

أول اما بسمع كلمة سفر بفتكر حاجات غريبة قوي ومش مترابطة ببعض

بقعد افتكركمية الأفكار المتخزنة في دماغي اللي لسة عايزة أنفذها,ولستة الأعمال- اللي لسة مشطبتش منها حرف من ساعة ماجبتها-

بفتكر وشوش بقالي كتير مشفتهاش ,ناس مقصرة معاهم,ناس نسيتني في وسط التوهة وناس بيني وبينهم فرقت الدنيا لا عيب فيهم ولا فيَّ بس ده طبع الدنيا ....الفرقة.

بفتكر لكل حد حاجة حلوة..تخليني متمسكة بيه أكتر في حياتي.

وبفتكر الناس اللي راحوا ومارجعوش ...والحاضر الغايب وغيرهم وغيرهم ناس كتير

من غير مبرر مبحبش أسافر وحد زعلان مني أو مستني مني حاجة بلغة التجار بحب اقفل حساباتي قبل ما أمشي

-فلكل حد زعل,زعلان أو بيفكر يزعل

أنا آسفة...-

ومع إن الصورة دي لازم تيجي في دماغنا طول الوقت لأن المفروض محدش ضامن عمره لكن فكرة الموت بتتجسد قدامي وبترتبط ارتباط وثيق بالسفر..

نفس الشكل ,نفس المعنى ,نفس برودة الوداع, نفس الخوف من المجهول .

الفرق الوحيد بيبقى بينهم هو نفس الفرق بين الفقد والافتقاد .

و دايما بسأل نفسي هو احنا ليه مبنقفش للحظة و نهتم بالتفاصيل مع إن التفاصيل دي نفسها هي اللي بتجمل الصورة ومن غيرها تبقى الصورة ملهاش طعم

يعني مش لازم نصحي الصبح نلاقي تفصيلة من تفاصيل الصورة اختفت أو بهتت عشان نبدأ نهتم بيها ..

المهم إني دلوقتي أفكاري اتلخبطت وبدأت افكر في الفين موضوع

مش بقولكم السفر دايما بيلخبطني ويخليني أبدأ اخرف

المهم إني هروح دلوقتي وأفضل احلم بالفنار اللي كان طويل علي قوي زمان

دلوقتي أنا كبرت وطولت ...

هاروح اطلع له لساني واقولوا انه وحشني قوي

بس يا ترى هيعرفني دلوقتي...

هشوف واقولكم إن شاء الله

يلا استودعكم الله :)

اللهم إنَّ نسألك في سفرنا هذا البر والتقوى ومن العمل ماترضى..اللهم أنت الصاحب في السفر والخليفة في الأهل

...عليك توكلنا واليك المصير