شويه كلام مش مهم

لسه زي ماأنا متفائله جدا وشاكرة جدا وراضيه جدا جدا
بس هو ده يمنع اني عايزه شويه حاجات مالهمش علاقة ببعض
 عايزه اعيط
عايزه حضن
عايزه حد يمسك ايدي ويطبطب عليها مرتين زي ما ولا كانت بتعمل زمان
عايزه أنزل اتمشي عالبحر دلوقتي حالا
عايزه اتمرجح وانا مرجعه راسي لورا واشوف كل الدنيا فوقاني تحتاني
عايزه ..عايزه ابقي قويه اوي!!
عايزه ابقي مابخافش من الوحده ..باعرف اعيش لوحدي بدون شجن ولا حنين ولا حقد
عايزه أما الناس يسيبوني ويرجعوا اقابلهم بحضن ومن غير كلام اكون ممتنه انهم رجعوا وانسي الفترة اللي غابوا فيها اد ايه كانت صعبه..
عايزه يكون عندي طاقه المداواة ..ابقي راحه للناس اللي بحبهم عالاقل
عايزه ابقي بسيطه ومثاليه
عايزه ابطل قلق
عايزه ابطل الخوف اللي مالوش معني ولا لازمه ولو مش هابلطه يبقي عايزه بطني ماتوجعنيش وأعرف أنام
عايزه أحس بطاقة حب "اني مهمه في حياة حد "آخر واحده  كانت بتمدني بيها واحده صاحبتي معرفش عنها حاجه دلوقتي
عايزه ابقي ام .. امنيه جديده وغريبه عليَّ
عايزه احضن محمد ويحضني ومايهربش مني عشان عمره ماهينسي إني كنت الشخصيه الشريره في القصة
عايزه .. عايزه ابطل كلام مالوش لازمه