ملحوظه :لا يوجد هناك أي سبب لكتابه تلك المدونه إلا بـدافع الكتابه
"ولا يوجد أي سبب للنشر سوى اني قضيت وقتا طويل في المسح والكتابه ووقت اطول لتقرير ما إذا ماكنت سأقوم بنشر هذا "الأي كلام
مع العلم ايضا انه لا يوجد أي داعي لقراءة مثل تلك التدوينه إلى بدافع الفضول
وساعتها يبقى مش ذنبي أنا برده حذرت :D
طيب ...
غريبه قوي إن حد يبدأ ..كلامه بطيب مش كده
طيب دي لازمه عندي ومش دايما باعرف اتحكم فيها ..وبس على فكره كمان
ساعات ببدء كلامي بكلمه بس
بس عامتا برده ده مش موضوعنا دلوقتي ابدا الكلام ده كله لازم اكتبه بتدوينه واسميها
"25 simple reasons make me an alien"
.........
بكتب لمجرد إني عايزه أكتب؟؟
جايز
كسر حجز؟؟
جايز برده
عشان الاء صاحبتي قررت إنها مش هتكلمني غير بعد ما أكتب حاجه؟
يمكن
ويمكن كمان عشان زهرة "الديزي" اللي حطاها قدامي عالمكتب فمحسساني إن يبقى معنديش دم لو مكتبتش وكتبت حاجه حلوه كمان و إن ده أحسن وقت للكتابه
آه آه آه ... نسيت حاجه مهمه ممكن يكون عشان اجرب شكل المدونه الجديد :D
*********
بس رسميا أنا بقيت 22
"وبالمناسبة دي آخر سنه هاقول فيها عن سني :D"
حسيت برعب أعقبه اكتئاب وهبوط في الدورة الحياتيه بشكل مبالغ فيه مع بدايه ال 21
حسيت إني كنت عايشه آخر 20 سنه في غيبوبه وإني كنت فاكره العالم كله باللون الزهري اللي اخترته لمدونتي
الأكتر من كده إني حسيت إن العمر فيه كام 20 سنه اضيعهم ...كنت حاسه اني بجري مش عارفه من ايه ولا عارفه على ايه
من كتر ما أنا مش عارفه بطلت أجري موقعتش بس ...وقفت
قبل مادماغك تروح لبعيد أنا مش ندمانه اطلاقا
كنت ناويه اقعد اشرح أسباب عدم ندمي واد ايه اتعلمت حاجات واد ايه اسلوبي اتغير بشكل عام ومش بس في الكتابه وو وو
وفعليا كتبتها-بس اكتشفت إن محدش يهمه يعرف ده وكفايه أبقى أنا عارفاه-
كنت عايزه اقول كمان قرارتي الحاسمه واد آيه ان أبقيت انضج وعندي قدرت تحليليه مش بطاله وبطلت امثل على نفسي
بس بردو حسيت إني مش محتاجه اشارك حد كتابه قرارتي ..لاني اكيد هشارك تفعيلها أو نتاجها
قعدت أكتب في مشاعري ...بس كمان مشاعري متلخبطه
:Dفكرت أكتب عن عيد ميلادي اللي قضيته كأميره ...خلصت
أنا وصفته في كلمتين"عيد ميلادي كان اشبه بالملكي :)الحمدلله
-طيب هتكلم عن الاحساس الغريب اللي محسسني إن في حاجه ناقصة -لدرجه ان اعز صحابي اتهمتني إني مبعرفش افرح
بس أنا اصلا مش عايزه افكر فيه فما بالك إني أعمل منه حقيقه على ورق
طب هكتب عن الناس اللي بقيت بستغرب إزاي سمحتلهم يدخلوا حياتي في يوم
:Dلأ ..بصراحه مايستهلوشي
من غير كلام كتير لا حيودي ولا هيجيب
اكتشفط إنا في حياتنا بنبقى عاملين زي اللي بينط نطه الشجاعه
فيه اللي بينط من غير تفكير وفيه اللي بيستني يبص تحته الأول لحد مايدوخ ويقع برده ماهو كده كده هييجي عليه يوم بإرادته أو غصب عنه هينزل لبحر ويتعلم العوم كمان
....وفيه اللي بيفضل عالحافه
في حياتي أنا مفرقتش الحافه وكل مره كنت اخد فيها خطوه واقول خلاص أنا مستعده انط
برجع تاني أو اخاف وأرجع أكتر ماكنت ويحتاج مني مجهود اكبر عشان أرجع تااااااني "عالحافه
حاسه لأول مره إني عايزه اسيب الحافه دي خالص ...
خدت كفايتي منها ..
قررت انط:)
