السبت، 20 مارس 2010

نسخة تشبهلي


تتكسر كل براعتي اللغوية ,والفاظي المنمقة فقط عند ذكر أسمك..
يقولون اني اشبهك الملامح وتقولين انني نسختك المصغرة ..واقول لك الجنة يا امي...
عارفة يا ماما كل الناس لما بتربطهم علاقة قوية بأمهاتهم بيقولوا "ماما صاحبتي"...أما أنا مش كده خالص
باحس إنك حبيبتي ...حبيبتي بجد
حبيبتي اللي مقصرة في حقها دايما
بجد والله بفكر فيكي في كل وقت وكل مكان بشتاقلك قوي وانت بعيد, وجسمي كله بيرتجف لما بفتكر فرق السن الكبير بينا وأقعد ادعي إنه يجعل يومي قبل يومك.ه
ساعات باستغرب إزاي ست عظيمة زيك تجيب كائن اناني زي
لو تعرفي يا ماما شوية الوجع اللي في قلبك دول واجعينلي قلبي ازاي ..وبقعد افكر لو الدنيا مكانش فيها حاجة اسمها وجع و ضغط وقلب وهم كان جرى ايه؟؟؟!ه
بكره اوي أما بشوف الالم في عينك وبتداريه عشان محدش فينا يحس..لكن بشوفه ..بحسه جوايا واد ايه بفرح أما بشوف وشك بينور بضحكة تشبهلي..ه
عارفة يا ماما أنا عارفة إني عمري ما حسستك إني بحبك اد مابحبك فعلا ودايما كنت بخاف في صغري اطلب منك حاجة عشان عارفة إنك ..يعني هتحبكيها زي مابيقولوا..
طول عمرك عندك الحق حق والابيض ابيض والاسود اسود والغاية عمرها ماتكون تبرير لوسيلة
عارفة إن عمرك ماقلتيلي حاجة وطلعت غلط ..وعارفة إن بالرغم من ده لسة في حاجات كتير مابسمعش كلامك فيها
عارفة يا ماما اد ايه بعشق الكام خصلة الفضي دول؟؟؟
بحب فيكي كسوفك ورقتك اللي مبتغيرهاش ارقام بتتضاف لعمرك في البطاقة..و بحب اوي دعوتك ليَّ اللي بسمعها كل يوم الفجر
بحب خناقتناالعيالي على دبابيس الايشاربات والايشاربات نفسها كل يوم الصبح ..بحب شياكتك واهتمامك بالتفاصيل
بحب كلامك القديم وأما بتقوليلي "ميصحش" و"مش أصول"و أما بتنرفزي اوي فـتقوليلي.. "كوني محترمة"ه
بحب كلامك الحلو والعاقل وحكاوينا .
حتى بحب هزارك ولما بتحاولي تنزلي بمستواكي الارستقراطي لعامة الشعب امثالنا وغالبا بتفشلي..
بحب كمان تسامحك وطيبتك وتصديقك للناس وبخاف اوي من غضبك ولما دايما بتفكريني "اتق شر الحليم إذا غضب"ه
عارفةاد إيه بكره نفسي كل ماأفتكر وانا صغيرة أما قلتلك مرة "انا بكرهك "فاكره ساعتها قلتيلي ايه؟؟
أما أنتي عندك 12 سنة وبتقوليلي كده "هتعملي فيَّ ايه لما اكبر ....أما متلاقنيش قدامك هتعرفيي قيمتي"....ه
مش هنسى بعدها بكام سنة أما تعبتي ورحنا المستشفى كانت الكلمة دي شريط داير في راسي وسط دموعي وابتهالاتي إن ربنا ميبتلنيش فيكي
أكتر وقت ببقى مبسوطة فيه واحنا قاعدين قعدة صفا وبسرحلك شعرك أو وإنتي بتلعبيلي في شعري عشان أنام وبتغنيلي "ه"يا تمر حنة
وبطير من الفرحة لم حد يبصلي اوي ويقوللي إنتي نسخة من أمك أو حتى لما أعمل حاجة متعودة تعمليها أو أقول لازمة دايما بتقوليها
و اصدق حاجة متتصدقش لمجرد حسن ظني بالناس ويقولولي ...إنتي طالعة لأمك
تفتكري؟؟؟؟....
أنا عارفة إنك ليكي بيت في الجنه ..أنا واثقة يا ماما إن ربنا بيحبك..ده أنا ساعات بأحس إن ربنا بيحبني بس عشان بنتك
أو بيحبني عشان كده خلقني بنتك
عارفة...مش لاقية كلام بس
أنتي حبيبتي في كل وقت ...حبيبتي دائما:)


كنت ناوية اكتبلك ده في عيد الام بس اكتشفت إنه يوم وإنتي عيدك كل يوم ...أنا بس عايزة اعلن وبكل فخر
"فرحانة اوي بـإنك صورة تشبهني أو اني نسخة تشبهلك"
ربنا يخليكي لي

0 التعليقات: