خليك عارف

اني اطلب منك من غير كلام تكون جمبي دلوقتي بالذات مش بس عشان وقت صعب بس عشان وجودك بالدنيا
 عشان بجد مش عايزه حد غيرك ومن غير كلام أحس إنك موجود وبطبطب علي
أنا مكنتش محتاجه غير حضن من سكات
أنا اصلا مقدرش استغني عنك ..

علي لسانها

أنا موجوعة اوي يا رب
أنا موجوعة اوي وزعلانه اوي ومكسوفة منك اوي اوي
مكسوفة منك لدرجة إني مش قادرة اكلمك فبكتبلك
يمكن كتابتي تهون أو تشفعلي عندك
أنا اتحرمت من قربي ليك يا رب أنا عارفه إن اللي بيتاخر بتأخره وانا اتاخرت ولسه بتأخر بس هو أنا بعيدة للدرجة دي
أنا بعيدة لدرجة إني مش عارفة أنا فين وازاي ولا عايزة ايه ومتلخبطه ومتخبطه وكل حاجه كانت "أكيد "بقت "يمكن" حتي مشاعري  ومش عارفلي حاجه واحده امسكها بايدي واسميها او اشاور عليها و اقول هي دي العله و اداويها 

قلبي وجعني عليها يا رب وجعني قوي وكنت عارفة إنك هتبتليني في حد فيهم عشان يمكن افوق بس ..
يا ربي والله موجوعة موجوعة بجد ومش بابين بس قلبي واجعني في كل يوم بيبدأ بجرس يدوي صوته في دماغي بكلام بيوجع و يعيد علي كلام اتقال بحاول انساه .... و مش بيتقطع

 دماغي بتروح مني في حتت مرعبه ..
قلبي واجعني منه يا رب عشان كل اللي عمله واللي معملوش.. و ان دموعي بقت هينه اوي اوي بالشكل ده قصاده 

صعبان علي قلبي صعبان عليه منه يا رب و صعبان علي نفسي 

ولا عارفه اتكلم و ابين و لا عارفه اصبر و اعدي و اتحمل و لا عارفه امشي ولا عارفه اصدق انه وحش و زيهم ولا قادره ارجع الصوره النبيله اللي كنت رسماها 

يا رب انت مقلب القلوب و مطلع و عارف كل حاجه يا رب ..

اعفو عني و اغقر لي و ارحمني يا تواب يا رحيم يا قريب 

لاني اعظم الاشخاص...

ربما لمثل ذلك السبب اشعر دائما ان الله سيجعل دائما ابتلائي بمن احب
فأنا امرأة تعشق حتي يذيقها الله مرار عشقها..
 ليؤدبني الله ويعلمني مرة بعد الاخري ان هناك ذلك النوع من العشق -غير جدير-ولا يستحقه سوي القدير

ذلك النوع الذي يجعلك تضحي وتذرف الدموع عند فقدك الاحبه أو احتماليه فقدهم حتي  أو خوفا على مشاعرهم ..
الذي ليجعلك تالف الاكاذيب كي تختلي بهم أو تداري عنهم حقائق ربما  تزعجهم

ذلك النوع الذي يجعلك  تخشي  مجرد محاولة أخافتهم  أو اغضابهم يوما
ذلك الحب الذي يجعلك توقف ساعتك وترمي مخاوفك وهمومك ومعارفك واحبائك وجدول مواعيدك المزدحم فقط لتمتع بالحديث اليهم بضع لحظات .

فذلك العشق لا يليق الا بمعشوق واحد أحد..فرد صمد
ذلك الحب الذي يهلكك إن احببته بشرا ..فاي بشري هذا الذي يستوعب ذلك الحب

اللهم لا تجعل خوائي في نفسي واجعل راحتي في الأنس بك

29-3-2013

اليها

عاشق سارح فى الملكوت .. ميهموش العمر يفوت

يدفع فى الحريه حياته .. لو اتكتف لحظه يموت


قلبه بيبرق زي الماس .. ولا يملك غير الاحساس

غرقان في جروحه وآلامه ..و بيداوي في جروح الناس

يبيع قلبه للي يحبه .. ومعندوش للحب شروط

هو أنتي ليه عايشه برده الدنيا ومبتشاركيش في اللي حاصل ؟

عشان فتنه
عشان لو ركزت هتلاقي مفيش ثوابت ولو حاولت تاخد صف أي حد هتلاقي إنك بترجع لورا بشكل أو باخر
عشان كله بيعمل نفسه فاهم ومحدش فاهم حاجه !
عشان كله خرج عن فقه الاختلاف وادب الحوار والموضوع بقي مجرد نزاع قبلي وياريته على مرجعية الاسلام أو احكام المنطق أو أي علم أو حكمه
عشان ماحدش بقي عارف مين اللي بيجري ورا مصالحه الشخصيه أو بمعني اصح
عشان كله بقي لا يخلو امره من بعض المصالح الشخصيه فده اصلا مبقاش رمانة الميزان ..
عشان للاسف اللي حاصل ده تلوث و حرب كلاميه في وقت لا يحتمل سوي " العمل"
فقلب الموضوع بشيء اقرب لمنازعات الستات في المناطق العشوائيه والحارات الخلفيه
 "كلام غير مجدي "ماحدش صح/ ماحدش غلط وماحدش عارف مين بدا أو بدا ليه في المقام الاول , وكله بيحاول يدخل يتفرج يهرج يسقف أو ينوله من الحظ جانب لكن ابدا محدش عايز يخلص ..والمخلص مش راح ينوبه غير تقطيع هدومه في النهايه
لمثل تلك الأسباب العمله الصعبه الصمت والعملة الاصعب منها الاخلاص والعمل بنية ترك أي بصمة وسط كل هذا التلوث

عشان كده أنا شايفه ان "أمسك عليك لسانك وليسعك بيتك وابك على خطيئتك" هو شعار المرحله..
وعشان كده أنا قرفانه ومش عايزه اكون مجرد صوت عالي في المزاد وعشان كده كمان  أنا اصلا فرحانه أني بره المزاد الحمدلله :)

يحكي انّ وكان يا مكان ..

يحكي أنّ الدنيا دي غير
والناس لسه قلوبها بخير
والشمس بتضحك وترشرش علي روح  العالم بلالين

يحكي انّ عيون الناس مش كدب وتحوير وخلاص
والإخلاص مالي الإحساس
والناس ماشيه تقابل ناس بوشوش صافيه وحضن كبير

يحكي برده عن الأطفال ..لسه بتعرف تتشاقي!!
تجري وتتشقلب بجنان تحلم أحلام بحداقة!
أحلام لونها بلون الطيف حواليها عصافير الصيف
 فارده جناحها بتناكه!


يحكي ان  عن جارة عجوز كانت مش محتاجه فلوس
من كتر جيرانها الشجعان ..كانت مش محتاجه تخطي
برات عتبة  بيتها توطي علشان تكسب قرش حلال

وكمان  عن رجاله جدعان عمر ما كان فيهم خوان
كانوا بيخافوا على المحروسه ما يهوب ناحيتها جبان
بنو بشرفهم عزه ونصر فتحوا في وسط القصر ميدان

يحكي انّ وكان ياما كان عن دنيا وصبحت دكان 
وعن الكوسه والحوسه والخيبه
 راكبه  جمال وحمير وبغال 
والناس التايهين  في الزحمه
دول بينادوا بعيش مش لحمه
بس الوضع حرج والازمه
ماشيه تقش ماتعرف رحمه
واحنا نحط قانون ونعدل "بكرة هياكل كل جعان"

يحكي ان بكره ماجاش عالدنيا الحلوه ومفيش
سكر سنترافيش وفراش مبقاش باقي غير الخفافيش!
أما اياهم دولا حكايه تنتهي في الاخر بافيش
"مش بيخافوا من التهويش كلنا في عيونهم حرافيش "

يحكي ان وكان يا مكان وشوية اساطير وكلام 
هما بيحكوا ودول بيقولوا ..كل ده في الاخر اوهام!

حكايات من زمن الروبابكيا ..واللي بيحكي كمان انتيكه
كلمة "عين العقل بعافيه ..كله بيلعب بولوتيكا !
والدنيا الحلوة بقت غنوة تتغني من غير مزيكا

والناس زهقت مالالحان
كله حديت ماسخ و كلام
غرقان ساسه في التوهان 
رغي كتير  من عالم كان
كان سكانه من الإنسان

يحكي ان وكان يا ماكان...